Kerey.kz/Керей.кз » Атамбаев

Омурбек Бабанов Атамбаевтың берген уәдесі туралы айтты

kerey.kz — Sun, 15 Oct 2017 12:07:07 +0000

Қырғызстан президент сайлауына түсіп жатқан кандидат Омурбек Бабановтың (оң жақтан екінші) дауыс беріп жатқа сәті. Бішкек, 15 қазан 2017 жыл.

Қырғызстан президент сайлауына түсіп жатқан кандидат Омурбек Бабанов сайлау кезінде болған заң бұзу оқиғалары жөнінде мәлімдеме жасады. Ол сайлау әділ әрі ашық өтті деп санамайтынын айтты.

Бабанов «Кандидаттығымды ұсынбай тұрып президентпен ақылдасқан едім. Ол батасын беріп, “Иә, президент сайлауына түс. Біз өз кандидатымызды ұсынамыз, сен де қатыс. Жеңген адам президент болсын” деген. Куәлер бар. Ол сайлау әділ өтеді деген уәде берген. Бірақ тең жағдай жасалмады. Кейінгі аптада Алмазбек Шаршенович Атамбаевқа ақпаратты дұрыс бермеген. Қырғызстанның ұлттық қауіпсіздік комитеті мен милиция оны жалған ақпаратпен адастырып отыр. Мен оның бүгінгі сөздеріне қатты қапа болдым» деді.

Қырғызстанда бүгін президент сайлауы өтіп жатыр.

Президент Алмазбек Атамбаев сайлау учаскесінде дауыс беріп шыққаннан кейін журналистер сауалдарына жауап берді. Ол «Тура бір жарым ай бұрын Бабановтың маған күйе жаға бастағанын байқадым. Мені “аға” деп жүретін Бабанов. Бабановтай мені мақтаған адамды көрмедім. Сіздің жолыңызды мен ғана жалғастырам деп жүретін Бабанов аяқастынан “олар басқа жолмен кетіп барады” деп қалыпты. Ол ол ма, ашық айтайын, маған Бабановтың атынан бір олигарх келіп 20 миллион доллар ұсынды. Мен оған, қымбаттым, сатылмайтын заттар бар дедім» деді.

Сооронбай Жээнбеков: Біз әділ сайлау үшін күрестік

Қырғызстандағы президент сайлауына түсіп жатқан кандидат Сооронбай Жээнбеков.

Қырғызстандағы президент сайлауына түсіп жатқан кандидат Сооронбай Жээнбеков Бішкектегі №1327 сайлау учаскесінде дауыс берді.

Дауыс бергеннен кейін журналистер сұрағына жауап берген ол өзінің жеңетініне сенімді екенін айтты.

- Құдай қаласа, халық қолдаса, бірінші турда ма, екінші турда ма – біз жеңеміз! Нәтижені күтейік. Біз әділ сайлау үшін, нәтижені алдын ала ешкім білмеуі үшін күрестік, – деді Жээнбеков.

Сооронбай Жээнбеков қазақ-қырғыз шекарасындағы ахуал туралы сауалға да жауап берді. Ол «алыс туыстан, жақын көрші артық» екенін айтты.

- Қазақстан – бауырлас ел, бір-бірімізге құрметпен қарауымыз керек. Мемлекеттер мен олардың басшылары бірін-бірі сыйлап тұрған жағдайда барлық мәселені шешуге болады, – деді ол.

Сөзінің соңында Сооронбай Жээнбеков Қырғызстан президенті Алмазбек Атамбаевтың бағытын жалғастыратынын айтты.

Қырғызстанда президент сайлауы өтіп жатыр. Таңғы сегізде басталған сайлау кешкі сегізде аяқталдады.

Азат Еуропа / Азаттық радиосы

Атамбаев көлік апатынан көз жұмған вице-премьердің өліміне күдікпен қарады

kerey.kz — Mon, 09 Oct 2017 04:15:03 +0000

Қырғызстан президенті Алмазбек Атамбаев көлік апатынан көз жұмған вице-премьердің өліміне күдікпен қарады. Бұл туралы NUR.KZ порталы kaktus.media сайтына сілтеме жасап хабарлайды.

