Kerey.kz/Керей.кз » Шоу-бизнис

Наурыз мерекесі құрметіне Панфилов көшесіндегі Сахнада «Ән қанатындағы Наурыз» атты дәстүрлі өнерде жүрген жас орындаушылардың ән кеші өтті.

kerey.kz — Sun, 22 Mar 2026 06:25:14 +0000

Бүгін Алматы қаласы әкімдігі Мәдениет басқармасының ұйымдастыруымен Панфилов көшесі бойындағы сахнада Наурыз мерекесіне арналған «Ән қанатындағы Наурыз» атты жас орындаушылардың дәстүрлі ән кеші жоғары деңгейде өтті.
Алматы қаласы ХХ ғасырдың 30-жылдарынан бастап ұлт мәдениетінің ұйытқысы, ордасы қызметін атқарып келеді. Дәстүрлі өнердің ірі өкілдері, зерттеушілері осы қалада тұрып, еңбек етті. Қазір де профессионалдық типтегі дәстүрлі музыканың ең ірі ошағы – Алматы. Мұнда этномузыканың белгілі қайраткерлері, дәстүрлі домбырашы, қобызшы, сыбызғышы, әнші-термешілер әзірлейтін арнаулы орта және жоғары оқу орындары, өнер ұжымдары шоғырланған. Қазақ көне музыка аспаптарының жер бетіндегі жалғыз музейі мен еліміздегі жалғыз дәстүрлі өнер театры да осында.
Соңғы уақыттары Алматы қаласында дәстүрлі өнерді насихаттап жүрген жас өнерпаздардың арнайы ән кеші өтпеп еді. Ұлыстың Ұлы Күні қарсаңындағы бұл концерт сол олқылықтың орнын толтырғандай болды.
Дәстүрлі ән кешіне Срайыл Аида, Сағындық Аружан, Мизамбаев Райымбек, Сұлтангалиева Ғалия, Абылайұлы Нұртуған, Ділдәбекқызы Аңсаған, Әбілқасымова Ұлжан, Тарғынова Жайна, Сәдірқожаева Сабира, Тәттімбек Айбек, Ермұратұлы Асқат, Әлдібай Таңжарық, Жұмамұрат Кішкене, Мархабатова Шұғыла, Бақыт Нұрай, Ақылбек Балжан, Өтемұрат Жасұлан, Сәулет Аманғазина сынды Алматының дәстүрлі ән өнеріне баулитын оқу орындарында оқитын студент жастар қатысты.
Концертті белгілі дәстүрлі орындаушы, Мәдениет саласының үздігі, ұстаз Талғат Әбуғазы жүргізді.

Tridon Mk2 зениттік қондырғы

kerey.kz — Wed, 04 Feb 2026 02:00:44 +0000

Швеция мен Дания Украинаға арнап британ-швед өндірісіндегі заманауи Tridon Mk2 зениттік қондырғыларын сатып алуға бірігіп кірісті. Кешен әсіресе жақын қашықтықта ұшатын ирандық «Шахед» дрондарына қарсы ең тиімді қарудың бірі. Қазіргі уақытта Tridon Mk2 өз класындағы ең озық әуе шабуылына қарсы жүйе саналады.

Tridon Mk2 зениттік қондырғысының басты ерекшелігі атыс қарқыны. Ол минутына 300 оққа дейін жаудыра алады. Осылайша әуе кеңістігіне енетін шағын дрондардың көзін жылдам әрі дәл жоюға мүмкіндік туады. Тағы бір артықшылығы атылатын 40-мм снарядтардың құны небәрі 27 долларды құрайды. Экономикалық тұрғыдан тиімді екенін дәлелдейді. Қару-жарақ саласындағы мамандар Украинадағы әскери қақтығыстарды ескере отырып, арзан әрі тиімді әуе қорғанысы қаруына сұраныс жоғары екенін айтады.

Tridon Mk2 жүйесінде қолданылатын арнайы британдық бағдарламаланатын 3P (FUZE 3P) снарядтары ерекше қызығушылық тудырады. FUZE 3P оқтары әртүрлі режимде жұмыс істей алады.

Яғни, бұл снарядтарды әуе кеңістігінде жарылатын уақытын, биіктігін, қашықтығын алдын ала бағдарлауға болады. Мысалы, кішкентай әрі төмен ұшатын БПЛА-ларды немесе «Шахед» типіндегі қанатты аппараттарды еш қиындықсыз жояды.

