19 مامىردا اقش پرەزيدەنتى دونالد ترامپ يرانعا سوعىس اشپاۋدى قاتاڭ ەسكەرتتى. ترامپ ءوزىنىڭ Twitter پاراقشاسىنا “يران سوعىسقىسى كەلسە، ءوز تۇبىنە ءوزى جەتەدى. بۇدان بىلاي اقش-قا قوقان-لوققى كورسەتۋشى بولماڭدار!” دەپ جازدى ترامپ تەگەرانعا قاراتا.
اقش-تىڭ مالىمدەۋىنشە، تەگەران پارسى شىعاناعىندا قايىقتارعا زىمىراندارىن ورنالاستىرىپ، بىرىككەن اراب امىرلىكتەرىنىڭ جاعالاۋىندا ءتورت كەمەنى اتقىلاعان. يران مۇنى جوققا شىعاردى.
مۇنداي جازبا جاريالاماستان بىرەر كۇن بۇرىن ترامپ اقش-تىڭ يرانعا قىسىمى داۋعا ۇلاسىپ كەتكەنىن قالامايتىنىن ايتقان. 16 مامىردا پرەزيدەنت “اقش سوعىسقا دايىندالىپ جاتىر ما؟” دەگەن جۋرناليستەر سۇراعىنا “دايىندالىپ جاتقان جوق دەپ ۇمىتتەنەمىن” دەپ جاۋاپ بەرگەن. تەگەران دا يران بيلىگىنىڭ “سوعىستى قالامايتىنىن” ايتقان.
ەكى اپتا بۇرىن ۆاشينگتون پارسى شىعاناعىنا “اۆراام لينكولن” زىمىران تاسىعىش ۇشاقتارىن قوندىرعان. اقش يرانعا قارسى 120 مىڭ اسكەري جىبەرگەلى جاتقانى جايلى دا حابار تارادى. بىراق ترامپ مۇنى جوققا شىعارىپ، “سارباز جىبەرۋ ازىرگە جوسپاردا جوق، بىراق قاجەت بولسا، مۇنان كوپ اسكەري جىبەرەمىز” دەگەن. ارتىنشا ۆاشينگتون اقش-تىڭ يراكتاعى ەلشىلىگىندە ىستەيتىن قىزمەتكەرلەرىنىڭ باسىم بولىگىن “يران قاتەرىنەن سوڭ قاۋىپسىزدىك ماقساتىندا” ەۆاكۋاتسيالادى.
ۆاشينگتون مەن تەگەران اراسىنداعى بۇل داۋ يران وتكەن اپتادا 2015 جىلعى يادرولىق كەلىسىم تالاپتارىنىڭ كەيبىرىن ورىنداۋدان باس تارتىپ، يادرولىق قارۋ دايىنداۋعا قاجەت بايىتىلعان ۋراندى قايتا وندىرە باستايتىنىن ايتقان سوڭ تۋعان. يادرولىق كەلىسىم اياسىندا اقش يرانعا سانكتسياسىن ازايتىپ، ەسەسىنە تەگەران يادرولىق باعدارلاماسىنان باس تارتۋى كەرەك ەدى. بىراق ۆاشينگتون “يران تالاپتاردى بۇزدى” دەپ بىلتىر بۇل كەلىسىمنەن شىعىپ كەتتى. ارتىنشا ترامپ تەگەرانعا سانكتسيانى قايتا كۇشەيتكەن.
ازات ەۋروپا / ازاتتىق راديوسى
پىكىر قالدىرۋ