AQŞ-tıñ Mäskeudegi elşisi Reseyde jürgen AQŞ azamattarına tez arada Reseyden ketip qaluğa şaqırdı. Aqparat elşilik saytına jariyalanğan.

Oğan sebep retinde “Resey äskeriniñ Ukrainağa jappay basıp kiruiniñ boljap bolmaytın saldarın, Resey qwqıq qorğau organdarınıñ AQŞ azamattarın qudalau mümkindigin, Reseymen aradağı transport baylanısınıñ qiındağanın, Reseydegi AQŞ elşiginiñ Amerika azamattarına kömek beru mümkindiginiñ şektelgenin jäne terror qaupin” atağan. AQŞ azamattarına Reseyge kelmey-aq qoyudı wsınğan.

Elşilik habarında, bıltır qırküyek ayında mobilizaciya jariyalağan Resey qos azamattığı, yağni AQŞ pen Resey azamattığı bar adamdardı äskerge aluı mümkin ekeni aytılğan.

Habarda halıqaralıq qaipsizdik normaların saqtamaytın Resey äue jelilerimen sayahattaudıñ qauipti bolıp bara jatqanın da söz bolğan. Onıñ işinde AQŞ elşiliginiñ qızmetkerlerine Resey äue kompaniyalarımen wşuğa rwqsat berilmeytini atap körsetilgen.

Bıltır AQŞ elşiligi amerikalıqtardı Reseyden dereu ketuge eki ret şaqırğan edi. Alğaşqıda 28 aqpanda, yağni Resey äskeri Ukraina jerine basıp kirgen soñ, ekinşisi – 28 qırküyekte, yağni Resey äskerine mobilizaciya jariyalağan soñ ündeu tastağan.

Resey biligi äskerge şaqıru ayaqtaldı dese de, mobilizaciya turalı turalı jarlıqtıñ küşi joyılğan joq, ol kez kelgen sätte qayta jalğasuı mümkin. AQŞ elşiliginiñ habarı “Resey äskeri Ukrainada jaña şabuıl bastauı mümkin” degen aqparattar köbeygen twsta jariyalanıp otır. Ukraina barlauı soğıs bastalğan künniñ bir jıldığı – 24 aqpanda Resey jaña şabuıl bastauı mümkin dep sanaydı.

Düysenbide Resey sırtqı barlau qızmetiniñ basşısı Sergey Narışkin Resey men TMD elderinde terakt jasau üşin Tayau Şığıstan “jihadşıl sodırlar tobın äzirlep jatır” dep AQŞ-tı ayıptağan. Vaşington bwğan tüsinikteme bergen joq.

Azat Europa / Azattıq radiosı