Kerey.kz/Керей.кз » Сирия

ҰҚК “Алматыда теракт ұйымдастырмақ болған” ДАИШ жақтаушысы қамалғанын хабарлады

kerey.kz — Sat, 14 Mar 2020 10:09:22 +0000

Ұлттық қауіпсіздік комитетінің ғимараты. Көрнекі сурет.

Қазақстан ұлттық қауіпсіздік комитеті Алматыда “теракт ұйымдастырмақ болды” деп күдікке ілінген ДАИШ (“Қазақстанда тыйым салынған, өздерін “Ислам мемлекеті” деп атайтын экстремистік топтың араб тіліндегі атауының қысқартылған нұсқасы – ред.) жақтаушысының қамалғанын хабарлады.

“Қамалған адам Наурыз мерекесін тойлау кезінде адамдар көп жиналатын орындарда теракт әзірлеуге тырысты деп күдікке ілінген. Тергеу амалдары кезінде одан екі граната тәркіленді. Оның үстінен “Терроризм” және “Экстремизм немесе терроризмді қаржыландыру” бабы бойынша қылмыстық іс қозғалған” делінген ҰҚК мәлімдемесінде.

Хабарламада бұдан басқа дерек айтылмайды.

Былтыр Алматы соты “қалада теракті ұйымдастырмақ болды” деп айыпталған Тәжікстанның жеті азаматын 12 мен 18 жыл аралығында бас бостандығынан айырған еді.

Азат Еуропа / Азаттық радиосы

БАҚ: Сирияда Ресей базасы атқыланып, әскери ұшақтар қирады

kerey.kz — Thu, 04 Jan 2018 06:52:38 +0000

Сирияның Хмеймим әуе базасында тұрған ұшақтар мен әскери көлік.

Сириядағы Ресейдің Хмеймим әуе базасында 31 желтоқсан күні минометтен атқылаудан кем дегенде жеті әскери ұшақ зақымданып, істен шыққан. Он шақты әскери қызметкер жараланған. Бұл туралы әскери және дипломатиялық ортадағы дереккөздеріне сілтеме жасаған ресейлік «Коммерсантъ» газеті хабарлады. Жараланғандардың сириялық, я ресейлік әскерилер екені айтылмайды. Ресей қорғаныс министрлігі әзірге бұл ақпаратқа комментарий бермеді.

Басылым ақпаратына қарағанда, атқылаудан төрт Су-24 бомбалаушы ұшағы, екі Су-35С истребителі мен бір Ан-72 әскери жүк ұшағы істен шыққан. Базаны радикалдық исламшылдар атқылады деген болжам бар. Хмеймим базасы Сирия үкімет әскерінің тылында орналасқан.

Ресейлік БАҚ пен ресми тұлғалар бұған дейін базаның 31 желтоқсан емес, 27 желтоқсан күні атқыланғанын хабарлаған. Ол кезде адам мен әскери техниканың зардап шеккені айтылмаған еді.

Бұған дейін Ресей қорғаныс министрлігі Сирияда 31 желтоқсанда әскери тікұшақ апатқа ұшырап, екі ұшқышы қаза тапқанын мойындаған болатын. Ресми ақпаратқа қарағанда, тікұшақ техникалық ақаудан апатқа ұшыраған.

11 желтоқсанда Хмеймим әуе базасына Ресей президенті Владимир Путин барып, ол жерде Сириядан Ресей әскерінің негізгі бөлігі шығарылатынын жариялаған.

Желтоқсанның соңында Ресей қорғаныс министрі Сергей Шойгу елден Ресей әскерилерінің негізгі бөлігі шығарылатынын және Хмеймим мен Тартустағы әскери базаларда тұрақты әскер құрылатынын хабарлаған. Ресейдің Сирияда қанша әскери күші бары және қанша шығынға ұшырағаны туралы ресми мәлімет әзірге жоқ. БАҚ-тың мәліметінше, 2017 жылдың өзінде ғана Сирияда кем дегенде 40 ресейлік әскери қызметкер қаза тапқан. Азат Еуропа / Азаттық радиосы

Сирия астанасында қарулы қақтығыс болды

kerey.kz — Mon, 20 Mar 2017 05:21:53 +0000

Сирия астанасы Дамаскінің шығыс бөлігінде наурыздың 19-ы күні көтерілісшілердің тұтқиылдан жасаған шабуылы көлемді қарулы қақтығыстарға ұласқан. Syrian Observatory for Human Rights ұйымының мәліметінше, оқиға Джобар ауданында екі автокөлікті жарып, бірнеше жанкештілік шабуылдан басталған. Бұдан соң қарулы адамдар Аббасид алаңы маңындағы бірнеше ғимаратты басып алып, Дамаскінің басқа бөліктерін зымыраннан атқылаған.

