ترامپ پحەنيانعا ء“توزىمىن سىناي بەرمەۋدى” ەسكەرتتى
اقش پرەزيدەنتى دونالد ترامپ سولتۇستىك كورەيا باسشىسى كيم چەن ىنگە اقش-تىڭ “توزىمدىلىگىمەن ويناماۋعا” كەڭەس بەرىپ، “الەم ءوزىن يادرولىق قارۋمەن قوقان-لوقى كوسەتىپ وتىرعان الاستاتىلعان رەجيمنىڭ قاۋپىنە توزە المايتىنىن” مالىمدەدى.
8 قاراشادا وڭتۇستىك كورەيا پارلامەنتىندە سويلەگە ترامپ پحەنيان يەلەنگىسى كەلىپ وتىرعان يادرولىق قارۋ سولتۇستىك كورەيانىڭ قاۋىپسىزدىگىن ارتتىرا المايتىنىن، كەرىسىنشە ول ەلدىڭ رەجيمىنە “ۇلكەن قاۋىپ تۋدىراتىنىن” مالىمدەدى. ء“بىزدى جەتە باعالاي الماي قالىپ جۇرمەڭدەر جانە سىناي بەرمەڭدەر” دەدى ترامپ. دەگەنمەن ول پحەنيان ەگەر بالليستيكالىق زىمىران جاساۋىن توقتاتىپ، “يادرولىق ارەكەتتەرىن توقتاتۋعا جانە تولىق تەكسەرۋگە كەلىسسە” وندا سولتۇستىك كورەيانىڭ بولاشاعى جارقىن بولاتىنىنا ۋادە بەردى.
ترامپ 8 قاراشا كۇنى تاڭەرتەڭ اۋا-رايىنىڭ قولايسىزدىعىنا بايلانىستى سولتۇستىك كورەيا مەن وڭتۇستىك كورەيانى ءبولىپ تۇرعان دەميليتارلىق ايماققا بارۋ جوسپارىنان باس تارتۋعا ءماجبۇر بولدى. اق ءۇي كەيىن پرەزيدەنت اتالعان ايماققا بارا الماي قالعانىنا “قاتتى قىنجىلعانىن” مالىمدەدى.
ازياعا ساپارىن جاپونيادان باستاعان ترامپ ەندى قىتايعا بارادى. امەريكالىق شەنەۋنىكتەردىڭ حابارلاۋىنشا، ترامپ قىتايعا ساپارىندا پەكيننىڭ پحەنياننىڭ باستى وداقتاسى جانە ساۋدا ارىپتەسى رەتىندە سولتۇستىك كورەيا باسشىسىن يادرولىق باعدارلاماسىنان باس تارتقىزۋعا ىقپال ەتۋىن نازاردا ۇستاماق.
ازات ەۋروپا / ازاتتىق راديوسى
پىكىر قالدىرۋ