بۇگىن قازاقستان سەناتىنىڭ توراعاسى قاسىم-جومارت توقاەۆ لاتىن الىپبيىنە ءوتۋ جونىندە قۇرىلعان ۇلتتىق كوميسسيا قوعام تالقىلاۋىنداعى ەلەۋلى ۇسىنىستاردى ەسكەرۋ كەرەكتىگى جايلى ايتتى.

بۇل تۋرالى سەنات توراعاسى ءوزىنىڭ Twitter جەلىسىندەگى بەتىندە بىلدىرگەن. “ۇلتتىق كوميسسيا لاتىن ءالىپبيى بويىنشا قوعام تالقىلاۋىنداعى ماردىمدى ۇسىنىستاردى ەسكەرۋى قاجەت” دەپ جازعان ول.

وسى پىكىرىنىڭ الدىندا قاسىم-جومارت توقاەۆ اتالعان جەلىدەگى بەتىنە “ەلباسى ايتقانىنداي، لاتىن ءالىپبيىن قولدانىسقا ەنگىزۋدى كەزەڭ-كەزەڭىمەن ىسكە اسىرعان ءجون” دەپ جازعان بولاتىن.

اپوستروفتى لاتىن ءالىپبيى پرەزيدەنت جارلىعىمەن بەكىتىلگەننەن بەرىدە مەملەكەتتەگى “ەكىنشى تۇلعا” لاتىن ءالىپبيى تۋرالى العاش رەت ءوز پوزيتسياسىن ءبىلدىرىپ وتىر.

قازاقستاندا لاتىن ءالىپبيىنىڭ ەكى نۇسقاسى ۇسىنىلىپ، سوڭىنان اپوستروفتى نۇسقا بەكىتىلىپ، ونى سىناعان قوعام الەۋمەتتىك جەلىدە جانە باسپاسوزدە ايتارلىقتاي تالقى تۋدىرعان بولاتىن.

قازاقستان پرەزيدەنتى نۇرسۇلتان نازارباەۆ بيىل جىل باسىندا جاساعان مالىمدەمەسىندە “2017 جىلدىڭ سوڭىنا دەيىن لاتىنشا قازاق ءالىپبيىنىڭ جوباسىن ازىرلەۋ، ۇكىمەتكە قازاق ءتىلىن لاتىن الىپبيىنە كوشىرۋدىڭ” ناقتى كەستەسىن جاساۋدى تاپسىرعان ەدى.

ازات ەۋروپا / ازاتتىق راديوسى