20 ناۋرىزدا استانادا قازاقستان پارلامەنتىنىڭ بىرلەسكەن وتىرىسىندا سەنات توراعاسى قاسىم-جومارت توقاەۆ قازاقستان پرەزيدەنتىنىڭ وكىلەتتىگىن قابىلداپ، انت بەردى.
«قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا، ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە، قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن»، – دەدى قاسىم-جومارت توقاەۆ.
بىرلەسكەن وتىرىسقا ەلدىڭ تۇڭعىش پرەزيدەنتى نۇرسۇلتان نازارباەۆ، ۇكىمەت مۇشەلەرى، پرەزيدەنتكە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى، قازاقستاندا تىركەلگەن شەتەلدىك ميسسيالاردىڭ باسشىلارى، سەنات دەپۋتاتتارى، ءماجىلىس دەپۋتاتتارى قاتىستى.
كونستيتۋتسيانىڭ 48-بابىنىڭ 2-تارماعىنا ساي، توقاەۆتىڭ انت بەرۋ ءراسىمى، ورتالىق سايلاۋ كوميسسياسىنىڭ كەلىسىمىمەن ءوتتى.
19 ناۋرىزدا قازاقستاننىڭ تۇڭعىش پرەزيدەنتى نۇرسۇلتان نازارباەۆ رەسپۋبليكالىق تەلەارنالاردان حالىققا ۇندەۋ جاساپ، پرەزيدەنتتىك وكىلەتتىگىن توقتاتاتىنىن مالىمدەگەن ەدى.
نازارباەۆ ۇندەۋ جاساپ جاتقاندا قول قويعان “قازاقستان رەسپۋبليكاسى پرەزيدەنتىنىڭ وكىلەتتىگىن اتقارۋ تۋرالى” جارلىققا سايكەس، ونىڭ پرەزيدەنتتىك وكىلەتتىگى 20 ناۋرىزدا توقتاتىلادى.
ەل كونستيتۋتسياسىنىڭ 48-بابىنىڭ 1-تارماعىنا سايكەس، قازاقستان پرەزيدەنتىنىڭ وكىلەتتىگى مەرزىمىنەن بۇرىن توقتاتىلعاندىقتان قالعان مەرزىمدە ونىڭ وكىلەتتىگى پارلامەنت سەناتىنىڭ توراعاسى قاسىم-جومارت توقاەۆقا كوشەدى. ول بۇل قىزمەتتى جاڭا پرەزيدەنت سايلانعانعا دەيىن اتقارادى.
پىكىر قالدىرۋ