“قىمىز” تۋرالى قيال تۋدىرعان “شامپان”
kerey.kz
2012 جىلى يتاليالىق ريۆەرانىڭ پورتوفينو قالاسىندا قويعان عاجايىپ جاندى داۋىس كونتسەرتى كەزىندە اندرەا بوچەللي “شامپان” ءانىن شارىقتاتقان كەزدە ساحنا مەن اۋديتوريا قوسىلا شىرقاپ، ونەرقۇمار قاۋىمنىڭ ەرەكشە كوڭىل-كۇيى ليگۋري جاعالاۋىنا سىيماي تۇتاس جەرورتا تەڭىزىن شايقاعانداي اسەر تۋدى. كىشى قىزىمنىڭ جاقسى كورەتىن كونتسەرتى بولعاسىن YouTube-تان ءجيى قارايمىز. تاماشالاعان سايىن “قازاق تا ءبىر كۇنى وسىلايشا تۇرمىسى تۇزەلىپ، شارۋاسىنا الاڭداماي، باسپاناسىنا قايعىرماي، جۇمىسىنا جالتاقتاماي، بالا-شاعاسى ەركىن ءوسىپ، وقۋعا ىنتالى ءھام كاسىپكە بەيىم تاۋەلسىز مىنەزبەن ەر جەتىپ، اتا-اناسى از عۇمىرىندا ارمانسىز ەل ارالاپ، جەر كورىپ، جەمقورلىق زاڭ الدىندا دا، مەنتاليتەت اياسىندا دا شىن ماسقاراعا اينالعان مەملەكەتتىڭ الەۋمەتتىك قامقورلىعىن سەزىنىپ، مىناداي ادەمى تابيعات ورىندارىندا، تامىلجىعان كەشتەردە، التايدىڭ ءبىر باۋرايىندا، يا الاكولدىڭ ارالتوبەسىندە، يا ىلەنىڭ بويىندا، يا كاسپيدىڭ جاعاسىندا، يا بۋرابايدىڭ ناق وزىندە ساپىرا-ساپىرا بالعا اينالعان تامىزداعى سارى قىمىزدىڭ بۋىمەن جەزتاڭداي ءانشىنىڭ “قۇلاقتان كىرىپ، بويدى الار” ۇنىنە قوسىلا جان سارايى جارقىراپ، ارقا-جارقا اندەتىپ وتىرسا” دەپ ءبىر ويلا-ا-اپ قويام.
P.S. جازعى دەمالىستا جۇرگەندىكتەن بۇل تاراپقا كوپ كوز سالا الماي جاتىرمىن. جازبا كۇتكەن دوستارىم مەن فوللوۆەرلەردەن عافۋ وتىنەم. ازدان سوڭ كورىسكەنشە، امان تۇرعايسىزدار!
پىكىر قالدىرۋ