ترامپ كانديداتتارى رەسەيگە قاتىستى قاتاڭ ۇستانىمدا بولۋعا شاقىردى
اقش-تىڭ بولاشاق پرەزيدەنتى دونالد ترامپتىڭ ەلدىڭ ۇلتتىق قاۋىپسىزدىك ورگاندارىنىڭ باسشىلىعىنا ۇسىنعان ەكى كانديداتى رەسەيدىڭ اقش پەن ەۋروپا وداعىنداعى (ەو) ينستيتۋتتار جۇمىسىن بۇزۋعا ۇمتىلىپ وتىرعانىن مالىمدەپ، ماسكەۋمەن قارىم-قاتىناستا الدەقايدا قاتاڭ ساياسات ۇستانۋعا شاقىردى. پەنتاگون باسشىلىعىنا ۇسىنىلعان دجەيمس مەتتيس پەن ورتالىق بارلاۋ باسقارماسى (تسرۋ) ديرەكتورلىعىنا ۇسىنىلعان مايك پومپەونىڭ مۇنداي مالىمدەمەلەرى ترامپتىڭ سايلاۋالدى كامپانياسىندا جانە سايلاۋدان كەيىن ۇستانعان كوزقاراستارىنا قايشى كەلەدى. مەتتيس پەن پومپەو 12 قاڭتاردا سەناتتا وتكەن جەكە تىڭداۋدا رەسەيدى باسقىنشى ويىنشى دەپ اتاپ، اقش-تىڭ وعان حالىقارالىق ارەنادا قاتاڭ قارسىلىق تانىتۋى كەرەگىن مالىمدەدى.
اقش تەڭىز جاياۋ اسكەرىنىڭ بۇرىنعى گەنەرالى دجەيمس مەتتيس رەسەي پرەزيدەنتى ۆلاديمير ءپۋتيننىڭ ناتو-نى بۇزۋعا تالپىنىپ وتىرعانىن ايتىپ، ۆاشينگتوننىڭ بۇل ساياساتقا قارسى تۇرۋى كەرەگىن مالىمدەدى. ول رەسەيدىڭ “ستراتەگيالىق باسەكەلەس” جولىن تاڭداپ العانىن دا ايتتى. مەتتيس ىنتىماقتاستىققا قارسى ەمەسىن، دەگەنمەن ۆاشينگتون كرەملدىڭ ارەكەتىن بايىپتى تۇردە باعالاۋى ءتيىس ەكەنىن جەتكىزدى. ازات ەۋروپا / ازاتتىق راديوسى
پىكىر قالدىرۋ