АЛМАЗБЕК АТАМБАЕВ. ФОТО: AZATTYQ

Атамбаев мемлекеттік марапаттарды табыстау рәсімінде вице-премьер-министр Темір Жұмақадыровтың қазасына қатысты пікір білдіріп, оның жақындарына көңіл айтты.

“Темір Жұмақадыров – менің сүйікті шәкірттерімнің бірі, ол небәрі 38 жаста еді. Мен бұл адамды еліміздің басшыларының бірі ретінде көретінмін. КамАЗ неліктен қарсы бетке шықты? Сайлауға бар-жоғы бір апта қалды. Мен бұл жайтқа қатысты үнсіз қала алмаймын. Билік сайлауды лас жүргізуде деген сыбыс тарап жатыр. Менің жолдастарымның дені сайлау әділ өтуі үшін күресте зардап шекті. Кейбірі қаза болды. Мен де Темір Құрманғазұлы секілді өліп кетпесем, әркімнің сазайын тарттырамын. Алайда сайлау әділ өтеді”, – дейді Қырғызстан президенті Алмазбек Атамбаев.

Еске салсақ, вице-премьер Таласқа барар жолда жол апатына түскен болатын. КамАЗ жүргізушісі жолдың қарсы бетіне шығып кетіп, соқтығысу салдарынан Жұмақадыров қаза болған.

Дереккөз: Nur.kz

Бішкекте құлаған ұшақта Атамбаевтың «АЛТЫНЫ» болған

kerey.kz — Mon, 06 Mar 2017 08:06:37 +0000

Қырғызстандағы «Атамекен» парламенттік фракциясының лидері Өмірбек Текебаев «президент Алмазбек Атамбаевтың Кипр офшорындағы мүлкін тапқаны» үшін ұсталды. Бішкекте шұғыл баспасөз мәслихатын өткізген «Атамекен» партиясының заңгері Талайгүл Тоқтақұнова осылай деді. Заңгердің сөзінше, Текебаев Кипрге барған сапарында Бішкекте апатқа ұшыраған «Боинг-747» жүк ұшағына қатысты маңызды құжаттар алған.

Алайда Текебаев оны жариялап үлгермеген. Себебі құқық қорғау органдары осы құжат таралып кетпес үшін оппозицияшыл саясаткер Тәкебаевты әуежайда ұшақтан түскен жерінен ұстап, оған тіпті адвокатын да жібермеген. Тоқтақұнованың мәлімдеуінше, Текебаев тапқан құжатта 16 қаңтар күні «Манас» әуежайы маңында апатқа ұшыраған ұшақ Алмазбек Атамбаев пен оның әйеліне тиесілі болғаны және онда қымбат бұйымдар мен асыл тастар тиелгені айтылған.
Заңгер айтқан деректі бұған дейін ақпанның 13-і күні Өмірбек Текебаевтың өзі де мәлімдеп, «президент Алмазбек Атамбаевтың Кипр офшорында мүлкі бар» деген болатын.
Наурыздың бірі күні өткен парламент жиынында депутаттар әріптестері – «Ата мекен» фракциясының жетекшісі Өмірбек Текебаевтың ұсталуына көз жұмып қарай алмайтындарын, жалпы отырыста осы мәселені талқылауды талап етті. Көп кешікпей мемлекеттік ұлттық қауіпсіздік комитетінің төрағасы мен бас прокурор депутаттардың алдында тұрды. Мемлекеттік ұлттық қауіпсіздік комитеті төрағасының айтуынша, Текебаев ресейлік компания өкілдерінің «Альфа Телеком» акцияларын сатып алу кезінде делдалдық жасағаны үшін бір миллион доллар пара алған деген күдікке ілінген.
Алайда ресми орынның бұл сөзіне Текебаевтың жақтастары сенбей, істі саяси тапсырысқа санап, түрлі шерулер өткізіп жатыр. Сарапшылар қырғыз көктемі биыл тағы шерумен басталғанына, соңы үлкен саяси тартысқа ұласарына алаңдап отыр.

zhasalash.kz