|  |  |  | 

جاھان جاڭالىقتارى ساياسات سۇحباتتار

باتىس بەرگەن قارۋ-جاراق ۋكرايناعا كومەكتەسە الا ما؟ ساراپشىمەن سۇحبات


اسكەري بەرەندى تەحنيكاعا ءمىنىپ كەلە جاتقان ۋكراين جاۋىنگەرلەرى. ۋكراينا قۇرلىق اسكەرى ءباسپاسوز قىزمەتى 2022 جىلعى 19 ساۋىردە جاريالاعان سۋرەت.

اسكەري بەرەندى تەحنيكاعا ءمىنىپ كەلە جاتقان ۋكراين جاۋىنگەرلەرى. ۋكراينا قۇرلىق اسكەرى ءباسپاسوز قىزمەتى 2022 جىلعى 19 ساۋىردە جاريالاعان سۋرەت.

ۇلىبريتانياداعى كونسەرۆاتيۆتىك پارتيانىڭ قاۋىپسىزدىك ماسەلەلەرى جونىندەگى بۇرىنعى كەڭەسشىسى، Article 7 كونسالتينگ توبىنىڭ باس ديرەكتورى گارۆان ۋولش باتىستىڭ اسكەري تەحنيكاسى ۋكرايناعا قالاي كومەكتەسە الاتىنىن، سوعىستىڭ ەندىگى كەزەڭى نەلىكتەن لوگيستيكاعا بايلانىستى ەكەنىن ايتتى.

رەسەي اسكەرى ۋكراينانىڭ شىعىسىنداعى شابۋىلىن كۇشەيتە باستاعان شاقتا، باتىس ەلدەرى كيەۆتى قۋاتتى قارۋ-جاراقپەن قامتاماسىز ەتۋگە تىرىسىپ جاتىر.

ۋكراينا بۇل سوعىستا تاباندىلىقپەن قارسىلىق تانىتىپ، رەسەي اسكەرى ەلدىڭ سولتۇستىگىنەن كەتتى. بىراق ساراپشىلار سوعىستىڭ ەندىگى كەزەڭى باتىستىڭ اسكەري كومەگى قانداي بولاتىنىنا بايلانىستى ءوربيدى دەيدى.

جۋىردا اقش ۋكرايناعا قاۋىپسىزدىگىن نىعايتۋعا 800 ملن دوللاردىڭ كومەگىن بەرۋدى ماقۇلداعان. سلوۆاكيا، بالتىق ەلدەرى، كانادا سەكىلدى باسقا مەملەكەتتەر دە قۋاتتى قارۋ مەن الىستان قولدانۋعا بولاتىن قارۋ-جاراق جىبەرە باستادى. اتاپ ايتقاندا، گاۋبيتسا، زەنيت جۇيەسى، كەمەگە قارسى زىمىراندار، ۇشقىشسىز ۇشاتىن اسكەري دروندار، بەرەندى تەحنيكا مەن تانكىلەر بەردى.

باتىس اسكەري تەحنيكاسىن ۋكرايناعا جەتكىزۋ ءۇشىن ۇشاققا تيەپ جاتىر. كورنەكى سۋرەت.

باتىس اسكەري تەحنيكاسىن ۋكرايناعا جەتكىزۋ ءۇشىن ۇشاققا تيەپ جاتىر. كورنەكى سۋرەت.

شامامەن ەكى ايعا جالعاسىپ جاتقان سوعىستىڭ كەلەسى كەزەڭىنە وتەر شاقتا جاڭا كومەكتىڭ بەرىلۋى باتىستىڭ ۋكرايناعا قولداۋى جىلدام وزگەرگەنىن كورسەتكەندەي بولدى. 24 اقپاندا رەسەي اسكەرى ۋكرايناعا شابۋىل باستاعاندا باتىس بيلىگى سوعىس ۇزاققا بارمايدى دەپ بولجاپ، كيەۆكە جەڭىل قارۋ-جاراق پەن تەحنيكا بەرگەن. اتاپ ايتقاندا، ۆينتوۆكا، شلەم، بايلانىس قۇرالدارى مەن يىققا سۇيەپ اتاتىن زىمىراندار بەرىپ كومەكتەسكەن.

