Andrey Ermak wşaqtan tüse sala öziniñ bastığın qwşaqtadı.

2019 jılı qırküyekte prezident Zelenskiymen jılı jüzdesu jañadan bastalıp kele jatqan sayasi seriktestiktiñ bası edi. Bwl – Ermaktıñ Resey türmesinde otırğan 35 ukrainalıqtı Mäskeuden alıp kelgen säti.

Al 2020 jılı Ermak Zelenskiy äkimşiliginiñ basşısı boldı. Biraq Ukrainadağı jemqorlıq şuınan keyin onıñ qızmetine jwrttıñ nazarı audı.

Sebebi Ermak Ukraina energetikalıq infraqwrılımına bölingen qarjı jımqırılğan korrupciya shemasında negizgi rölde bolğan degen aqparat tarağan. Biraq tergeuşiler bwl jayttıñ jay-japsarın tolıq aşqan joq. Ermaktıñ özi Azattıqtıñ Ukraina qızmetiniñ resmi saualdarına jauap bergen joq.

Sonımen Zelenskiydiñ keñsesin basqarıp otırğan Ermak kim?

TELEVIDENIEDEN SAYASATQA

Zelenskiy sayasatqa kelmey twrıp-aq Ermakpen etene jaqın edi.

Mäselen, Ermak Zelenskiydiñ “Sluga naroda” äzil şouın şığarumen aynalısqan “Kvartal 95″ studiyasına zañgerlik qızmet körsetken zañ kompaniyasın basqarğan. Al Zelenskiy “Sluga naroda” şouında prezidenttiñ rölin somdap jwrtqa tanılğan edi.

“Olardıñ qarım-qatınası şamamen 2010 jıldarı bastalğan” deydi AQŞ-tağı Marşall nemis qorınıñ ğılımi qızmetkeri Elena Prokopenko Azattıqqa. “Zelenskiy Ermakqa senetindey basqa adamğa senbeydi. Ermak – Ukrainanıñ sayasi ömirindegi jalğız senetin adamı jäne senimdi serigi”.

Bwl senim keyin Ermaktıñ sayasatqa keluine äser etti. Ol 2019 jılı Zelenskiy prezident bolıp saylanğan soñ sırtqı sayasat boyınşa keñesşisi bolıp tağayındaldı.

Däl osı qızmette Ermak 2014 jıldan bastap Ukrainanıñ şığısındağı qaqtığıstarda Reseymen twtqın almasu boyınşa kelissözder jürgizdi. Ol Zelenskiydiñ Vaşingtonmen baylanısta da bastı adamı boldı. AQŞ-ta impiçment isi boyınşa tıñdauda Ermaktıñ prezident Donal'd Tramptıñ advokatı Rudi Djulianimen baylanısı bolğanına dälelder şıqqan.

“Biz AQŞ-tı dos äri strategiyalıq seriktes dep qarastıramız. Onda bolıp jatqan jağday – olardıñ işki isi. Bwl iste bizdiñ eşqanday rölimiz joq” degen edi sol kezde Ermak.

Al 2020 jılı aqpanda Zelenskiy Ermaktı prezident keñsesiniñ basşısı etip tağayındadı. Sol kezde ol “Nastoyaşee vremya” telearnasına “Ukrainanıñ şığısındağı qaqtığısqa köp nazar audaratının” aytqan.

“Prezident üşin jäne prezident äkimşiligi üşin bastı maqsat – Donbasstağı soğıstı toqtatu” dep mälimdegen edi sol kezde ol.

TAQTIÑ TASASINDAĞI KÜŞ

Biraq sınşılar Ermaktıñ röli küşeyip, ol prezident äkimşiligin qazirgi biliktiñ ıqpalın arttıruğa paydaladı dep sanaydı. Tipti Ermaktıñ ıqpalı qattı sezilgeni sonşa ukrainalıqtar arasında “şeteldik investorlar men sayasatkerler Kievke Zelenskiymen kezdesuge keledi, al Zelenskiy olarğa Ermaktı tanıstıradı” degen äzil de aytıla bastadı.

“Ol eldegi mañızdı şeşimderdiñ barlığına äser etedi. Ermaktı elde prezidentten keyingi ekinşi adam deuge boladı” degen edi 2021 jılı şildede Ukrainanıñ eks-prem'eri Aleksey Gonçaruk Azattıqqa bergen swhbatında.