Украинадағы соғыс дәл осы заманауи снарядтардың тиімділігін шынайы майдан жағдайында көрсететін сынақ алаңына айналмақ. Әлемдік қару-жарақ нарығында дәл осы сияқты бағдарламаланатын снарядтардың құны айтарлықтай қымбат саналады. Алайда FUZE 3P оқтары өзге батыстық аналогтарымен салыстырғанда бағасы қолжетімді әрі нәтижелі екендігін әскери сарапшылар жиі атап жүр.

Сондықтан Швеция мен Данияның бұл бастамасы Украинаның әуе қорғанысын күшейтумен бірге, Tridon Mk2 кешенінің жауынгерлік әлеуетін нақты әскери жағдайда тексеруге мүмкіндік береді. Бұған қоса, екі елдің бұл қадамы басқа да еуропалық мемлекеттерге үлгі болып, әуе шабуылына қарсы қорғаныс саласында заманауи қару-жараққа инвестицияны арттыруға итермелеуі мүмкін.

Әсіресе, Украинадағы соғыс Батыс елдерінің әскери-техникалық стратегиясын өзгертті. Олар енді қару-жарақтың тек технологиялық басымдығын ғана емес, оның экономикалық тиімділігі мен жеделділігін де басты орынға қойып отыр.

Украина алдағы уақытта Tridon Mk2 кешендерін майдан даласында пайдалану арқылы британдық-шведтік қару-жарақ индустриясының беделін көтеріп қана қоймай, осындай техниканың стратегиялық маңызын да нақты көрсетеді. Әлемдік қару-жарақ нарығындағы бәсеке жағдайында мұндай тәжірибе өте маңызды. Қазірдің өзінде әскери сарапшылар Tridon Mk2 кешенін Украина әуе қорғанысындағы бетбұрысты оқиға ретінде қарастырып отыр.

Келешекте қай салаларды дамыту керек?

kerey.kz — Mon, 22 Dec 2025 19:07:35 +0000

Инвестордан артық қатаң реалист жоқ қой. Ол салған ақшасы өзіне еселеп қайтуы үшін тек перспективасы мол, келешегі жарқын салаларды таңдайды.

JPMorganChase АҚШ-тағы, әлемдегі ең ірі банктің бірі ретінде алдағы 10 жылда 1,5 трлн доллар инвестиция құятынын қараша айында жариялады.

Сөйтіп, негізгі 4 бағытты таңдаған. Олар ары қарай 27 салаға бөлінеді:

- Озық технология: робототехника, фармакология, аса маңызды минералдар

- Қорғаныс, аэроғарыш өндірісі: байланыстың жаңа буыны, мүлде жаңа дрондар

- Энергетикалық тәуелсіздік: күн, атом, жаңа батареялар

- Стратегиялық технология: ЖИ, киберқауіпсіздік, кванттық есептеу

Арғы жағындағы 27 саланы оқысаң, мына банк әлемдік соғысқа дайындалып жатқан сияқты көрінеді. Себебі гипердыбыстағы ракета, 6G байланыс, ғарыш, адамсыз технология деп кете береді. Энергия көздерінің түр-түрі.

Екінші жағы бұл салалар 4-5 жылда дамыған елдер үшін аса қажет секторға айналмақ. Яғни, салған ақша қайтады. Сондай-ақ банк тек ақша табу үшін ғана емес, ұлттық қауіпсіздік тұрғысынан да 1,5 триллион доллар инвестиция салмақ.

Осындай құжаттар “мемлекет қай жаққа қарай даму керек”, “экономиканың қай бағыттарын дамыту керек” деген сұраққа жауап береді. Себебі JPMorganChase 1,5 трлн ақшасын салу үшін талай терең зерттеу, есеп-қисап жүргізді деп ойлаймын.

Nurmukhamed Baigarayev

Thai AirAsia X Алматы – Бангкок тікелей рейстерін іске қосады: визасыз*

kerey.kz — Tue, 23 Sep 2025 07:01:25 +0000

Тайландтың сан қырлы дәмдерімен, бояуларымен және мәдениетімен танысыңыз — бір бағытқа 199 USD-ден басталады

Алматы, 2025 жылғы 8 қыркүйек – Thai AirAsia X Алматы (Қазақстан) мен Бангкокты (Тайланд, Дон Муанг әуежайы) байланыстыратын жаңа әуе бағытының іске қосылуын қуана хабарлайды. Енді қазақстандық саяхатшылар қысқы маусымда жайлы әрі қолжетімді бағамен жылы самалға бөленген, күн шуағымен нұрланған әрі жарқын өмірімен танымал Бангкокқа ұша алады.

