رەسەي ءسىم: لاتىن گرافيكاسىنا ءوتۋ – قازاقستاننىڭ ىشكى ءىسى
رەسەي سىرتقى ىستەر ءمينيسترىنىڭ ورىنباسارى گريگوري كاراسين رەسمي ماسكەۋ قازاقستاننىڭ لاتىن الىپبيىنە كوشۋ تۋرالى شەشىمىنە “بايىپپەن قارايتىنىن جانە ونى قازاقستاننىڭ ىشكى ماسەلەسى دەپ بىلەتىنىن” مالىمدەدى. بۇل جايىندا ول “روسسيا-24″ تەلەارناسىنا بەرگەن سۇحباتىندا ايتتى.
“مەنىڭشە، بۇل جاعدايدا ءبىزدىڭ ۇستانىمىمىز بايسالدى، تۇپتەپ كەلگەندە، قاي ءتىلدى قانداي دەڭگەيدە قولدانۋ – بۇل قازاقستاننىڭ ىشكى ءىسى” دەدى كاراسين. ونىڭ سوزىنە قاراعاندا، جاڭا الىپبيگە كوشۋگە قاتىستى جاڭا جاعدايعا بەيىمدەلۋ ءبىراز ۋاقىتتى الادى جانە ايتارلىقتاي پروبلەما تۋىندامايدى.
بۇعان دەيىن رەسەيدىڭ قازاقستانداعى ەلشىسى ميحايل بوچارنيكوۆ تا ماسكەۋ قازاقستاننىڭ قازاق ءالىپبيىن لاتىن گرافيكاسىنا كوشىرۋ شەشىمىنە “تۇسىنىستىكپەن جانە قۇرمەتپەن قارايتىنىن” مالىمدەگەن.
قازاقستان پرەزيدەنتى نۇرسۇلتان نازارباەۆ 26 قازاندا قازاق ءتىلى ءالىپبيىنىڭ لاتىن گرافيكاسىنداعى جاڭا نۇسقاسىن بەكىتۋتۋرالى جارلىق شىعارعان. پرەزيدەنت ۇكىمەتكە قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا قۇرۋدى، 2025 جىلعا دەيىن قازاق ءتىلى ءالىپبيىن لاتىن گرافيكاسىنا كەزەڭ-كەزەڭىمەن كوشىرۋدى قامتاماسىز ەتۋدى جانە جارلىقتى ىسكە اسىرۋدىڭ باسقا دا شارالارىن جاساۋدى تاپسىرعان.
قازاقستان پرەزيدەنتى نۇرسۇلتان نازارباەۆ بيىل جىل باسىندا جاساعان مالىمدەمەسىندە “2017 جىلدىڭ سوڭىنا دەيىن لاتىنشا قازاق ءالىپبيىنىڭ جوباسىن ازىرلەۋ، ۇكىمەتكە قازاق ءتىلىن لاتىن الىپبيىنە كوشىرۋدىڭ” ناقتى كەستەسىن جاساۋدى تاپسىرعان ەدى.
12 قازاندا استانادا وتكەن ءباسپاسوز كونفەرەنتسياسىندا شاياحمەتوۆ اتىنداعى تىلدەردى دامىتۋ رەسپۋبليكالىق ۇيلەستىرۋ-مەتوديكالىق ورتالىعىنىڭ ديرەكتورى ەربول تىلەشوۆ پەن بايتۇرسىنوۆ اتىنداعى ءتىل ءبىلىمى ينستيتۋتىنىڭ اعا عىلىمي قىزمەتكەرى، پروفەسسور ءالىمحان جۇنىسبەك 32 ارىپتەن تۇراتىن لاتىن ءالىپبيىنىڭ جاڭا نۇسقاسىن ۇسىنعان. وندا قازاق تىلىنە عانا ءتان كەيبىر دىبىستاردى اپوستروف (دايەكشە) ارقىلى بەلگىلەۋ ۇسىنىلعان.
نازارباەۆ بۇعان دەيىن لاتىن الىپبيىنە كوشۋ ءۇردىسى “ورىس ءتىلدى تۇرعىنداردىڭ، ورىس ءتىلى مەن باسقا دا تىلدەردىڭ قۇقىعىنا تيمەيتىنىن” بىرنەشە رەت ايتقان.
ازات ەۋروپا / ازاتتىق راديوسى
پىكىر قالدىرۋ