بىراق ۋكراينانىڭ سوعىستاعى جەتىستىكتەرىنەن كەيىن بۇل ءتىزىم وزگەردى. باتىس شەنەۋنىكتەرى ەندى ۋكراينانى تەك دونباسس ايماعىنداعى شەشۋشى شايقاسقا عانا قاجەت قارۋمەن ەمەس، جالپى، رەسەي كۇشتەرىنە قارسى ۇزاق ءارى قاتىگەز سوعىسقا قاجەت قارۋ-جاراقپەن قامتاماسىز ەتۋگە تىرىسىپ جاتىر.

وسى جايلى تولىق ءبىلۋ ءۇشىن ازاتتىق ۇلىبريتانيا كونسەرۆاتيۆتىك پارتياسىنىڭ قاۋىپسىزدىك ماسەلەلەرى جونىندەگى بۇرىنعى كەڭەسشىسى، Article 7 توبىنىڭ باس ديرەكتورى گارۆان ۋولشتان سۇحبات الدى.

ازاتتىق: ۋكراينانىڭ شىعىسىندا سوعىستىڭ جاڭا كەزەڭى باستالىپ جاتىر، سونىمەن قاتار لوگيستيكالىق شايقاس تا ءجۇرىپ جاتقانداي. تانك پەن زەڭبىرەكتەر ماڭىزدى ءرول اتقارۋى مۇمكىن شايقاستارعا دايىندالىپ جاتقان ۋكرايناعا باتىس ەلدەرىنىڭ قارۋ-جاراق جىبەرىپ جاتقانىن كورىپ وتىرمىز. باتىستىڭ ۋكرايناعا كومەگىن قالاي باعالار ەدىڭىز؟ كيەۆ وزىنە كەرەگىن الىپ جاتىر ما؟

گارۆان ۋولش – Article 7 توبىنىڭ باس ديرەكتورى.

گارۆان ۋولش – Article 7 توبىنىڭ باس ديرەكتورى.

گارۆان ۋولش: ۋكراينا وزىنە قانشا قاجەت ەتسە، سونشا [كولەمدە] الىپ جاتقان جوق. بۇل جەتكىلىكتى بولۋى دا مۇمكىن، سەبەبى ۋكراينا اسكەرى تەحنيكانى وتە ءتيىمدى پايدالانىپ جاتىر. ولاردىڭ مورالدىق رۋحى وتە جوعارى، اسكەرى جاقسى جاتتىققان [جانە] ولار رەسەيدىڭ ءبىرشاما تەحنيكاسىن قولعا ءتۇسىرىپ، ونى دا پايدالانا الادى. بىراق، شىن مانىندە، باتىستىڭ كومەگى باياۋ بولدى. قاجەت مولشەردە بولعان جوق دەۋگە دە بولادى.

ولار ۋكراينانىڭ شاماسى جەتپەيدى دەپ ويلاپ، كوپ ۋاقىت جوعالتىپ العانعا ۇقسايدى. سوندىقتان دا ولار ەشتەڭە جىبەرمەي وتىردى. ولار “ورىستار مۇنى ارانداتۋ دەپ ويلامايدى” دەگەن سەنىمنەن اتتاعان سوڭ، ەندى عانا [قۋاتتى قارۋ-جاراق] جىبەرۋگە مۇمكىندىگى پايدا بولدى.

[باتىس] رەسەيدىڭ تاكتيكاسى مەن ىنتاسىن دۇرىس باعامداي المادى. رەسەي تۇبەگەيلى باسقىنشىلىق سوعىسقا ۇمتىلىپ وتىر. بۇعان [ۋكراينانىڭ سولتۇستىگىندەگى] بۋچا قالاسىنداعى جانە باسقا جەرلەردەگى ادامداردى جاپپاي قىرىپ-جويۋ وقيعالارى دالەل بولا الادى. [باتىس] راسىمەن ۋكرايناعا [قولىندا بارىن] بەرۋى كەرەك. سول كەزدە ۋكراينا وككۋپاتسيالانعان اۋدانداردى ورىس اسكەرىنەن قۇتقارۋ ءۇشىن پارمەندى اسكەري وپەراتسيا جۇرگىزە الادى.