Жаңа рейс 2025 жылғы 1 желтоқсаннан бастап аптасына төрт рет – дүйсенбі, сәрсенбі, жұма және жексенбі күндері орындалады. Ұшулар сыйымдылығы 367 жолаушыға арналған кеңфюзеляжды Airbus A330 ұшағымен жүзеге асырылады. Іске қосылуына орай Thai AirAsia X бір бағытқа 199 АҚШ долларынан басталатын арнайы промо-тарифті ұсынуда. Билеттерді 2025 жылғы 8–21 қыркүйек аралығында, 2025 жылғы 1 желтоқсан мен 2026 жылғы 28 наурыз аралығындағы ұшуларға, AirAsia MOVE қосымшасы, ресми AirAsia сайты, сондай-ақ турагенттіктер және онлайн брондау қызметтері арқылы сатып алуға болады.

Thai AirAsia X бас директоры Паттра Бусаравонгсе ханым келесіні атап өтті:
«Бұл – біздің Орталық Азияға жасаған алғашқы қадамымыз және Thai AirAsia X үшін жаңа, қызықты кезеңнің бастауы. Тікелей рейстер Алматы мен Бангкок арасындағы сапарларды бұрынғыдан да қолжетімді етіп, шынымен де тиімді бағамен ұсынатын болады. Бангкок – бірегей мәдениетімен, ойын-сауықтарымен, шопингімен және әлемдік деңгейдегі қонақжайлылығымен танымал таңғажайып қала. Біз оны Қазақстан саяхатшылары үшін жақындата түскенімізге қуаныштымыз».

Тайланд астанасы Бангкок – дәстүр мен заманауилықтың тамаша үйлесімі, жанданған көшелері, дәмді тағамдары және бай мәдени мұрасымен танымал әлемдегі ең жарқын қалалардың бірі. Сондай-ақ, AirAsia компаниясының кең ішкі және халықаралық желісі арқылы туристер Бангкоктан Тайландтың Пхукет, Краби және Чиангмай сияқты танымал демалыс орындарына оңай жете алады.

Қазіргі уақытта Thai AirAsia X тоғыз Airbus A330 ұшағынан тұратын паркті пайдалана отырып, Бангкоктан (Дон Муанг) Токиоға, Осакаға, Нагояға, Саппороға (Жапония), Сеулге (Оңтүстік Корея), Шанхайға (Қытай), Делиге (Үндістан) және енді Алматыға (Қазақстан) тікелей рейстерді жүзеге асырады.

Ескертпе

*Тайландқа визасыз немесе келгеннен кейін виза алу құқығы бар елдер мен аумақтардың тізім

Астанада 2025 жылғы киножобалар питчингінің жеңімпаздарымен кездесу өтті

kerey.kz — Tue, 23 Sep 2025 06:40:37 +0000

Астанада «Ұлттық киноны қолдау мемлекеттік орталығының» Басқарма төрағасы Құрманбек Жұмағали 2025 жылғы питчинг сынынан сүрінбей өткен ашық конкурс жеңімпаздарымен кездесті. Іс-шара дөңгелек үстел форматында өтіп, оған Сараптамалық кеңес мүшелері мен Орталық мамандары қатысты. Жиында отандық киноиндустрия алдында тұрған басты міндеттер мен басым бағыттар талқыланды.

Биылғы байқауға жалпы 444 өтінім тіркелді. Соның ішінде 16 жоба мемлекеттік қолдауға лайық деп танылды. Олардың қатарында үш дебюттік жұмыс және Тайландпен бірлескен киножоба бар. Бұл қазақстандық авторлардың халықаралық ынтымақтастыққа дайын екенін және шетелдік әріптестермен байланысын нығайтып отырғанын көрсетеді.

Кездесу барысында Орталықтың басқарма төрағасы Құрманбек Жұмағали – «Сапалы фильм түсіру – басты талап. Конкурста жеңіске жеткен жоба жетекшілерінің кино өндірісінің алғашқы сатысынан бастап, экран арқылы көрерменге жету кезеңіне дейін әр қадамы мен жоспары нақты болуы тиіс. Яғни өндірістік процестен бастап, маркетинг пен дистрибуцияға, халықаралық кинонарыққа шығу жолдарына дейінгі іс-шаралар жүйелі түрде ұйымдастырылуы шарт. Түсірілетін фильмдерде ұлттық құндылықтарды дәріптеу, мемлекеттік тілдің мәртебесін күшейту, отансүйгіштік пен мәдени мұраға деген құрметті насихаттау маңызды» - екендігін атап өтті.

