Kerey.kz/Керей.кз » Мәулен Әшімбаев

Депутат Мәулен Әшімбаев Орталық Азияда жаңа одақ құруды ұсынды

kerey.kz — Wed, 15 Mar 2017 11:27:42 +0000

Орталық Азияда жаңа өңірлік одақ құру мәселесін қарау керек. Қазақстан бұл одақта жетекші орынға ие болып, Орталық Азия елдеріне ресми гуманитарлық көмек көрсетер еді. Өйткені өңірдегі теріс ықпалдардың аймақтағы елдерге, соның ішіндегі Қазақстанға да кесірін тигізуі мүмкін. Мұндай бастаманы бүгін ҚР Парламентінің Мәжілісіндегі үкіметтік сағатта төменгі палатаның халықаралық істер, қорғаныс және қауіпсіздік комитетінің төрағасы Мәулен Әшімбаев көтерді.

Оның айтуынша, өңірде трансшекаралық өзендердің ресурстарын пайдалану мен өзге де мәселелер бойынша жиналып қалған проблемалар бар. Ал өңір елдерінің өзара бірлікке келуінен басқа жолы жоқ.

«Сол себепті қазір Орталық Азия елдерінің қауіпсіздігін қамтамасыз ету үшін не істеу керектігін ойлау маңызды. Өңірдегі көптеген проблемалар өзара түсіністік арқылы шешілуі керек. Мәселен, трансшекаралық өзендердің ресурсын пайдалану, экологиялық мәселелердің шешілуі, өңірдің транзиттік-байланыс әлеуетін арттыру, терроризм және экстремизмге қарсы күрес мәселелері. Сол себепті өңірдегі ықпалдастықты арттырып, жаңа деңгейге көтеру керек», — деді депутат.

Депутаттың пікірінше, аймақта жаңа өңірлік одақ құруға да қажеттілік бар.

«Біздің пікірімізше, Орталық Азия елдерінің арасындағы байланысты ретке келтіру керек. БҰҰ Қауіпсіздік кеңесі аясында осы мәселенің көтерілуі керек. Өз кезегінде ҚР СІМ мен өзге де тиісті мемлекеттік органдар ортаазиялық елдердің өзара қатынасының қалай дамуы керектігі туралы сараптап, ұсыныс жасауы керек», — деді мәжілісмен.

Сонымен қатар, Қазақстанның шетелге гуманитарлық көмек көрсетуінің маңыздылығына тоқталды.

«Елімізде проблемалар бар кезде өзге мемлекеттерге сыртқы көмек жасаудың қажеттігі жоқ деген пікірдің бар екенін білемін. Осы ретте дамуға ресми көмек жасау — ол қайырымдылық емес, яғни басқа елдерге бірреттік көмекке жатпайды. Бұл өз кезегінде нақты сыртқы саяси мақсаттарға жету үшін икемді тетік болып табылады. Экономикалық ынтымақтастық және даму ұйымының көптеген елдері осындай саясатты жүргізіп келеді. Сондықтан да дамуға ресми көмек жасау қадамдарын терең ұғынып жасап, сыртқы саясаттың басымдықтарына нақты орайластыру керек», — деді Әшімбаев.

Осы орайда ол гуманитарлық көмек жасауды қысқарту дұрыс емес екенін, егер де көршілес елдер проблемалар шырмауынан шыға алмай жатса, ешбір мемлекет ұзақ мерзімді дамудан үміттене алмайтындығын жеткізді.

«Орталық Азия тұрақсыздықтың, заңсыз көші-қонның, лаңкестіктің аумағына айналса, онда бұның салдары еліміздегі жағдайға ықпал етпей қойматыны анық», — деді депутат.

«ЕГЕМЕН ҚАЗАҚСТАН»