 

"دجاۆەلين" راكەتاسىنىڭ سىناعى
ازاتتىق: باتىس ۋكرايناعا قانداي قارۋدى جىلدام جەتكىزە الادى؟

گارۆان ۋولش: امەريكالىقتار بىرنەشە كۇن بۇرىن جاريالاعان [قارۋ] تۇرلەرىن [جىبەرگەنى] دۇرىس، بىراق ولاردىڭ ماسشتابى دۇرىس ەمەس.

جاڭا ارتيللەريا وتە پايدالى. ادامداردى تەز ۇيرەتۋگە بولادى. [سونداي-اق] ولار ورىستاردا جوق، بىراق باتىستا بار ارتيللەريا سناريادتارىن الا الادى. بۇل ارتيللەريا مۇمكىندىكتەرىن ايتارلىقتاي ارتتىرادى. [ۋكراينا] قارسى شابۋىلعا ارنالعان رادارلاردى الا الادى، سول ارقىلى ولار ورىستاردىڭ قانداي ارتيللەريادان اتقىلاپ جاتقانىن انىقتاپ، [ولاردى] جىلدام جويا الادى. بىراق [بۇل] ولارعا كوپ مولشەردە كەرەك.

وتە قىزۋ شايقاس بولعالى تۇر. [ۋكرايناعا] اسا كوپ مولشەردە وق-ءدارى قاجەت بولادى. ولارعا سوۆەت داۋىرىندەگى ارتيللەرياعا، باتىس ۇلگىسىندەگى كولەمى ءارتۇرلى ارتيللەرياعا ارنالعان وق-دارىلەر كەرەك. (ەسكەرتۋ: وسى سۇحبات الىنعاننان كەيىن ۆاشينگتون ۋكرايناعا تاعى 800 ملن دوللاردىڭ اسكەري كومەگىن، سونىڭ ىشىندە اۋىر قارۋ-جاراق بەرۋگە ۋادە ەتتى.)

اسكەري قارۋ-جاراقتى جونەلتۋگە دايىنداپ جاتقان ادام. كورنەكى سۋرەت.

اسكەري قارۋ-جاراقتى جونەلتۋگە دايىنداپ جاتقان ادام. كورنەكى سۋرەت.

ازاتتىق: سوعىستىڭ باسەڭدەيتىن ءتۇرى كورىنبەيدى، ۋكرايناعا ناتو ەلدەرى جىبەرەتىن جاڭا قۇرال-جابدىقتى پايدالانا باستاۋعا تۋرا كەلەتىن سياقتى. وزىندەگى سوۆەت جانە رەسەي تەحنيكاسى ازايدى. اسكەريلەرگە جاڭا اسكەري تەحنيكانى ۇيرەتۋ قانشالىق قيىن؟

گارۆان ۋولش: جەرۇستى قۇرال-جابدىقتارعا كەلسەك، ونى ۇيرەنۋ وڭاي، [بىراق] اۋە قۇرالدارىنا كەلگەندە وتە قيىنعا سوعادى. اسكەري ۇشاق ۇشقىشىنا [امەريكالىق] F-16 نەمەسە F-15 [رەاكتيۆتى ۇشاقتارىن] دۇرىس مەڭگەرۋ ءۇشىن وتە كوپ ۋاقىت كەرەك. [ۋكراينا] ماتەريالدىق-تەحنيكالىق قولداۋعا دا ءزارۋ. ولار ءارتۇرلى جانارماي، قۇرال-سايماندار قولدانادى، سوندىقتان بۇلاردىڭ ءبارى ورناتىلۋى كەرەك. الداعى بىرنەشە ايدا وسىنى ىستەسە، مۇنى قالاي جۇزەگە اسىراتىنىمىزدى قازىردەن ويلانۋىمىز كەرەك.

