سونىمەن، قاڭتار وقيعاسىنىڭ جىلدىعىنداعى “ارنايى پارلامەنتتىك تىڭداۋ” اياقتالدى. بۇل – البەتتە، ەلەۋلى وقيعا. جىلناماعا جازىلاتىن، ەرتەڭ تاڭبالانىپ قالاتىن، سەن ولگەن سوڭ دا ىزدەنگىش ۇرپاعىڭ اشاتىن جايت. ياعني، بۇگىن – قاڭتاردىڭ بىرجىلدىعىندا پارلامەنتتە قانداي مالىمدەمە جاساعانىڭ تۇگەل ساقتالدى، قۇجاتتالىپ قاتتالدى دەگەن ءسوز. 1986 جىلى جەلتوقسان وقيعاسىنان سوڭ ءبىراز قازاق زيالىسى “نام گوركو” دەگەن ماقالاعا قول قويىپ، جەلتوقسانشىلاردى “ۇلتشىل، ناركومان” دەپ قارالاعان. بەكحوجين، قايىربەكوۆ، سەركەباەۆ، اسانالىلەر قول قويعان ول حاتقا. مىناۋ دا سونىڭ ءبىر ءتۇرى. باسپروكۋراتۋرا مەن ىشكىسىميننىڭ بايانداماسى تۇسىنىكتى – ادەتتەگىدەي ايىپتاۋ سارىنىندا. “بۇلىكشىلەر مەن ارانداتۋشىلار ءبارىن قيراتتى” دەگەن سىڭايدا. بىراق، پروكۋرورلاردىڭ الدىنا ءتۇسىپ ەمپەڭدەپ، بيلىكتى اقتاپ، “ارانداتۋشىلار مەن بۇلىكشىلەر” تۋرالى سايراپ كەتكەن دەپۋتاتتارعا نە جورىق؟

دەپۋتات ج.ءاشىمجان: “قاڭتاردا سينتەتيكالىق ەسىرتكى مەن اششى سۋعا تويىپ العاندار بۇلىك سالدى” دەگەندى قانداي فاكتىمەن، قانداي تەرگەۋ ماتەريالدارىنا سۇيەنىپ ايتتى، بىلگىم كەلەدى؟ 86 جىلعى جاستاردى ناركومان دەپ ايىپتاعاندار قاتارىنان ءوزىنىڭ دە تابىلعانىن سەزە مە ەكەن، جاناربەك؟ دەپۋتات ق.يسا: “19 اسكەري قازا بولدى” دەپ قابىرعاسى قايىسقاندا وزگە 220 بوزداق پەن ونىڭ اراسىنداعى ءسابي ايكوركەمدى ايتۋعا، قۇنىن داۋلاۋعا ءداتى نەگە جەتپەدى، ەستىگىم كەلەدى؟ ەڭ بولماسا اقىن رەتىندە ونىڭ جۇرەگىنە ءتورت جاسار ءسابيدىڭ ناقاق ءولىمى باتپادى ما؟ ءسابي مەن ناقاق قۇرباندار قۇقىعىن سۇراۋعا نەگە اتتامادى؟ دەپۋتات ە.جاڭبىرشين “ەسكەرتۋسىز وق اتۋ بۇيرىعىن” اقتاۋعا تىرىسىپ، “ماڭعىستاۋدا، قوستانايدا، پاۆلوداردا نەگە اتپادى، الماتىداعى جۇرت قارۋلى بولعاسىن اتتى؟!” دەپ اشۋلاندى. ماڭعىستاۋدىڭ بەيبىت ميتينگىسىن الماتىنىڭ قاھارلى كۇندەرىمەن قيسىنسىزداۋ سالىستىرىپ كەتتى. ال التىنشى قاڭتاردا الماتىنىڭ الاڭىندا ء“بىز تەرروريست ەمەسپىز” دەپ پلاكات كوتەرگەن قارۋسىز حالىققا تۇتقيىل شابۋىلداپ، قىرىپ تاستاعان اسكەردى ەسىنە المادى، سۇراۋ سالمادى…

قازىر پارلامەنت پەن وكىمەت قانشا جەردەن تىرمىسسا دا، قاڭتاردا بيلىك تاراپىنان قىلمىس بار. ءولتىرۋ بار. اڭىراعان انا بار، كەكتەنگەن جەتىم دە وسەر. ال ادام اتۋعا بۇيرىق بەرۋشى ءاۋ باستان انىق. ەندىگى سۇراق، از كۇندىك بيلەۋشىنى اقتاپ، ونىمەن بىرگە موينىڭا قان جۇكتەۋگە دايارسىڭ با، دەپۋتات؟

قاسىم امانجول