سپۋتنيكتەن تۇسىرىلگەن سۋرەتتەر مەن قولدا بار وزگە دە دەرەكتەر 1 ماۋسىم كۇنى ۋكراين دروندارى رەسەي اسكەري اەرودرومدارىنا جاساعان شابۋىلدىڭ سالدارىنان رەسەي كەمىندە 10 ستراتەگيالىق بومبالاۋشى ۇشاعىنان ايىرىلعانىن راستايدى دەپ حابارلادى ازاتتىقتىڭ ورىس قىزمەتى.
“ستراتەگيالىق بومبالاۋشى ۇشاقتار جويىلعان”
OSINT-تالداۋشى كريس بيگگەرس 2 ماۋسىم كۇنى تاڭەرتەڭ رەسەيدىڭ يركۋتسك وبلىسىنداعى “بەلايا” اەرودرومىنا ۋكراين دروندارى جاساعان شابۋىلدان كەيىن سپۋتنيكتەن تۇسىرىلگەن سۋرەتتەردى جاريالادى. بۇل سۋرەتتەر ءتىپتى بۇلتتىڭ ار جاعىنان دا جەر بەتىندەگى نىسانداردى “كورە” الاتىن جاساندى اپەرتۋرالى راداردىڭ (SAR) كومەگىمەن تۇسىرىلگەن.
فوتوسۋرەتتەرگە قاراعاندا، اسكەري اۋە بازاسىندا 4 تۋ-95 جانە 4 تۋ-22 ستراتەگيالىق بومبالاۋشى ۇشاق جويىلعانعا ۇقسايدى.
شابۋىلعا ۇشىراعان رەسەيدىڭ ەكىنشى اسكەري اۋە بازاسى – مۋرمانسك وبلىسىنداعى “ولەنيا” اەرودرومىنىڭ ازىرگە سپۋتنيكتەن تۇسىرىلگەن سۋرەتتەرى جوق. الايدا ۋكراينانىڭ قاۋىپسىزدىك قىزمەتى (سبۋ) جاريالاعان دروننان تۇسىرىلگەن ۆيدەولاردىڭ كومەگىمەن 1 ماۋسىمدا رەسەيدىڭ اسكەري اەرودرومدارىنا جاسالعان، بۇرىن-سوڭدى بولماعان شابۋىلدىڭ جالپى اۋقىمىن باعامداۋعا بولادى.
Intelshizo دەگەن اتپەن تىركەلگەن ح الەۋمەتتىك جەلىسىن قولدانۋشى جۇرگىزگەن ەسەپتەۋلەرگە جۇگىنسەك، “بەلايا” جانە “ولەنيا” اەرودرومدارىندا كەمىندە:
• 7 تۋ-95 ستراتەگيالىق بومبالاۋشى ۇشاعى (تاعى بىرەۋى زاقىمدانعان),
• 4 تۋ-22 ستراتەگيالىق بومبالاۋشى ۇشاعى،
• 1 ان-22 اسكەري-كولىك ۇشاعى جويىلعان.
ۋكراينانىڭ “وكو گورا ✙ جاڭالىقتار مەن تالداۋ” اتتى telegram-رەسۋرسى مۋرمانسك وبلىسىنداعى “ولەنيا” اەرودرومىنىڭ سۋرەتتەرىن جاريالادى. ولارعا سايكەس، ۋكراين دروندارى اەرودرومدا تۇرعان بەس ۇشاققا شابۋىل جاساعان: تورتەۋى – تۋ-95 ستراتەگيالىق بومبالاۋشى ۇشاعى، ال بىرەۋى – ان-12 اسكەري-كولىك ۇشاعى.
ۋكراينانىڭ “ورمەك” وپەراتسياسى
جەكسەنبى، 1 ماۋسىم كۇنى رەسەيدىڭ بىرنەشە وڭىرىندەگى اسكەري اۋە بازالارىنا دروندار شابۋىل جاسادى. ۋكراينانىڭ ارناۋلى قىزمەتى رەسەيدىڭ 40 اسكەري ۇشاعىن جويۋدى كوزدەگەن “ورمەك” (“پاۋتينا”) وپەراتسياسى جايلى حابارلادى.
درون شابۋىلدارىنىڭ ناتيجەسىندە 13 ۇشاق جويىلعان دەپ حابارلادى ۋكراينا ۇلتتىق قاۋىپسىزدىك جانە قورعانىس كەڭەسى جانىنداعى جالعان اقپارات تاراتۋمەن كۇرەس ورتالىعىنىڭ جەتەكشىسى اندرەي كوۆالەنكو.