ماسەلە تەك [سوعىستا قولدانىلۋى مۇمكىن] قۇرال-جابدىقتى جەتكىزۋگە عانا تىرەلىپ وتىرعان جوق. بۇل جەردە قارۋ-جاراقتىڭ ىستەن شىقپايتىنىنا، جوندەلەتىنىنە، وپەراتورلار مەن مەحانيكتەردىڭ وعان قىزمەت كورسەتۋدى ۇيرەنە الاتىنىنا دا كوز جەتكىزۋ كەرەك.

ازاتتىق: ماتەريالدىق-تەحنيكالىق جاعىنا كەلسەك، باتىستا ۋكرايناعا كەرەك قارۋدى ۋاقىتىندا جىبەرۋگە مۇمكىندىك بار ما؟ ۋكرايناعا جانە مايدانعا قۇرال-جابدىقتى جەتكىزۋ جاعى قالاي بولادى؟

گارۆان ۋولش: قۋاتتى قارۋ بار، بىراق ونى مايداندا پايدالانۋ كەرەك. ادامداردى ۇيرەتۋ كەرەك، جاڭا جانارماي قويمالارى مەن جەتكىزۋ تەتىكتەرى قۇرىلۋى كەرەك جانە بۇعان شامامىز جەتەدى دە. تەك ازداعان ۋاقىت كەرەك جانە [باتىسقا] ويلاۋ جۇيەسىن وزگەرتۋ كەرەك. ولار بۇل سوعىستىڭ ۇزاققا سوزىلاتىنىن، رەسەيگە [قاراعاندا] باتىس پەن ۋكراينانىڭ ءوندىرىس قۋاتى مەن ەكونوميكالىق مۇمكىندىكتەرى كوپ بولعاندىقتان، جەڭىسكە جەتۋگە بولاتىنىن ءتۇسىنۋى كەرەك.

ۇزاق مەرزىمدە قاراستىرساق، سوعىس ۋكراينانىڭ پايداسىنا شەشىلەتىن سياقتى. بىراق [باتىس] ولاردىڭ ۇزاق مەرزىمگە شاماسى جەتۋى ءۇشىن [كيەۆتى] قولداي الاتىن جاعدايدا بولۋى كەرەك. سوندا ءبىز ولاردىڭ قارۋلى كۇشتەرىنە ۇزاق مەرزىمدە كوپ مولشەردە [جەتكىزىلەتىن] تەحنيكاعا وتۋىنە كومەكتەسە الاتىن جاعدايدا بولۋىمىز كەرەك.

ۋكراينانىڭ شىعىسىنداعى ماسكەۋ قولداپ وتىرعان سەپاراتيستەر ۋكراينا اسكەرىن اتقىلاپ جاتىر. دونەتسك وبلىسى، 11 ءساۋىر 2022 جىل.

ۋكراينانىڭ شىعىسىنداعى ماسكەۋ قولداپ وتىرعان سەپاراتيستەر ۋكراينا اسكەرىن اتقىلاپ جاتىر. دونەتسك وبلىسى، 11 ءساۋىر 2022 جىل.

ۋكراينانىڭ ءوز قورعانىس ءوندىرىسى دە وتە مىقتى. وسىلايشا بۇل شارالار وتاندىق قورعانىس ءوندىرىسىن باتىس ستاندارتتارىنا [جانە] ناتو-نىڭ قارۋ-جاراعىنا بەيىمدەۋگە باعىتتالا الادى. بۇل ولاردى ماڭىزدى رولگە يە بولىپ، اقىر سوڭىندا باتىسقا قارۋ جەتكىزۋىنە دەيىن سەپتەسە الادى.