Мәулен Әшімбаев Ресей депутатының “орыс жері” жайлы сөзіне жауап берді

kerey.kz — Mon, 06 Feb 2017 05:50:37 +0000

Мәжілістің халықаралық істер, қорғаныс және қауіпсіздік комитетінің төрағасы Мәулен Әшімбаев Ресей парламентінің депутаттары Қазақстанның тәуелсіздігі және территориялық тұтастығы мәселелеріне қатысты пікір білдіргенде абай болуы тиістігін мәлімдеді деп хабарлады жергілікті агенттіктер. Әшімбаев мұны Ресей мемлекеттік думасының депутаты Павел Шперовтің қаңтардың 26-сы парламенттік дөңгелек үстел отырысында жасаған мәлімдемесіне байланысты айтты. Шперов ол отырыста Ресейдің “ұлы ел” екенін айтып, “Дүниежүзіндегі өз мүддемізді қорғауымыз қажет” деген. Ол “Таяу шетел деп жүрген елдерде әзірге мұндай мүмкіндік бар. Қазақстандағы орыс отандастырымызды диаспора деу қате, өйткені олар отырған жер – уақытша шетел иеленген біздің жеріміз. Мәңгілік шекара жоқ, біз әлі Ресей шекарасына қайта ораламыз және ол таяу уақытта жүзеге асады” деген еді.

“Шперовтің Қазақстан территориясына қатысты айтқан пікірін жөнсіз деп санаймын. Мұндай пікір Қазақстан мен Ресейдің стратегиялық әріптестік және одақтастық ұстанымдарына негізделген достық және тату көршілік қарым-қатынас ауанына сай емес” деген Әшімбаев.

Мәулен Әшімбаевтің сөзінше, Қазақстанның территориялық тұтастығы мен тәуелсіздігі мызғымайды және оның шекарасы халықаралық келісімдер арқылы анықталып, белгіленген. Комитет төрағасы Қазақстан-Ресей қарым-қатынасы 21-ғасырдағы тату көршілік және одақтастық туралы келісім мен Қазақстан-Ресей мемлекеттік шекарасы туралы келісімге негізделгенін айтады.

3 ақпанда Ресей сыртқы істер министрлігі Шперовтің сөзінен соң интернетте екі ел байланысының талқыға түсуіне байланысты Мәскеудің Қазақстанмен қарым-қатынасы бойынша сыртқы саясаты мәселелеріндегі ресми ұстанымын Ресей президенті, премьер-министрі, сыртқы істер министрі және уәкілетті тұлға ғана білдіре алады деп мәлімдеген. Азат Еуропа / Азаттық радиосы

Назарбаев Астана атауын өзгертуге қатысты пікірін айтты

kerey.kz — Thu, 24 Nov 2016 17:12:58 +0000

Бүгін Ақордада Нұрсұлтан Назарбаев модернизация бойынша ұлттық комиссияның кеңесінде Астана атауына өз атын кірістіру ұсынысына қатысты пікірін білдірді. Бұл туралы президенттің баспасөз қызметі хабарлады.

“Қай нәрсе болса соған “нұр”, “нұрлы “деген сөзді қосады. Бәрін менің атыммен байланыстырады. Мен бұл тақырыпқа бірнеше рет өз ойымды айттым. Барлығы мен бәр жерге нұрлы деп жазуға бұйрық беріп жатыр деп ойлайды. Кеше парламент Астана атауын менің есімімен атауды ұсыныпты. Мен мұндай ойды ешкімге айтқан жоқпын… Қазақстанның 25 жылдағы жеткен жетістігін мен жалғыз жасаған жоқпын. Сіздердің де (үкімет мүшелері – ред) қосқан үлестеріңіз көп. Парламентке декларация үшін рахмет, адам ретінде олардың айтқандары маған ұнады. Парламент жеке билік тармағы ретінде өз ойларын айтуға, шешу шығаруға құқылы. Бірақ елді мекендердің атын өзгертетін болсақ талқылап барып шешім шығарамыз” деді ол.

Назарбаев үкімет пен парламентке нақты істерді шешумен айналысу керектігін де айтты.

23 қарашада Астанада парламенттің біріккен отырысында мәжіліс депутаты Қуаныш Сұлтанов Астана атауын “Нұрсұлтан” немесе “Назарбаев” деп ауыстыруды ұсынған. Оның ұсынысын басқа да депутаттар қолдаған. Депутат Мәулен Әшімбаев бұл идеяны «дұрыс әрі маңызды» деп бағалады. Зағипа Балиева Астана атауын «Назарбаев» деп өзгертуді, Бақытгүл Хаменова «Елбасы» деген атауды құптайтынын айтты. Сенат депутаты Михаил Бортник «Астана-Елбасы» деген атауды ұсынды. Бұл ұсыныс баспасөзде жарияланған соң әлеуметтік желілерде наразы сипаттағы түрлі пікірлер айтылған.

Азат Еуропа / Азаттық радиосы