Auıl toyı – darhandıqtıñ belgisi
Şığıs Qazaqstan oblısı Kürşim aunınıñ Maraldı auılında
dürkiregen toy ötti.
Narıq zamanında jwmıssızdıqtıñ saldarınan kerqwlanday
josılıp, qalağa köşkender auılğa degen ıstıq ıqılasın, sağınıştı
sezimin tilmen jetkize almaydı. Sebebi, kindik qanı tamğan topıraqtıñ
qasieti tım bölek. Osındayda jalpaq jwrtqa jar salmay, ündemey ülken is
tındıratın auıl azamattarın alqalauğa twrarlıq. Maraldınıñ
marqasqaları 15 jıldan beri «Auıl küni» merekesin toylaudan jalıqqan
emes. Osı erekşeligimen auıl azamattarı şığıs jwrtına ülgi bolıp
keledi.
Auıl klubında aldımen as berilip, marqwmdarğa Qwran bağıştaldı.
Resmi jinalısta okrug äkimi Farhat Öjikenovke oblıs äkimi Danial
Ahmetovtiñ, QR densaulıq saqtau salasınıñ üzdigi 35 jıl qızmet etip,
zeynetke şıqqan joğarı sanattı pediatr Külziken Anapievağa audan äkimi
Dulat Qajanovtıñ qwrmet gramotası tabıs etildi.
İs-şarağa «Nur otan» partiyası audandıq filialı törağasınıñ
birinşi orınbasarı Mamırbek Qalelov, audandıq mädeniet, tilderdi
damıtu, dene şınıqtıru jäne sport böliminiñ basşısı Baqıtqan
Ölmesekov, «Altai» telearnasınıñ direktorı Aida Jabagieva qatısıp,
halıqtıñ berekesine tänti bolğandıqtarın jasırmadı. Auıl toyına Nwr-
Swltan, Almatı, Semey, Öskemen, Zaysan, Ridder qalasına qonıs audarğan
auıldıñ tumaları alıstan at terletip jetti. Sauın aytumen qwrılğan qorğa
ärkim jağdayına qaray qolında barın salıp, dumandı şaranıñ saltanattı
türde ötuine atsalıstı.
Auıl sayabağına öskemendik Marat Ualiev, Melserhan Abdrahmanov,
Toqtasın Näbievterdiñ demeuşiligimen jasalğan sahna ornatıldı. Sayabaq
işinde qalıñ nöpir adam sirkiregen jauınğa qaramay, jüzderi jaynap,
quanıştıñ lebi esip, oyındardı tamaşaladı. Ötken sporttıq jarısqa
Öskemennen, audandanğa qarastı özge auıl komandalarınan 200-ge juıq
sportşı qatıstı. Futboldan Kürşim I orın, II orındı Üşbwlaq, III
orındı Kürşim-2 komandası ielendi. Voleyboldan Aqsuat auılı I orın,
Qayıñdı auılı II orın, toy iesi maraldılıqtar III orınnan körindi. Gir
köteru, gorodki, voleybol, erler jäne qızdar arasında arqan tartu, wlttıq
at sport oyındarınan alaman bäyge, qwnan bäyge, jorğa, tay jarısın
ötkizildi. 1963 jılğılar jerlesteri Meken Qırambaev atında gir tasın
köteruden jarıs wyımdastırıp, astanalıq Talğat Isinniñ demeuimen
arnayı dayındalğan medal' men qosa bas jüldege 150 mıñ teñge aqşalay
sıylıq tağayındadı. Lotoreya oynatılıp, biletke bağalı jülde
motociklden bastap, velosiped, twrmıstıq zattar tigildi. Wtıs biletterinen
tüsken qarjı auıldı abattandıruğa jwmsalatın boldı.
Almatı qalasınıñ twrğını belgili käsipker, merekeni
wyımdastıruşı Maraldınıñ tuması, Seysebaev Ergen
Qajımhanwlı: –Auıl merekesi – bwl tuğan jerge tağzım, Maraldığa degen
sağınştıñ merekesi. Ata-babanı eske alıp ülken as beretin kün. Osı
şaranıñ bası-qasında jürgen Ädil Qojaqov, Quat Esimov, Jandos
Tölebaev jäne alıstan kelgen azamattar bolsa, qomaqtı qarjılay kömek
atağandar Janat Nwrseyitqızı, Erbol Toqtağwlov, Mwrathan Ordabev
qatarlı azamattar qoldau körsetti. Eşkimnen şen-şekpen dämetpey,
«Jalğız ağaş orman bolmas»,-dep, tuğan auılınıñ quanışına ortaqtasıp,
berekeniñ ozıq ülgisin körsetken azamattarğa alğısım şeksiz. Auıl
ömirimniñ aynası, baqıtımnıñ bastauı, qayda jürsem de tuğan auılğa
añsarım auıp twratını sondıqtan.
Auıl toyına arnayı kelgen «MuzArt» tobınıñ änşisi Kenjebek
Janabilov: –Şığısqa san märte kelsem de, Maraldığa birinşi ret taban
tigizdim. Qanday tamaşa tabiğat, saf aua, janıñdı jadıratıp, kökirek
sarayıñdı aşıp jiberedi eken. Auıl halqınıñ ıntımağı men berekesine
erekşe tänti boldım. Özimiz de auılda öskendikten, auılda at minip, suğa
şomılıp, künine qaqtalıp, darhan köñildi jwrtpen emen-jarqın
äñgimelesip qaytudan asqan demalıs joq. Ärkimniñ tuğan topırağı ottay
ıstıq desek te, men üşin qazaq dalasınıñ ärbir tauı men tası közimniñ
qaraşığı sekildi. Eşqaşan bölip-jarıp qaramaymın. Auıl toyı
merekesinen köp närseni añğardım, as berip, ötkenderdi eske alıp,
aqsaqaldardıñ batasına qol jayu-är perzenttiñ borışı. Toy tek işip-
jeuden, köñil köteruden twrmaytının maraldılıqtar däleldedi. Dästürdi
jañğırtıp, wlttıq at sport oyındarın ötkizgende, atqa mingen barlıq
şabandozğa sıyaqı bergendi birinşi ret köruim.
Twmadan qaynap şıqqan tau suınıñ sıldırı, jayqalğan jasıl
maysa, bür jarğan tobılğılar, moyıl men aq qayıñdar adamnıñ jan-
düniesin serpiltpey qoymaydı. Halqımızdıñ sanı artıp, qwttı meken
auıldıñ ajarı taymasın!
Kögeday Şämerhan
Suretter avtordiki.
kerey.kz
Pikir qaldıru