ازاتتىق: كەيبىر باتىس ەلدەرىنىڭ، مىسالى، گەرمانيانىڭ ۋكرايناعا قۋاتتى قارۋ جىبەرگىسى كەلمەيتىنىن كورىپ وتىرمىز. ساراپشىلار مەن شەنەۋنىكتەر ۋكرايناعا مۇنداي قارۋدىڭ وتە قاجەت ەكەنىن ايتادى. ماسەلە ءالى تالقىلانىپ جاتىر، بىراق ءسىز بەرليننىڭ وسى ماسەلەدە كوزقاراسى وزگەرىپ جاتىر دەپ ويلايسىز با؟

گارۆان ۋولش: گەرمانيا ۇكىمەتىندە “جاسىلدار پارتياسىنا” مۇشە سىرتقى ىستەر ءمينيسترى اننالەنا بەربوك، ەنەرگەتيكا ءمينيسترى روبەرت حابەك پەن سوتسيال-دەموكراتيالىق پارتيا مۇشەسى، كانتسلەر ولاف شولتس اراسىندا تارتىس ءجۇرىپ جاتىر.

[سوتسيال-دەموكراتيالىق پارتيادان شىققان] كانتسلەر گەرحارد شرەدەر رەسەيدەگى “روسنەفت” ەنەرگەتيكا كومپانياسى باسقارماسىندا جۇمىس ىستەيدى. ءالى كۇنگە دەيىن وتستاۆكاعا كەتۋگە ءوتىنىش بەرمەگەن. [سوتسيال-دەموكراتيالىق پارتياعا مۇشە] باسقا دا ادامدار بار. مىسالى، كيەۆ جىلى قاباق تانىتپاعان فرانك ۆالتەر شتاينمايەر بۇرىن رەسەيشىل بولعان. [بۇعان دەيىن بىرقاتار باق ۋكراينا بيلىگى شتاينمايەردىڭ ەلگە كەلگەنىن قالامادى دەگەن اقپارات تاراتقان، بىراق كيەۆ ونى جوققا شىعارعان – رەد.] بۇل ويىندى شولتس جۇرگىزىپ وتىر. ول جاعدايدى وزگەرتۋگە تىرىسىپ جاتىر دەپ ويلايمىن، بىراق ول ۇستانىمى بەرىك قارسىلاستارمەن كۇرەسىپ جاتىر.

ماريۋپول كوشەسىندە جۇرگەن رەسەي اسكەري بەرەندى تەحنيكاسى. ارعى جاعىندا سوۆەت داۋىرىندە سالىنعان "ازوۆستال" مەتاللۋرگيا كومبيناتى تۇر. 12 ءساۋىر 2022 جىل.

ماريۋپول كوشەسىندە جۇرگەن رەسەي اسكەري بەرەندى تەحنيكاسى. ارعى جاعىندا سوۆەت داۋىرىندە سالىنعان “ازوۆستال” مەتاللۋرگيا كومبيناتى تۇر. 12 ءساۋىر 2022 جىل.

“جاسىلدار” قاتاڭ شارالار قابىلداۋدى تالاپ ەتىپ وتىر. بۇل ساياسات ەنەرگەتيكالىق سانكتسيالارعا دا، اسكەري قارۋ-جاراق جەتكىزۋگە دە قاتىستى. وسىلايشا، گەرمانيادا ءۇمىت بار، بىراق ولار ءوزارا تارتىستى جالعاستىرىپ، بۇل “سۋپەرتانكەردى” كەرى بۇرۋى كەرەك. بۇعان ءبىرشاما ۋاقىت كەرەك.

سونىمەن قاتار نەمىستەردىڭ وزىندە مۇنشا اسكەري تەحنيكا جوق. گەرمانيا رەسەي باسقىنشىلىعىنان سوڭ ارنايى قور قۇرىپ، قورعانىسقا ءجۇز ميلليارد ەۋرو ءبولدى. بىراق ولاردا وق-ءدارى قورى وتە از. اسكەري تانكتەرىنىڭ قوسالقى بولشەكتەرى جوق، بار بولسا، وتە از.

نەمىستەردىڭ قولىنان كەلەتىن ەڭ دۇرىس جول – مۇناي الۋدى توقتاتۋ. بەربوك 2022 جىلدىڭ اياعىنا دەيىن سولاي جاسايتىنىن دا مالىمدەدى. [بىراق] بۇل تىم ۇزاق. گەرمانيا رەسەي مۇنايىنا سونشا تاۋەلدى ەمەس. بىراق رەسەيگە گازعا قاراعاندا، مۇناي ساتۋدان كوپ اقشا تۇسەدى، سەبەبى مۇناي اناعۇرلىم قىمبات. مۇناي الۋدى دوعارىپ، گاز الۋعا كوشۋىنە بولار ەدى، بىراق ونىڭ قيىنعا سوعارى انىق.