Мұндай кездесулер мемлекет, сарапшылар және шығармашылық ұжымдар арасында ашық диалог орнатуға мүмкіндік беріп, отандық киноөндірістің дамуына және қазақстандық киноның ілгерілеуіне ықпал етеді.

«Қайрат»-«Реал» матчының билет бағасы белгілі болды

kerey.kz — Mon, 15 Sep 2025 13:51:49 +0000

«Қайрат» футбол клубы UEFA Чемпиондар лигасының топтық кезеңінде өз алаңындағы матчтарға, соның ішінде «Реалға» қарсы ойынға билеттерді сату тәртібі мен мерзімдерін түсіндірді.

«Қайрат» клубының ресми сайтында хабарланғандай, «Қайрат»-«Реал Мадрид» матчы үшін билеттер 23 қыркүйекте Алматы уақыты бойынша сағат 17:00-де сатылымға шығады. Бір ЖИН-ге бір адам ең көп екі билет ала алады, ал деректер сатып алу кезінде де, стадионға кіргенде де қатаң тексеріледі.

Билет бағасы: 30 000 – 250 000 теңге аралығында болады.

Айта кетейік, бұған дейін «Қайрат» – «Реал» матчының билеттер бағасы 75 мың мен 250 мың аралығында болатыны жарияланған еді.

Алматылық клуб өз алаңында «Реалды» (30 қыркүйек), «Пафосты» (21 қазан), «Олимпиакосты» (9 желтоқсан) және «Брюггені» (21 қаңтар) қабылдайды.

Алматылық “Қайрат” пен мадридтік “Реал” 30 қыркүйекте Алматыда ойнайды

kerey.kz — Mon, 01 Sep 2025 17:49:04 +0000

“Слован” командасының қақпасына гол соққаннан кейінгі сәт. Дастан Сәтпаев (сол жақта). “Қайрат” футбол клубының парақшасы. 6 тамыз 2025 жыл.

Алматылық “Қайрат” пен мадридтік “Реал” 30 қыркүйекте Алматыда ойнайды. Матч кестесі турнирдің ресми сайтында жарияланды.

Алматының “Қайрат” командасы чемпиондар лигасының негізгі кезеңіне шықты

“Қайрат” футбол командасының мүшелері жеңісті тойлап жатыр. 26 тамыз, 2025 “Қайрат” фк Instagram парақшасынан алынған скриншот.

Футболдан Алматының “Қайрат” командасы Еуропа Чемпиондар лигасының негізгі кезеңіне шықты. Іріктеу кезеңінің плей-офф кезеңінде “Қайрат” Шотландияның “Селтик” командасын пенальти сериясы арқылы жеңді.

Азат Еуропа / Азаттық радиосы

Миллиардер Билл Гейтс бар байлығын Африка елдеріне аудармақ

kerey.kz — Wed, 04 Jun 2025 09:06:28 +0000

Microsoft компаниясының негізін қалаушы және әлемдегі ең бай адамдардың бірі саналатын Билл Гейтс өзінің байлығын қайда жұмсайтынын ресми мәлімдеді.

Кәсіпкер Африка елдеріндегі денсаулық сақтау, білім беру және кедейлікпен күрес салаларына шамамен 200 миллиард доллар инвестиция салуды жоспарлап отыр.

«Жуырда мен өз байлығымды 20 жылдың ішінде толықтай тарату жөнінде шешім қабылдадым. Қаражаттың басым бөлігі осы жерде, Африкада, түрлі мәселелерді шешуге көмектесуге бағытталады», – деді Билл Гейтс өзінің қорымен бірлескен баспасөз мәслихатында.

Басты басымдықтар:

– инфекциялық аурулармен күрес (соның ішінде безгек, туберкулез, ВИЧ);

– ана мен бала денсаулығын жақсарту;

– ауылдық аудандардағы білім беру сапасын арттыру;

– таза ауызсу мен санитария инфрақұрылымын дамыту;

Билл Гейтс: «Бұл – қайырымдылық емес, бұл – инвестиция. Африка елдерінде әлеует зор. Егер біз қазір қолдау білдірсек, болашақта бұл өңір әлемнің дамушы локомотивіне айналуы мүмкін».

Қор Эфиопия, ОАР, Кения, Нигерия және Сенегал сияқты елдерде өкілдіктер ашып, көптеген жобаларды жүзеге асырып келеді.