Сириялық баспасөз құралдары үкімет әскері қалаға түн ішінде жерасты тоннельдері арқылы кіріп алған «Әл-Қаида» террорлық ұйымымен байланысы бар топтың шабуылын тойтарды деп хабарлады.Мемлекеттік телеарна Джобар және Кабун аудандарында қақтығыстар болғаны туралы мәлімдеді.

Бірнеше күннен кейін Женевада БҰҰ-ның арағайындығымен Сириядағы жанжалды тоқтату жөнінде бейбіт келіссөздер басталуы тиіс. Сириядағы алты жылға созылған соғыс салдарынан 320 мыңнан астам адам құрбан болған.

Азат Еуропа / Азаттық радиосы

Астанада Сирия жөніндегі “техникалық” кездесу өтпек

kerey.kz — Sun, 05 Feb 2017 18:02:43 +0000

Сирия жанжалын реттеу бойынша техникалық кездесуге қатысушылар бүгін Астанада алдын ала кеңесулер өткізіп жатыр деп хабарлады Интерфакс-Қазақстан агенттігі. Ертең Астанада Сирия бойынша бірлескен жедел топтың отырысын өткізу жоспарланған. Иран, Ресей және Түркия делегациялары мен БҰҰ өкілі өткен жылғы желтоқсанның 29-ы күні жасалған келісімге сәйкес орнаған бейбітшілік тәртібін бақылауға қатысты мәселелерді талқылауға жиналмақ.

Бұған дейін қаңтардың 23-24 күндері Астанада өткен келіссөздер қорытындысы бойынша Иран, Ресей және Түркия ресми өкілдері Сириядағы атысты тоқтату тәртібін қадағалаудың механизмін құру туралы келіскен. Бірақ олар Сирияда алты жыл бойы жалғасып келе жатқан азамат соғысын саяси реттеу бағытында нәтижеге қол жеткізе алмаған еді. Мәскеу мен Тегеран президент Башар Асад үкіметіне, ал Анкара Асад билігіне қарсы күресіп жатқан оппозиция күштерінің бір бөлігіне қолдау білдіреді. Астанада қаңтарда өткен Сирия үкіметі өкілдерімен жанама келіссөздерге қатысқан Сирия оппозициясы сол жолы кездесуге қатысушылардың қорытынды мәлімдемесі көңілдерінен шықпайтынын айтқан.

Женевадағы Сирия бойынша бейбіт келіссөздердің жаңа кезеңі кезекті рет кейінге қалды. Ақпанның 1-і күні БҰҰ-ның Сирия бойынша арнайы өкілі Стаффан де Мистура келіссөздердің екі аптаға кейінге шегерілгені туралы хабарлап, бұл уақыт Сирия үкіметіне қойылған кейбір шарттарға қатысты ойланып-толғануға, ал оппозицияға бірлескен делегация құруға мүмкіндік береді деп санайтынын айтқан.

Сирия жанжалын реттеу бойынша Женевадағы келіссөздер бұның алдында 2016 жылғы сәуірде өткен. Азат Еуропа / Азаттық радиосы

Трамп Сирияда “қауіпсіздік аймағын” құру жоспарын жария етті

kerey.kz — Thu, 26 Jan 2017 09:43:10 +0000

АҚШ президенті Дональд Трамп өзінің АҚШ-қа келетін мигранттар ағынын тежеу жоспары аясында Сирияда босқындарға арналған “қауіпсіз аймақ” құрмақ ниетте екенін мәлімдеді. “Сирияда адамдарға арналған қауіпсіз аймақ құрам” деді Трамп ABS News телеарнасына берген сұхбатында. Ол Еуропа Одағының (ЕО) негізінен Сириядағы азаматтық соғыстан шыққан босқындар мәселесімен күресін саралап, осындай шешім қабылдағанын айты.

“Еуропа ол миллион адамның Германия мен басқа да елдерге келуіне рұқсат беріп, үлкен қателік жасады деп санаймын” деді Трамп сұхбатында.

АҚШ президенті Cирияда “қауіпсіздік аймағын” құруды “мұсылман елдерінен шыққан босқындар мен басқа да иммигранттардан төнетін терроризм қаупіне” қарсы тұру тәсілдерінің бірі деп білетінін айтты. Америкалық БАҚ Трамп айтқан “қауіпсіздік аймағы” туралы өкім миграциялық саясатты күшейту туралы өзге де жарлықтармен бірге шығуы мүмкін дейді. Трамп кеше Сириядан келетін босқындарды тежеу және Сирия, Ирак, Иран және басқа да мұсылман елдерінен шыққандарға виза беруді тоқтататын жарлықтар шығарған.

Reuters агенттігі “қауіпсіздік аймағы” туралы жарлықтың жобасын көргенін хабарлайды. Жобада мемлекеттік департамент пен Пентагон 90 күн ішінде Сирия мен оған территорияда елін тастап, қақтығыстың тоқтауын немесе үшінші елге ауысуды күтіп жатқан сириялықтар “қауіпсіздік аймағын” құру жобасын дайындауы қажет делінген.

АҚШ-тың бұрынғы президенті Барак Обама мұндай шараларға АҚШ-тың Сириядағы соғысқа бұрынғыдан да киліктіреді және Сирияда әуе шабуылын жүргізіп жатқан Ресей әскерилерімен қақтығысқа ұрындыруы мүмкін деген қауіппен қарсылық танытқан.

Трамп егер жоспарланған территорияда “қауіпсіздік аймағын” құруға шешім қабылдаса Обама ойлағандай кикілжің тууы мүмкін. Бұдан өзге, “қауіпсіздік аймағындағы” азаматтарды қорғау үшін әскер кіргізу қажет болады. Бұл – Сириядағы дағдарысқа килігудің қаржылық тұрғыдан да, адам ресурсы тұрғысынан да шығынын арттырады.

Азат Еуропа / Азаттық радиосы

Назарбаев БҰҰ Бас хатшысының Сирия бойынша арнаулы елшісі Стаффан де Мистурамен кездесті

kerey.kz — Mon, 23 Jan 2017 08:23:51 +0000

Нұрсұлтан Назарбаев БҰҰ Бас хатшысының Сирия бойынша арнаулы елшісі Стаффан де Мистурамен кездесті-деп хабарлайды Ақорда баспа сөз қызметі.

Кездесу барысында тараптар Сириядағы қақтығысты реттеу жөніндегі алдағы келіссөздер мәселесін талқылады.

Мемлекет басшысы Астананың келіссөздер өткізуге дайын екенін айтып, барлық қатысушылар үшін жағдай жасалғанын атап өтті.

– Мен Ресей, Түркия және Иран Президенттерінің Астанада келіссөздер өткізу жөніндегі ұсынысын қабыл алдым. Біз кездесудің жемісті өткенін қалаймыз. Қазақстан кездесуге қатысатын тараптардың бәрімен тең әрі сенімді қарым-қатынаста болғандықтан, келіссөздер қалыпты өту үшін барлық жағдай жасалады деп ойлаймын, – деді Қазақстан Президенті.

Нұрсұлтан Назарбаев Сирия мәселесі бүгінде Таяу Шығысты ғана емес, бүкіл әлемдік қауымдастықты алаңдатып отырғанын атап өтті.

– Тараптар да болып жатқан оқиғаларға біз сияқты алаңдаушылықпен қарап отыр деп үміттенемін. Сарапшылардың айтуынша, қақтығыс басталғалы 300 мыңнан астам адам қаза тапқан. Осының бәрі бізді бұл мәселені бейбіт жолмен ғана шешуге үміттенуге жетелейді, – деді Мемлекет басшысы.

Қазақстан Президенті БҰҰ-ның арнаулы елшісіне Астанадағы кездесу Женевадағы бейбіт келіссөздерге дайындық барысына елеулі ықпал ететінін айтты.

Стаффан де Мистура Нұрсұлтан Назарбаевқа Астанада келіссөздер өткізуге мүмкіндік бергені үшін БҰҰ Бас хатшысы Антониу Гуттериштің атынан алғыс білдірді.

– Сіздің еліңіз халықаралық аренадағы ең күрделі түйткілдерді реттеу ісінде зор тәжірибесін көрсетіп, үлгі болып келеді. Қазақстанның Біріккен Ұлттар Ұйымы Қауіпсіздік Кеңесіне тұрақты емес мүшелігі Сирия қақтығысын шешудегі қосымша мүмкіндік болып саналады, – деді Стаффан де Мистура.

Кездесу қорытындысы бойынша тараптар қарулы қақтығысты одан әрі реттеу шаралары жөнінде пікір алмасты.