[گەرمانيانىڭ] قولىنان كەلەتىن تاعى ءبىر شەشىم – ۋكرايناعا باسقا ەلدەردەن قارۋ ساتىپ الۋ ءۇشىن اقشا بەرۋ.

گەرمانيا قارۋ-جاراق ەكسپورتىنا رۇقسات بەرۋ پروتسەسىن دە جىلدامداتا الادى. گەرمانيادا كوپ قۇرىلعى شىعارۋعا قابىلەتتى ءوندىرىس بار. بىراق ونى ساتۋ پروتسەسىن بەكىتۋ، اسىرەسە سوعىس ايماعىنا جىبەرۋ وتە ۇزاق جانە قيىن. ول ءۇشىن سول بيۋروكراتيادان ءوتۋ كەرەك. قازىر نەمىستىڭ بۇل بيۋروكراتياسى رەسەيگە كومەكتەسىپ وتىر.

سۇحبات ىقشامدالىپ، وڭدەلدى.

ازاتتىق

Related Articles

  • سامات ءابىش قالاي “سۇتتەن اق، سۋدان تازا” بولىپ شىقتى؟

    ازاتتىق راديوسى ساياساتتانۋشى دوسىم ساتپاەۆ ۇقك توراعاسىنىڭ بۇرىنعى ءبىرىنشى ورىنباسارى، ەكس-پرەزيدەنت نۇرسۇلتان نازارباەۆتىڭ نەمەرە ءىنىسى سامات ابىشكە شىققان ۇكىم “قازاقستانداعى رەجيم بولاشاقتى ويلامايتىنىن كورسەتتى” دەيدى قازاقستاندىق ساياساتتانۋشى دوسىم ساتپاەۆ. ساراپشىنىڭ پايىمداۋىنشا، بيلەۋشى “ەليتا” جەكە ىستەرىمەن جانە تاساداعىكەلىسىمدەرمەن اۋرە بولىپ جاتقاندا ەلدە تاعى ءبىر جاڭا الەۋمەتتىك جارىلىسقا اكەلۋى مۇمكىن فاكتورلار كۇشەيىپ كەلەدى. ساياساتتانۋشىرەسەي ءوزىنىڭ ەكونوميكالىق مۇددەلەرى مەن گەوساياسي جوسپارلارىن كەڭىنەن جۇزەگە اسىرۋ ءۇشىن قازاقستاننىڭ ىشكى ساياساتىنا تىكەلەي اسەر ەتۋگە تىرىسىپ جاتۋى مۇمكىن دەپ تە توپشىلايدى. پۋتين “قاۋىپسىزدىك كەپىلى” مە؟ ازاتتىق: سونىمەن ۇزاق دەمالىس الدىندا وسىنداي ۇلكەن جاڭالىق جاريالاندى. مەيرام الدىندا، 19 ناۋرىزدا قازاقستاندىقتار ءماجىلىس دەپۋتاتىنىڭ پوستىنان سامات ابىشكە شىققان ۇكىم جايلى ءبىلدى. مۇنىڭ ءبارىنىڭ بايلانىسى بار ما الدە كەزدەيسوقتىق پا؟ دوسىم ساتپاەۆ: اڭگىمەنى بۇل ءىستىڭ قۇپيا

  • “گەوساياسات يلەۋىنە ءتۇسىپ قالۋىمىز مۇمكىن”. قازاقستاندا اەس سالۋعا قاتىستى ساراپشى پىكىرى