Айта кетейік, Билл және Мелинда Гейтс қоры соңғы 20 жылда денсаулық сақтау мен білім беру салаларына 50 миллиард доллардан астам қаржы құйған. Бұл жаңа бастама — олардың ең ауқымды жобасы болмақ.

Билл Гейтс атап өткендей, Африка елдерінің дамуы адам капиталын ашуға байланысты. Ол бастапқы медициналық көмектің маңызын, жүкті әйелдер мен балалардың жағдайын жақсартудың қажеттігін атап өтті. Сонымен қатар Гейтс Африка елдерінің жасанды интеллектті негізгі мәселелерді шешу үшін енгізуге талпынысын жоғары бағалады.

Қайырымдылық қоры өз жұмысын 2045 жылдың 31 желтоқсанында тоқтатуды жоспарлап отыр. Алдағы 20 жыл – Билл Гейтс қоры үшін шешуші кезең болмақ.

zhasalash.kz

Қақпаннан босаған Көк бөрі.

kerey.kz — Mon, 12 May 2025 06:46:30 +0000

Олжас Бектенов үкіметі «экономикалық ғажайыпқа» бір табан жақындай түсті

Биылдың төрт айы бойынша Қазақстан «орта табыс тұзағынан» құтылып отыр. Егер осы көрсеткішті жыл аяғына дейін ұстай алсақ, онда мұнай бағасы құлаған уақытта ішкі жалпы өнімді 6 пайызға өсіре алған «феноменалды экономика» иесі атанамыз.

Бізге мұнай көмектеспесе, өсім ненің есебінен келді?

2025 жылғы қаңтар-сәуір аралығында Қазақстан экономикасының өсуі 6% болды. Ең мықты импульсті көлік және тасымал саласы беріп отыр. Осы сала 22,4 пайызға өскен. Біз жаңа темір жолдарын пайдалануға беру арқылы теміржолдағы жүк тасымалын жақсы арттырғанбыз. Яғни көбірек жүк таси бастадық. Бұл еліміздің транзиттік логистикалық бизнесті жақсы жолға қойғанын байқатады. Онымен қатар, транзиттік құбыр арқылы шикізат тасуды да жақсы дамыттық.

Тасымалдан кейін қатты өскені – құрылыс саласы. Ондағы нақты жұмыс көлемінің индексі 16,2 пайызға артқан. Құрылыс тоқтап тұрған жоқ. Көптеген өңірлерде нысандар бой көтеріп келеді. Құрылыстың мультиәсері ауқымды екенін ескерсек, осы саланың дамуы отандық материал өндірісіне де қолдау көрсетуде.

Біз үшін шикізаттық экономикадан кетіп, мұнайға деген тәуелділіктен құтылудың негізгі мүмкіндігін өңдеу өнеркәсібі ғана бере алады. Өңдеу саласындағы өсім 7,2% болды. Оның ішінде тамақ өнімдерін өңдеу 12%-ға, темекі өнімдерін шығару 26,3%-ға, химиялық өнімдерді өндіру 11,2%-ға және машина жасау 11,2%-ға артып отыр.

Химияда жақсы өсуімізге әлемдік алпауыт Henkel компаниясының өз кеңсесін Ресейден Қазақстанға көшіруі кәдімгідей ықпал етті. Алпауыттың Қонаев қаласындағы химия зауыты өндірістік қуатын артырып, қазіргі таңда Қазақстанда шығарылған өнім бүкіл Орталық Азия мен Кавказды қамтып отыр.

Темекіде Филипп Моррис Алматы облысындағы зауытында IQOS стиктерін өндіре бастады. Дәл осы Алматы облысында әлемдегі төртінші ірі ойыншы KT&G өз зауытын ашып, жұмысқа кірісіп кетті.

Олжас Бектеновтың дәуірінде Қазақстан мұнайға деген басы бүтін тәуелділіктен ақырындап құтыла бастаған сияқты. Біз 30 жыл бойы «осыны неге істемеске» деп келдік. Енді мұнай ғасырының аяқталуына деген дайындығымызды жалғастыра беру қажет. Жақын жылдары біздің экономикалық құрылымда шикі мұнай үлесін 15 пайыз деңгейіне дейін түсіре алсақ, шикізаттық бағыттан өңдеуші бағытқа трансформацияны сәтті аяқтадық деп есептей аламыз. Бірақ ол үшін әлі көп шаруа тындыру қажет.

