Kerey.kz/Керей.кз » Алматыдағы атыс

Алматыдағы атыс нені байқатты.

kerey.kz — Mon, 18 Jul 2016 19:55:01 +0000

Бүгін Алматыда оқыс оқиға орын алды. Құқық қорғау мекемесіне баса-көктеп келген бөгде адам кіре берісте отырған кезекші полицейді жарақаттап, автоматын тартып алып кеткені хабарланды. Әлеуметтік желі арқылы тараған алғашқы ақпараттан кейін оқиға орнына шұғыл жеткенімізде Алмалы аудандық ішкі істер бөлімінің қоршауға алынғанын көрдік. Онан кейін Никольск базарының алдында машинасына оқ тиген куәгермен жолықтық. Куәгер жігіттің айтуынша оқиға болғанына бірнеше сағат болғанымен бірде-бір құқық қорғау қызметкері келмепті. Оқиғаны көзімен көрген сол жерде тұрған сатушыларда бірдеңе деуге қорқады. «Байқа, ертең келіп алып кетеді» деген өзара әңгімелеріне қарап олардың әлдекімдерден қатты сескенетінін бірден аңғаруға болады.
Оқиғадан кейін үш сағат өткенде барып ресми ақпараттар жария бола бастады. Бірақ сол мезетте, яғни оқиға орнында жүрген Алматы қалалық ішкі істер бөлімі баспасөз қызметінің өкілдерін көзімізі шалды. Ақпарат бермек түгілі мойын бұруға мұршалары келмей кетіп қалды. Тек қарулы күш өкілдерінің бір-біріне хабарлауынан» ұстау операциясының» жалғасып жатқанын түсіндік. Ал әлеуметтік желіні кезген «Сайранда қырғын болып жатыр екен», «Бірінші Алматы вокзалына жарылғыш зат қойылыпты» «Сауда үйінде пәлен адамды кепілге алыпты» іспетті жалған ақпараттар онсыз да көңіліне қорқыныш ұялаған Алматы жұртын одан әрі қорқыта түсті. Алматы жұрты кімге сенерін білмей дал болды. Телеараналар мен радиолардың профилактикалық жұмыс күні екенін ескерсек, ақпаратты әлеуметтік желі немесе сайттар арқылы таратып халықты тыныштандыруға, сақтық шарасын жасауға шақыруға болар еді. Мәселен, сол сәтте Азаттық сайтының фб-парақшасында тікелей транслация жүріп жатқан болатын. Сол арқылы ақ, Алматы жұрттшылығын тыныштандыруға болар еді. Бұған қарап құқық қорғау саласындағы ақпарат қызметінің дұрыс жұмыс ітей алмайтындығын, оқыс оқиға орын алған жағдайда халықпен байланыс орнатуға әлсіз екендігін аңғаруға болады.
Бір мезетте үш жерде орын алған, бірнеше адам зардап шеккен оқиға бұған дейін Алматыда орын алмағаны белгілі. Бұған дейін болған Ақкенттегі атыс немесе Қарғалдағы жарылыс басқа болатын. Ол кезде біздің құқық қорғау қызметкерлері оларды ұстауға барған еді. Ал бұлы жолы олар өздері келді. Тапа-тал түсте, Алматының ортасында орналасқан мекемеге басып кіріп, қаруды алып кетіп қалды. Куәгердің айтуынша, автоматын иығына асынып алған 20-25 жас мөлшеріндегі азамат өте салқынқанды. Асықпай, қорықпайды.Базар маңындағыларға мылтық кезеніп, жолды емін-еркін кесіп өтіп жүр. Сонымен қатар Мұқанов көшесінің Абаймен қиылысар тұсында да екінші жігіттің қару кезеніп, көшедегі көлікке кезеніп жүргенін видеодан көзіміз шалды. Айналдырған екі жігіттің алып мегаполис тұрғындарын осыншама әуреге салуы – біздің құқық қорғау саласының әлі де жетілмегенін аңғаруға болады.
Пысы: Таңертеңгі 11:00-де атыс басталды. Кешкі 17:00 мөлшерінде екінші шабуылшының ұсталғаны туралы бейресми ақпарат тарады.

Нұртай Лаханың facebook парақшаcынан алынды

Алматыдағы атыс: Күдіктілерді көргендер бар

kerey.kz — Fri, 26 Jun 2015 18:35:26 +0000

Оқиға куәгерлері кеше Алматыдағы базарда полициямен атысты деп хабарланған азаматтардың бұған дейін сауда-саттықпен айналысып келгенін айтады.

Азаттыққа бұл фотоны жіберген оқырман: «Жібек жолы» базарында полицияның күдікті екі адамды ұстау операциясы кезіндегі атыстан бүлінген көлік» деп сипаттайды.