    ەلەنا ۆەبەر اتوم ەلەكتر ستانساسىن سالۋ جانە پايدالانۋ ەكولوگيالىق قاتەر جانە توتەنشە جاعدايدا ادام دەنساۋلىعىنا قاۋىپتى عانا ەمەس، وعان قوسا سوعىس بارىسىندا ۋكراينانىڭ زاپوروجە اەس-ىندەگى بولعان وقيعا سياقتى بوپسالاۋ قۇرالى دەيدى الەۋمەتتىك-ەكولوگيالىق قوردىڭ باسشىسى قايشا اتاحانوۆا. ول مۇنىڭ ارتىندا كوپتەگەن پروبلەما تۇرعانىن، قازاقستاندىقتارعا اەس سالۋ جونىندەگى رەفەرەندۋم قارساڭىندا بىرجاقتى اقپارات بەرىلىپ، وندا تەك پايدالى جاعى ءسوز بولىپ جاتقانىن ايتادى. ساراپشى اەس-ءتىڭ قاۋپى مەن سالدارى قانداي بولاتىنى جايىندا اقپارات وتە از دەپ ەسەپتەيدى. گولدمان اتىنداعى حالىقارالىق ەكولوگيالىق سىيلىقتىڭ لاۋرەاتى، بيولوگ قايشا اتاحانوۆا – رادياتسيانىڭ ادامدارعا جانە قورشاعان ورتاعا اسەرىن شيرەك عاسىردان استام زەرتتەپ ءجۇر. ول بۇرىنعى سەمەي پوليگونىندا جانە وعان ىرگەلەس جاتقان اۋدانداردا زەرتتەۋ جۇرگىزگەن. قاراعاندى ۋنيۆەرسيتەتىنىڭ گەنەتيكا كافەدراسىندا وقىتۋشى بولعان.

  • “قازاقستان دۇرىس باعىتتا”. دەكولونيزاتسيا، ۋكرايناداعى سوعىس جانە قاڭتار. بالتىق ەلشىلەرىمەن سۇحبات

    دارحان ومىربەك بالتىق مەملەكەتتەرىنىڭ قازاقستانداعى ەلشىلەرى (سولدان وڭعا قاراي): يرينا مانگۋلە (لاتۆيا), ەگيديۋس ناۆيكاس (ليتۆا ) جانە تووماس تيرس. سوۆەت وداعى ىدىراي باستاعاندا ونىڭ قۇرامىنان ءبىرىنشى بولىپ بالتىق ەلدەرى شىققان ەدى. ءوزارا ەرەكشەلىكتەرى بار بولعانىمەن، سىرتقى ساياساتتا بىرلىگى مىقتى لاتۆيا، ليتۆا جانە ەستونيا مەملەكەتتەرى ناتو-عا دا، ەۋرووداققا دا مۇشە بولىپ، قازىر كوپتەگەن ولشەم بويىنشا الەمنىڭ ەڭ دامىعان ەلدەرىنىڭ قاتارىندا تۇر. رەسەي ۋكرايناعا باسىپ كىرگەندە كيەۆتى بار كۇشىمەن قولداپ، تاباندىلىق تانىتقان دا وسى ءۇش ەل. سوعىس باستالعانىنا ەكى جىل تولار قارساڭدا ازاتتىق بالتىق ەلدەرىنىڭ قازاقستانداعى ەلشىلەرىمەن سويلەسىپ، ەكىجاقتى ساۋدا، ورتاق تاريح، رەسەي ساياساتى جانە ادام قۇقىعى تاقىرىبىن تالقىلادى. سۇحبات 8 اقپان كۇنى الىندى. “بىزدە قازاقستاندى دۇرىس بىلمەيدى” ازاتتىق: سۇحباتىمىزدى بالتىق ەلدەرى مەن قازاقستان اراسىنداعى ساۋدا قاتىناسى