Ukrainada Ermaktı “sırtqı saytqa, şeneunikterdi tağayındauğa äser etti, Zelenskiyge “öterdegi qaqpaq boldı” dep ayıptaytındar bar. Bwl sın äli de jalğasıp keledi.

“Olar eldi bilep otır, solar küştik qwrılımdardı jiınğa şaqıradı. Bükil halıq qazir memleketti kim basqarıp otırğanın biledi” degen edi oppoziciyalıq deputat Irina Gereşenko Azattıqtıñ Ukraina qızmetine 19 qaraşada.

2022 jılı aqpanda Resey Ukrainağa basıp kirgende Ermak Zelenskiymen Kievte qalğandardıñ qatarında bolğan. Sol kezde AQŞ Zelenskiyge elden ketudi wsınğanı aytıladı.

Al soğıstıñ birinşi küni Zelenskiy selfi-video jariyalap, “eşqayda ketpedik, osındamız” degen edi. Sol kezde Ermak basşısınıñ sol jağında twrğan.

Amerikalıq jurnalist Saymon Şuster 2024 jılı jariyalağan “Şoumen” kitabında “Ermak pen Zelenskiy soğıstın alğaşqı sağattarında bir-biriniñ janında bolğanın”, “stresten arılu üşin keşkisin şarap işkenin” jazadı.

“Olar siam egizderdey, ekeui bes jıl birge jwmıs istegende bir bütinge aynaldı” deydi Kievtegi “Penta” sayasi zertteu institutınıñ jetekşisi Vladimir Fesenko Azattıqqa.

Ermak Reseydiñ basqınşılıq soğısı jalğasıp jatqan twsta sırtqı sayasatta da mañızdı rölge ie bolıp, köptegen diplomatiyalıq kezdesulerge qatısıp jür.

Biraq qazir Ukrainada şu tuğızğan “Energoatom” aynalasındağı jemqorlıq dauında Ermaktıñ da atı atala bastadı. Bwl şudan soñ Ukrainada ädilet ministri jäne energetika ministri qızmetten ketti. Al Zelenskiydiñ “Kvartal 95″ studiyasındağı seriktesi bolğan Timur Mindiç elden qaştı. Jemqorlıq şuına baylanıstı qazir bes küdikti qamauda ya üyqamaqta.

ALI BABA

Qaraşanıñ ortasında Ukrainanıñ jemqorlıqqa qarsı wlttıq byurosı (NABU) energetika salasındağı jemqorlıq josparı talqılanğan audiojazbalardı jariyaladı. Bwl audiodağı adamdar bir-birin laqap attarmen ataydı.

Ukraina deputattarı audiolardağı “Ali Baba” degen adam Ermak dep küdiktengen. Mäselen, deputat YAroslav Jeleznyak “audioda Ermak NABU qızmetkerlerin tergeu turalı bwyrıq beredi” deydi.

NABU “Ali Babanıñ” kim ekenine qatıstı eşteñe aytpadı. Biraq deputattardıñ küdiginen soñ elde Ermaktı otstavkağa ketiru talabı küşeydi.

“Zelenskiydiñ Ermakqa bergen ökileti däl osı jemqorlıq shemasın jüzege asıruğa mümkindik jasağanın bäri tüsinedi” deydi Ukrainadağı jemqorlıq mäselesin köterip jürgen belsendi Oleg Rıbaçuk Azattıqqa.

Viktor YUşenko prezident bolıp twrğan twsta prezident keñsesin (2005-2006 jıldarı) basqarğan Rıbaçuk “Ol özin prezidenttiñ şın dosımın, ol üşin ömirim men sayasi kar'eramdı qwrban etuge dayınmın deydi. Şınımen solay bolsa otstavkağa ketu keregin nege tüsinbeydi?” deydi.

Bwğan qosa, Zelenskiydiñ “ekeumiz birge keldik jäne birge ketemiz” degen sözi de olardıñ öte jaqın ekenine tağı bir dälel.

Al Ermaktıñ jemqorlıq dauına ilinui Zelenskiyge de köleñke tüsirdi.

“Zelenskiy üşin Ermaktıñ ostavkağa ketui oñ qolın kesip tastaumen teñ. Eger Ermak ornınan quılsa oppoziciyanıñ kelesi nısanası Zelenskiydiñ özi bolmaq” deydi sayasattanuşı Fesenko.

Azat Europa / Azattıq radiosı