Aldağı 20 jılda barşa qazaqtıñ bolaşağı osı şved azamatına tikeley baylanıstı bolmaq.

Şveciyada tirkelgen, Euroodaqtıñ jasıl energetikadağı alpauıt kompaniyası – “SVEVIND Energy Group” törağası Vol'fgang Kroop älemdegi investorlardı Qazaqstanda mıñdağan jel men kün generatorların qoyıp, odan keletin ekologiyalıq taza elektr energiyasına “jasıl” gidrogen (sutegi) öndiretin zauıt jasauğa köndirdi. Qazaq dalasında, Kaspiy tübine qoyılatın zauıt “HYRASIA ONE” dep atalatın boladı.

Mañğıstau jazığında Şıñğıshannıñ äskerinen de köp kün batareyaları men jel generatorı salınadı. Olar 40 gigavatt quat beredi. Osı energiya Kaspiy teñiziniñ jağalauındağı elektrolizerlerdi aynaldıradı. Sonda zauıt jılına eki million tonna jasıl gidrogen (sutegi) öndiredi. Bwl 2030 jılı Euroodaq twtınuı mümkin barlıq sutegi köleminiñ 20 payızı. Bir sözben aytqanda, bwl sutegi älemindegi jaña Qaşağan, Teñiz ken orındarına para-par. Demek, erteñ mwnay bitse de, qazaqtıñ berekesi bitpeydi degen söz. Biz jaña mwnay – gidrogenniñ älemdegi iri oyınşısına aynalamız.

50 milliard dollar twratın jobanı älem investorlarınıñ pulı qarjılandıradı. Bwl bizdiñ Wlttıq qormen teñ. Biz özimiz onday eşteñe sala almas edik. Tehnologiyamız da, aqşamız da joq. Sondıqtan bizdi tañdağan, bizdiñ perspektivamızğa senip otırğan Kropp sındı azamattardı bağalauımız kerek.

2022 jıldıñ qazan ayında HYRASIA ONE Qazaqstan ükimetimen Investiciyalıq kelisimge qol qoydı. Biıl jobanı äzirleudiñ birinşi kezeñi sätti ayaqtaldı. “ILF Consulting Engineers” pen “Roland Berger” injenerleri koncepciyalıq zertteu jwmıstarın bitirip, investorlarğa tapsırdı.

Jospar boyınşa Qazaqstan 2030 jılı alğaş ret gidrogen öndirmek. Al 2032 jılı bizdegi teñdessiz tehnologiyalıq zauıt öziniñ tolıq quatına şığatın boladı.

Osı jwmıs orındalsa, onda biz (kömir men mwnay jaqpaytın) jaña däuirge auısatın bolamız.

Aybar Oljaev