  • باقسىلار ينستيتۋتى

    ساراپتاما (وقىساڭىز وكىنبەيسىز) ءبىرىنشى، ىلكىدە تۇركى بالاسىندا ارنايى قاعان قۇزىرەتى ءۇشىن جۇمىس ىستەيتىن كورىپكەل باقسىلار ينستيتۋتى بولعان. اتى باقسى بولعانىمەن حاننىڭ قىرىق كىسىلىك اقىلشىسى ەدى. كورىپكەل باقسىلار حان كەڭەسى كەزىندە الداعى قاندايدا ءبىر ساياسي وقيعا مەن سيتۋاتسيانى كۇنى بۇرتىن بولجاپ، ءدوپ باسىپ تالداپ ءھام ساراپتاپ بەرە الاتىن سونى قابىلەتتىڭ يەسى-ءتىن. ولاردى ساياسي كورىپكەلدەر دەپ اتاسا دا بولادى. حان ەكىنشى ءبىر ەلدى جەڭۋ ءۇشىن بىلەك كۇشىنەن بولەك كورىپكەل باقسىلاردىڭ ستراتەگيالىق بولجاۋىنا دا جۇگىنەتىن. قارسىلاس ەلدىڭ كورىپكەل باقسىلارى دا وڭاي ەمەس ارينە. ەكىنشى، ۋاقىت وتە كەلە ساياسي كورىپكەل باقسىلار تۇركىلىك بولمىستاعى ستراتەگيالىق مەكتەپ قالىپتاستىردى. تۇركى باقسىلارى قىتاي، ءۇندى، پارسى، ۇرىم ەلدەرىن جاۋلاپ الۋدا ماڭىزدى ءرول اتقاردى. ول كەزدەگى جاھاندىق جاۋلاسۋلار جەر، سۋ،

  • اقش سەناتى ۋكرايناعا قارجىلاي كومەك قاراستىرىلعان زاڭ جوباسىن ماقۇلدادى

    اقش كونگرەسى.  اقش سەناتى 13 اقپاندا ۋكراينا، يزرايل جانە تايۆانعا 95 ملرد دوللار بولاتىن قارجىلاي كومەك بەرۋ تۋرالى زاڭ جوباسىن ماقۇلدادى. سەناتتا دەموكراتتار باسىم ورىنعا يە. ەندى زاڭ جوباسىن رەسپۋبليكالىق پارتيا باسىم وكىلدەر پالاتاسى قارايدى. وكىلدەر پالاتاسىندا جوبانىڭ زاڭ ستاتۋسىن الۋعا مۇمكىندىگى از دەگەن بولجام دا ايتالادى. پرەزيدەنت-دەموكرات دجو بايدەن ءبىراز ۋاقىتتان بەرى ەكى پالاتانى ۋكراينا مەن اقش-تىڭ ءۇندى-تىنىق مۇحيت اۋماعىنداعى سەرىكتەستەرىنە كومەك بەرۋدى جىلدامداتۋعا شاقىرىپ كەلەدى. ۋكراينا بيلىگى باستى وداقتاسى اقش-تان قولداۋ ازايعان تۇستا قارۋ-جاراق جەتپەي جاتقانىن بىرنەشە رەت مالىمدەگەن. ۋكراينا پرەزيدەنتى ۆلاديمير زەلەنسكي بۇگىن، 13 اقپاندا اقش سەناتىنىڭ بۇل زاڭ جوباسىن ماقۇلداعانىنا العىس ايتتى. قۇجاتتا كيەۆكە 61 ملر دوللار بەرۋ قاراستىرىلعان. “امەريكانىڭ كومەگى ۋكرايناعا بەيبىت ءومىردى جاقىنداستىرىپ، الەمدىك

پىكىر قالدىرۋ

ەلەكتورندى پوشتاڭىز سىرتقا جاريالانبايدى. بەلگى قويىلعان ءورىستى تولتىرۋ مىندەتتى *

اتى-ءجونى *

Email *

سايتى

Kerey.kz/كەرەي.كز

ءبىز تۋرالى:

تەل: +7 7071039161
Email: kerey.qazaq@gmail.com

Kerey.kz ءتىڭ بۇرىنعى نۇسقاسىن http://old.kerey.kz تەن وقي الاسىزدار!

KEREY.KZ

سايت ماتەريالدارىن پايدالانعاندا دەرەككوزگە سىلتەمە كورسەتۋ مىندەتتى. اۆتورلار پىكىرى مەن رەداكتسيا كوزقاراسى سايكەس كەلە بەرمەۋى مۇمكىن. جارناما مەن حابارلاندىرۋلاردىڭ مازمۇنىنا جارناما بەرۋشى جاۋاپتى.

سايت ساناعى: