Elbası Naurız meyramına arnalğan merekelik is-şarağa qatıstı
Memleket basşısı «Sarıarqa» velotreginde ötken is-şarağa qatısuşılarğa arnağan sözinde barlıq qazaqstandıqtardı Naurız meyramımen qwttıqtap, otandastarımız bwl merekeni tuıstarımen jäne dostarımen birge qarsı aludı dästürge aynaldırğanın atap ötti-dep qabarlaydı Aqorda baspasöz qızmeti.
Qazaqstan Prezidenti mıñjıldıq tarihı bar Naurız eldiñ eñ jaqsı köretin jäne asığa kütetin meyramı ekenin, ol adamnıñ wltı men dini wstanımına qaramay toylanıp kele jatqanın ayttı.
Sonımen qatar, Nwrswltan Nazarbaev Naurız senimniñ, dostıq pen bauırlastıqtıñ, el twraqtılığınıñ nışanı ekenine nazar audardı.
– Biıl biz Naurızdı erekşe köñil-küymen qarsı alıp otırmız. Qazaqstan eleuli jañaru bağıtına bet bwrdı. Men Üşinşi jañğıru bağdarlamasın jariyaladım. Onıñ ayasında sayasi jäne ekonomikalıq jüyeni reformalau közdelgen. Biz Konstituciyağa memlekettik basqarudı jetildire tüsetin mañızdı tüzetuler engizdik. Täuelsizdigimizdiñ kepildikteri nığaytılıp, birlik pen tatulıq bekem bola tüsedi. Bwl bolaşaqqa senimmen qarauğa, qazirgi älemniñ damuı jolındağı sın-qaterlerdi eñseruge mümkindik beredi. Qazaqstandağı barlıq özgeristerdiñ bir ğana maqsatı bar. Ol – är üyde, är otbasında, är şañıraqta molşılıq pen twraqtılıqtıñ boluı. Är azamat öz eli üşin alañsız eñbek etip, balaların ösirip, jaña kündi quanışpen qarsı alatınday boluğa tiis. Bwğan eñbek etu arqılı qol jetkiziledi, oğan memleket mümkindik berip otır, – dedi Memleket basşısı.
Qazaqstan Prezidenti is-şarağa qatısuşılarğa arnağan sözinde bükil älem boyınşa jañaru nışanın tanıtıp, adamdardıñ özara ıntımağın jäne tabiğatpen twtastığın körsetetin köktemgi kün men tünniñ teñeler şağınıñ ayrıqşa mañızdılığın atap ötti.
– Bwl künder halıqtı quanışqa böleydi. Mereke künderi jwrt bir-birine qonaqqa barıp, bwrınğı ökpe-renişterin keşirisedi, bir-birine igilik pen baq-bereke tileydi. Naurız meyirimdilik pen özara kömek siyaqtı mäñgilik qwndılıqtardı eske salıp twradı, – dedi Nwrswltan Nazarbaev.
Soñında Memleket basşısı jwrtşılıqtı Naurız meyramımen tağı da qwttıqtap, baqıt pen jaqsılıq tilep, ösip-örkendeuine niettestik bildirdi.
Sonday-aq, Elbası «Han Şatır» oyın-sauıq ortalığı mañındağı etnoauılğa bardı. Onda wlttıq bwyımdar körmesi men sport sayıstarı wyımdastırıldı.
Pikir qaldıru