Айбар Олжаев

Қазақ жастары бүгінде жаппай орыстану процесін бастан кешуде.

kerey.kz — Sun, 06 Apr 2025 19:00:52 +0000

Қазақ жастары бүгінде жаппай орыстану процесін бастан кешуде. Бала-бақшадан бастап, мектеп, жоғары оқу орны, еңбек мекемелерінің барлығы негізінен орыс тіліне көшуде. Өз еркімен емес, әділетсіз биліктің ұзақ жылғы солақай саясатының арқасында. Көшеде, кеңседе, дүкенде, көлікте, қоғамдық орында қазаққа қазақ орысша сөйлемесең немесе ұлтты сақтау керек деген жауапкершілік жүгін ұстанып, сенімен орысша сөйлесіп тұрған қазаққа қазақша сөйле деп ескерту жасасаң болды, бітті, бәле-жалаға қаласың. Заң да, оны орындаушы полиция, прокуратура, сот та орысқұлды қолдайды, ұлтқа жаны ашыған қазақты мүлде қорғамайды.

Бұл қандай әділеттілік?! Мемлекеттік тілді, мемлекеттік қауіпсіздікті жекелеген адам емес, осыған жауапты мемлекеттік құрылымдар қорғауы керек қой. Жеке адам емес, ең алдымен билік қорғауы керек.

Қазақ жеке тәуелсіз мемлекет болып тұрса да, Ресей империясының қол астындағы татар, башқұрт, якут, тува халықтарының кебін киіп, жаппай орыстану дертіне ұшырау үстінде.

Мынау алмағайып заманда қазақты ұлт ретінде сақтап қалу – әрбір қазақ азаматының қасиетті міндеті.

Мынау азғын қазақ жігітінің ой-санасы адасқан. Ол осы “толеранттық” ұстанымы арқылы ұлттық құндылығымызды аяққа таптап, өзге жұрттың тіліне жанашыр боп шықты. Қазіргі биліктің мемлекеттік мүддеге сатқын саясатына сай келетін ұстаным ғой бұл. Бұл позиция – арсыз-ұятсыз, ұлты үшін жауапсыз, мәңгүрттік саяси позиция.

Біздің биліктің басындағы адамдардың саяси позициясы тап осындай. Олар 34 жылдың ішінде осындай ұлттық мүддеге сатқын қазақтардың моделін көпке үлгі етумен болды. Олар мыңдап, миллиондап көбейді. Есесіне, қазақ тілімен бірге қазақ ұлтының келешегі барған сайын күңгірт, бұлыңғыр тартып, жар басына жақындап барады. Қазақ тілінің түбіне жететін тап осындай “толеранттық” позиция. Бұл оның жеке басына және орысшыл билікке өте жайлы позиция, ал қазақ халқының болашағына тасталған – ғаламат үлкен ядролық бомба.

Бұл орысқұл курьер жігітті маған қазақша сөйле деп (менің табалдырығымды басып тұрып) бұйырды деп ақталып және менің құқымды аяққа басты деп домалақ арыз жазып, өз қазағын жұмыстан қудырды. Соңғы елу жыл ішінде қазақтың орысша сөйлеген қазаққа қазақша сөйле деп ескерту жасауы ұлттық әдетке айналып кетті емес пе?! Ресей отарлау жүйесінің езгісінен ұлтын аман сақтап қалғысы келген адамның барлығы сөйтеді. Оған несіне ренжисің, арыз-шағым жазасың?Неге түсіністікпен қарап, бауырым-ау, байқамастан саған орысша сөйлегенім үшін кешір, мен де күнделікті өмірде қазақша сөйлеймін десең бітті ғой. Екеуің достасып тарайсыңдар.

Өз ұлтын сақтау үшін орыс отарынан шыққан грузин, украин, өзбек, қырғыз ұлтының өкілдерінің барлығы күні кешеге дейін жастарын орыстану процессінен құтқару үшін бір-біріне ана тіліңде сөйле деп ескерту жасаған. Тап осы жолдан өткен. Қазақтануға қайтудың бұдан басқа оңай жолы жоқ. Бұл – ұлттың бірін бірі түзейтін қоғамдық бақылауы ғой. Оның несіне ренжисің?! Қайта қуануың керек қой.

Қазақстанда қазақ тілін мемлекеттік тіл қылу үшін ең алдымен қазақ қазақпен қазақша сөйлесуі керек. Содан кейін өзге ұлт сендерден үлгі алады. Өкінішке орай, қазір азғын қазақ көбейіп, өзге ұлтқа жаман үлгі көрсетіп жүр.