Бейсенбі күні кешке Алматының Алатау ауданындағы «Жібек жолы» базарында полицияның күдікті екі адамды ұстау операциясы кезінде атыс болып, бір күдіктінің оққа ұшып қаза тапқаны хабарланған.

Азаттық тілшісі оқиға болған жерге – Алматы қаласындағы Райымбек даңғылының қаладан батыс бағытқа шыға берістегі тұсында тұрған «Жібек жолы» базарына бүгін таңертең барды.

Жұмыстарына енді келіп жатқан сатушылардың көбі кеше қандай оқиға болғанын білмейді. Олардың сөзіне қарағанда, базар кешкі сағат 5-тен өте жабыла бастайды, ал кешегі атыс кешкі сағат 6:30 шамасында болған.

Азаттық тілшісімен сөйлескен сатушылардың кейбірі оқиғаны сырттай көргенін айтады. Басым көпшілігі автокөліктің қосалқы бөлшектерін сатуға арналған «Жібек жолы» базарының шет жағында құрылыс материалдарын сататын бірер қатар бар. Сатушылардың сөзіне қарағанда, полиция мен белгісіз адамдардың арасындағы атыс осы қатарлардың алдындағы көлік қоятын тұрақта болған. Атыс кезінде базардағы кейбір сауда орындары әлі жабылып үлгермеген. Саудагерлер «алғашында фейерверк атылып жатыр деп ойлап жақындап бармақ болғанымызда арнаулы жасақ қызметкерлері қуып жіберді, атыс болып жатқанын кейін алыстан байқадық» дейді. Олардың сөзіне қарағанда атыс 15-20 минутқа созылған.

“Жібек жолы” базарындағы атыс болған орын. Алматы, 26 маусым 2015 жыл.

Оқиғаны сырттай көргендердің айтуынша, атыс кезінде полицияға қарсыласқандардың бірі осы жерде өлген, екінші қатты жараланып қолға түскен.

Атыс болды делінген жерде көлік әйнегінің сынықтары мен резеңке қолғап, тағы да басқа ұсақ-түйектер шашылып жатты. Бірақ түнімен жауған жаңбырдан кейін асфальт сумен шайылып кеткен.

Сатушылардың бірінің сөзінше «полицияға қарсыласқан» делінген екі жігіт «Жібек жолы» базарындағы сатушыларға калькулятор, қаламсап секілді ұсақ-түйек заттар әкеп өткізіп жүрген.

– Біздің білуімізше, олар – Алматы облысы Шелек ауданының жігіттері. Біздің қатарымызда құрылыс материалдарын сататын Ұзынағаш ауылының азаматына келіп, әңгімелесіп тұратын. Үшеуі де сақал қойған. Екі жыл бұрын «Береке» базарында да ұсақ саудамен айналысатын. Ол кезде сақалдары жоқ еді, – дейді аты-жөнін айтудан және видеокамераға сөйлеуден бас тартып, тек диктофонға сөйлеуге келіскен сатушы әйел.

Оның сөзіне қарағанда, көршілес контейнердегі ұзынағаштық жігіт соңғы аптада бір сағаттай ғана сауда жасап, әлгі екі жігітпен бірге кетіп қалып жүрген. Сатушы әйел күнара келіп тұратын екі жігіттің кеше кешке дейін базарда кідіріп қалғанын айтады. Полицияның арнаулы жасағы келгенде базар ішіндегі автотұрақта тұрған Daewoo Damas маркалы көлікте екі адам отырғанын көргенін айтқан куәгер «олардың нақты кімдер екенін, қолдарында қару болған-болмағанын білмейтінін» мәлімдеді.

“Жібек жолы” базарындағы атыс (оқырман жолдаған видео)

Азаттық тілшісі жарақаттанған адамдар жеткізілетін Алматы қалалық жетінші клиникалық ауруханаға хабарласқанда, тіркеу бөлімі кеше ауруханаға оқ тиіп жараланған ешкім түспегенін айтты. Ал Алматы қалалық ішкі істер департаментінің (ІІД) баспасөз қызметі телефон тұтқасын алмады.

ІІД сайтындағы дерекке қарағанда, «кәсіпкерді тонауды жоспарлады» деген күдікке ілінген екі адам – Шығыс Қазақстан облысының тумалары. Олар кеше кешке полицияға оқ атып қарсылық көрсеткен. Атыс кезінде күдіктілердің бірі оққа ұшып қайтыс болған, екіншісі тірідей қолға түскен. ІІД дерегінше, күдіктілер мінген көліктен «карабин, револьвер мен травматикалық тапанша табылған». Департамент бұл оқиғаға қатысты тергеу-тексеру шарасы жүріп жатқанын айтты.

Асылхан МАМАШҰЛЫ

Азаттық радиосы