ونىڭ ايتۋىنشا، زاقىمدالعان ۇشاق سانى بۇدان دا كوپ. ۋكراينا قاۋىپسىزدىك قىزمەتى (سبۋ) كەيىنىرەك تاراتقان مالىمدەمەسىندە رەسەيدىڭ ستراتەگيالىق اۋە كۇشتەرىنىڭ 41 ۇشاعى زاقىمدانعانى ايتىلعان. “درون جاسالعان شابۋىل ناتيجەسىندە ا-50, تۋ-95, تۋ-22م3 جانە تۋ-160 سياقتى 41 ۇشاققا زالال كەلتىرىلدى”، – دەلىنگەن سبۋ باسشىسى ۆاسيلي ماليۋكتىڭ مالىمدەمەسىندە.
ۋكراينا پرەزيدەنتى ۆلاديمير زەلەنسكي جەكسەنبى كۇنى رەسەيدىڭ بىرنەشە وڭىرىندە 117 FPV-دروننىڭ كومەگىمەن جاسالعان شابۋىلدار ناتيجەسىندە “رەسەيدىڭ نەگىزگى اەرودرومدارىندا تۇرعان قاناتتى زىمىران تاسىمالداۋشى ستراتەگيالىق ۇشاقتاردىڭ 34%”، ياعني 43 ۇشاق زاقىمداندى نەمەسە جويىلدى” دەپ حابارلاعان.
قازىرگى تاڭدا انىق بەلگىلىسى – مۋرمانسك جانە يركۋتسك وبلىستارىنداعى ەكى اۋە بازاسىندا ۇشاقتار زاقىمدانعان نەمەسە جويىلعان. سبۋ حابارلامالارىندا اتالعان يۆانوۆ، ريازان جانە امۋر وبلىستارىنداعى اەرودرومدارعا جاسالعان شابۋىلدار تويتارىلدى دەپ حابارلادى رەسەي قورعانىس مينيسترلىگى.
مۋرمانسك پەن يركۋتسك وبلىستارىنداعى اۋە بازالارىنا شابۋىل جاساعان دروندار جۇك كولىكتەرىنەن ۇشىرىلعان. وعان كۋاگەرلەر ءتۇسىرىپ، جەلىدە تاراعان كوپتەگەن ۆيدەودەرەكتەر ايعاق.
1 ماۋسىم، جەكسەنبى كۇنى مۋرمانسك جانە يركۋتسك وبلىستارىنا شابۋىل جاساعان دروندار تيەلگەن كونتەينەرلەر چەليابينسك قالاسىنداعى قويمادا جينالعان بولۋى مۇمكىن. مۇنداي جورامالدى OSINT-ماماندارىنىڭ ايتقانىنا سۇيەنىپ، Baza جانە Mash telegram-ارنالارى حابارلادى. ماماندار ۋكراين دەرەككوزدەرى جاريالاعان فوتوسۋرەتتەردى زەرتتەپ، چەليابينسكىدەگى سۆەردلوۆ تاس جولى بويىندا سوعان ۇقساس قويما بارىن انىقتاعان.
ۋكراينا پرەزيدەنتى ۆلاديمير زەلەنسكي رەسەيدىڭ ستراتەگيالىق اەرودرومدارىنا دروندارمەن شابۋىل جاساۋ – ۋكراينا قاۋىپسىزدىك قىزمەتىنىڭ ارنايى وپەراتسياسى بولعانىن راستادى. “ناتيجەسى وتە كەرەمەت بولدى. مۇنى ۋكراينا ءوز كۇشىمەن ىسكە اسىردى. جوسپارلاۋعا كىرىسكەننەن باستاپ ءساتتى جۇزەگە اسىرعانعا دەيىن ءبىر جىل، التى اي، توعىز كۇن ءوتتى. بۇل – ەڭ الىستاعى نىساناعا سوققى بەرگەن وپەراتسيامىز”، – دەپ جازدى ۋكراينا پرەزيدەنتى سبۋ باسشىسى ۆاسيلي ماليۋكپەن كەزدەسكەننەن كەيىن Telegram پاراقشاسىندا.
رەسەي قورعانىس مينيسترلىگى بۇل وقيعانى “تەراكت” دەپ اتادى. رەسەيلىك اسكەري بلوگەرلەردىڭ كوپشىلىگى تەوريا جۇزىندە مۇنداي شابۋىل رەسەيدىڭ يادرولىق دوكتريناسىندا جازىلعان “ستراتەگيالىق يادرولىق كۇشتەر نىساندارىنا جاسالعان شابۋىلعا يادرولىق قارۋمەن قارىمتا قايتارۋعا بولادى” دەگەن قاعيداعا ساي كەلەدى دەپ جازدى. الايدا ازىرگە رەسەي باسشىلىعى بۇل شابۋىلعا بايلانىستى ەشقانداي رەسمي رەاكتسيا بىلدىرگەن جوق.
“جۇك كولىگىمنىڭ ىشىنەن دروندار ۇشىپ شىقتى”
رەسەيلىك تەلەگرام-ارنالار ۋكراين FPV-دروندارى چەليابينسك قالاسىنداعى قويمادا ساقتالعان، ال ولاردى تيەگەن جۇك كولىكتەرى چەليابينسك ايماعىنا تيەسىلى مەملەكەتتىك نومىرلەرمەن تىركەلگەن دەپ جازدى.
رەسەيلىك قۇقىق قورعاۋ ورگاندارىنا جاقىن Baza telegram-ارناسىنىڭ مالىمەتىنشە، دروندار اۆتوتۇراقتا تۇرعان جۇك كولىكتەرىنەن ۇشىپ شىققان. Baza-نىڭ جازۋىنشا، رەسەيلىك تەرگەۋشىلەر جاۋاپ العان جۇك كولىگى جۇرگىزۋشىلەرىنىڭ ءبىرى – چەليابينسك تۇرعىنى، 55 جاستاعى الەكساندر – كولىكتىڭ يەسى 37 جاستاعى ارتيوم ەسىمدى ادام ەكەنىن ايتقان. ارتيومگە مۋرمانسك وبلىسىنداعى ءبىر كاسىپكەردەن كولسك اۋدانىنا ءتورت قۇراستىرمالى ءۇيدى جەتكىزۋ تۋرالى تاپسىرىس تۇسكەن.
باعاسىن كەلىسكەننەن كەيىن چەليابينسك تۇرعىنى الگى “تاۋاردى” جۇك كولىگىنە تيەپ الىپ، مەجەلى جەرگە قاراي جولعا شىققان. جول بويى وعان بەلگىسىز بىرەۋ حابارلاسىپ، قاي جەردە توقتاۋ كەرەگىن ايتىپ، ءجون سىلتەپ وتىرعان. ونىڭ سوڭعى بەرگەن نۇسقاۋى – اسكەري اەرودروم ماڭىنداعى “روسنەفت” جانارماي قۇيۋ ستانساسى جانىندا توقتا دەپ ايتقان. ءدال سول جەردە كولىگىنەن اۋەگە دروندار ۇشا باستاعان.
وزگە جۇك كولىگىن جۇرگىزۋشىلەر دە وسىعان ۇقساس وقيعالاردى بايانداعان. 46 جاستاعى سەرگەي ەسىمدى جۇرگىزۋشى ريازان قالاسىنا كىرگەن كەزدە، ءجۇرىپ بارا جاتقان كولىگىنىڭ توبەسى سىپىرىلىپ قالىپ، ىشىنەن دروندار ۇشا باستاعانىن ايتقان. قۇقىق قورعاۋ ورگاندارى كولىكتەردىڭ “يەسىن” ىزدەستىرىپ جاتىر. الدىن الا مالىمەت بويىنشا، ول – ۋكراينا تۋماسى كورىنەدى دەپ جازدى رەسەيلىك بلوگەرلەر.
“وستوروجنو، نوۆوستي” telegram-ارناسى مۋرمانسك وبلىسىنداعى ولەنەگورسك قالاسىنىڭ تۇرعىندارى جارىلىستار مەن ءورت بولعانىن حابارلادى دەپ جازدى. قالانىڭ ىرگەسىندە “ولەنيا” اسكەري اەرودرومى بار. Supernova+ telegram-ارناسى كەمىندە ون جارىلىس ەستىلگەن دەيدى.
الەۋمەتتىك جەلىلەردە اقپارات تاراپ كەتكەننەن كەيىن مۋرمانسك وبلىسىنىڭ گۋبەرناتورى اندرەي چيبيس ايماققا دروندار شابۋىل جاساعانىن راستادى. الايدا ول شابۋىلداردىڭ ناقتى قاي جەردە جانە قانداي نىساندارعا جاسالعانى جايلى اقپارات بەرمەدى. شەنەۋنىك حالىقتى دروندارعا قاتىستى فوتو جانە ۆيدەولاردى الەۋمەتتىك جەلىگە جۇكتەمەۋگە جانە ەشكىمگە جىبەرمەۋگە ۇندەدى.
بۇل رەسەي ۋكرايناعا باسقىنشىلىق سوعىسىن باستاعان 2022 جىلدان بەرى العاش رەت سىبىرگە جاسالعان درون شابۋىلى بولدى. يركۋتسك وبلىسىنىڭ گۋبەرناتورى يگور كوبزەۆتىڭ ايتۋىنشا، سرەدني كەنتىندەگى اسكەري ءبولىم شابۋىلعا ۇشىراعان.
