Қазақ баласы үшін қуану бізге қиындық тудыра ма? 17 жасында Бауыржан Есебаевтың «Арман» әнімен барша тыңдарманның жүрек түкпірінен орын алып, осы әнмен танылды. «Арман» әнін Қайраттың алдында бірнеше орындаушылар орындады. Бірақ, бұл әннің бағын Қайрат ашты, ән Қайраттың бағын ашты. Бұл әннің ізін басып көптеген әндер шықты. “Қыздар-ай” деп әуелетіп ән салып еді, толассыз қоңыраулар соғылып, есепсіз хаттар жазылды. Содан соң Қайрекең «Көз жасың көмектеспейді» деді. Себебі, сезімін білдіретін қыздарда есеп жоқ болатын. «Сағынсам қалай шыдаймын» деді де, артынша «Ешкімге көрсетпеймін» деп шырқай түсті. Қайраттың орнында кім болса да көрсетпеуші ме еді, кім біледі?! Бірақ, халық не десе де «Ақ құсы» бар ма, жоқ па ол жағы – құпия. Үйленгенінде не үйленбегенінде біреуге келіп кетері жоқ. Жеке өмірін емес, өнері мен енбегін бағаласақ жетіп жатыр. Исламда да, аманатқа алған әйелін ел көзінен таса ұстау қажеттігі айтылған. Демек, өзінің ары, намысы саналатын әйелін сырт көзден жасырып, “Ешкімге көрсетпеуі” орынды-ақ… Қайраттың барлық әні ХИТ. Бірақ мына хит әннің орны ерекше болды. Ол әннің әкесі (әнін жазған) Бауыржан Есебаев, шешесі (сөзін жазған) Олжас Отар. “Ауырмайды жүрек, ауырмайды!” Бірақ, қайдан ауырмасын, аяқтан шалып, балақтан тартып жатса?

Соңғы жылдары Қайраттың атын пайдаланып, пайда тапқысы келетін пысықайлар көбейіп кетті. “Жылдар мен жолдар” оны талай соқпаққа салды. Қандай былықты жер болса, сол жерде атыШУЛЫ әншіміздің есімі аталып жатады. Қандай БАҚ өкілі болмасын, Қайраттың атын естісе ақпарат алуға асығатыны жасырын емес. Асығы алшысынан түсіп жүрген басқа емес, өзіміздің қазақтың ұлы ғой. Даусы жоқ дерсіз, басқа дерсіз. Бірақ біз жасалып жатқан еңбекті бағалауымыз керек. Даусы бар деп санайтындарыңыздан кім бұлай жасап жатыр?
- Дауысы жоқ болса, ел аралап жанды дауыста концерт қоярма еді?
- Жиі-жиі концерт қояды, тыңдарманымен тығыз байланыста.
- Бір әнмен елді жалықтырмайды, үнемі ізденісте! Өзін жан-жақты қырынан танытып жүрген оның, жақсы жағын санамаласақ жетіп артылады.
«Мамасының баласы» дейсіздер оның несі айып, несі мін? Басқаның емес туған анасы ғой. Жұмақты жақсы көріп, құрметтей алған перзент, басқаныңда қадіріне жете алады. Осынша жетістікке жетуі продюссерінің шын жанашыр болуында шығар. Басқа адам кезінде Қайратты қолдаған болса, дәл бүгінгідей дәрежеге жетпес пе еді, белгісіз. Суық күнде тоңдырмайтын, қарны ашса тойдыратын әкесі, анасымен бірге еңбек етіп келеді. Бұл оның ұтқан ұпайы деп есептеймін.
«Өкініш» деп кино түсірді. Киноның оқиға желісі әншінің өз өмірінен алынған. Кино әр түрлі кері тартпа пікірлер туындатты: байлыққа мас болып мақтанды, үйін, машиналарын, қымбат заттарын көрсетті деген іспеттес. Ондай дүниелерді алмайтын болса, әуелі өзіне қараспаса, кімді жарылқайды? Жыртық-жыртық киім киіп жүрсе, тағы да жерден алып, жерге салар едік қой. Ал, екінші жақ бұл пікірлерге қарсы шығып жатты. Кино ұнамаса, өзіңе ұнайтын киноны түсіріп көріңізші… Әрине қолдан келсе. Ушыққан әнгімеге қарамастан KN журналын, KN брендтік киімдерін шығарды. Журнал шыққан соң білікті мамандардан сындарлы сын да, кекетулерде болды. Бірақ, халық әппақ тілегін әдеттегідей жаудырды. Жау алыста болмайды, әріптестерінен келіп жатқан соққы деп топшыладым. Киім дүкені ашылған соң да дәл осындай көріністің куәсі болдық. Халық жапа тармағай киімдерді сатып алып жатты. Ал, әріптестер… Қытайда жасалған, таза бренд емес т.б.
Осындай жағдайлар шаршатса керек, әндерінің бірі, азулы ақын Ақмарал Леубаеваның сөзіне жазылған «Жаралы жанның әні бұл».
“Күңдестік дейтін қоңырау,

Соңынан еріп әлі жүр

Тілегін айтар ел бар да,

Жүрегім айтар әлі жыр.

Жаратқан Ием сен барда,

Жеңемін бәрін, бәрібір!».

Кім не десе де Қайрат еңбекқор! Тыным таппай ізендеді,халықтың көңілінен шығуы үшін үнемі еңбек етеді. Бейнебаяндары да көңілден шығарлық. ТЫҢДА, МЕЙЛІ, ТЫҢДАМА, Қайрат НҰРТАС мега жұлдыз! Бәрібір, халық Қайраттың өнерін жақсы көреді. Халықтың махаббатына бөленген әнші. Басқаның бәрін сатып алуға болады, тек ХАЛЫҚТЫҢ МАХАББАТЫН ЕМЕС.

Арайлым АЙТҚОЖА,

“Шын-ақпарат”