“نوۆومالتينسك ەلدى مەكەنىندەگى ەسكى عيماراتقا ءبىر درون ءتۇستى. درونداردىڭ ناقتى سانى ءالى انىقتالعان جوق”، – دەدى ول.
بۇعان قوسا، كوبزەۆ دروندار ۇشىپ شىققان جۇك كولىگى “بۇعاتتالعانىن” حابارلادى.
بۇعان دەيىن الەۋمەتتىك جەلىلەردە يركۋتسك وبلىسى ۋسولسك اۋدانىندا اۋەگە ءتۇتىن كوتەرىلىپ جاتقانى كورىنەتىن فوتوسۋرەتتەر مەن ۆيدەولار جاريالانعان. ول جەردە رەسەيلىك تۋ-22م3 بومبالاۋشى ۇشاقتارى جايعاسقان “بەلايا” اسكەري اەرودرومى بار.
ريازان وبلىسىنىڭ گۋبەرناتورى پاۆەل مالكوۆ تا ءوزى باسقاراتىن وڭىرگە دروندار شابۋىلداعانىن حابارلادى. ونىڭ ايتۋىنشا، ەشكىم زارداپ شەكپەگەن.
ۋكراينالىق “بابەل” باسىلىمى ءوز دەرەككوزدەرىنە سۇيەنىپ، ۋكراينا ارناۋلى قىزمەتتەرى 40-تان استام رەسەيلىك اسكەري ۇشاقتى (اراسىندا ا-50, تۋ-95 جانە تۋ-22م3 بار) جويۋدى كوزدەگەن “ورمەك” وپەراتسياسىن ىسكە اسىردى دەپ حابارلادى.
جۋرناليستەر بىرنەشە ۆيدەو دا جاريالادى. سولاردىڭ بىرىندە يركۋتسك وبلىسىنداعى “بەلايا” اسكەري اەرودرومىنا درون شابۋىلى جاسالعان ءسات دەپ كورسەتىلگەن بەينەجازبا بار.
كەيىنىرەك “بابەل” باسىلىمىنىڭ ۋكراينا قاۋىپسىزدىك قىزمەتىندەگى دەرەككوزدەرى ۋكراين دروندارى رەسەيدەگى ءتورت اسكەري نىساندى – “بەلايا”، “دياگيلەۆو”، “ولەنيا” جانە “يۆانوۆو” اەرودرومدارىنا شابۋىل جاساعانىن راستاعان.
دەرەككوزدەردىڭ ايتۋىنشا، ۋكراينا ارناۋلى قىزمەتتەرى رەسەي اسكەري اەرودرومدارىنا شابۋىل جاساۋ وپەراتسياسىنا ءبىر جارىم جىل بويى دايىندالعان. ونى ۋكراينا پرەزيدەنتى ۆلاديمير زەلەنسكيدىڭ ءوزى تىكەلەي قاداعالاعان، ال وپەراتسيانى ۋكراينا قاۋىپسىزدىك قىزمەتىنىڭ باسشىسى ۆاسيلي ماليۋك پەن ونىڭ قولاستىنداعى قىزمەتكەرلەر جۇزەگە اسىرعان.
الدىمەن رەسەيگە درونداردى، ودان سوڭ ارناۋلى كونتەينەرلەردى جەتكىزگەن. كەيىنىرەك سول كونتەينەرلەرگە درونداردى جاسىرىپ ورنالاستىرعان. ال كونتەينەرلەر قاقپاعىن اشۋدى جانە ىشىنە جاسىرىلعان درونداردى ۇشىرۋدى قاشىقتان باسقارعان.
ۋكراينا ارناۋلى قىزمەتى “جيىنتىعى 41 رەسەيلىك ۇشاققا شابۋىل جاسالدى، بۇل وپەراتسياعا قاتىسقان ادامدار قازىر ۋكراينادا” دەپ حابارلادى.
Axios باسىلىمى اتى-ءجونى اتالماعان ۋكراين شەنەۋنىگىنىڭ سوزىنە سۇيەنىپ، ۋكراينا بۇل وپەراتسيا جونىندە اقش پرەزيدەنتى دونالد ترامپ اكىمشىلىگىن الدىن الا حاباردار ەتكەن دەپ جازدى. ال CBS News دەرەككوزدەرى بولسا، اق ءۇي بۇل شابۋىلدان حابارسىز بولعان دەپ ايتقان.
پىكىر قالدىرۋ