عالىم بوقاش مەرەيلى 50 جاستا
kerey.kz
بۇگىن اتامىزدىڭ ەڭ جاقىن شاكىرتتەرىنىڭ ءبىرى، ءبىزدىڭ باۋىرىمىز، قازاقتىڭ ماقتان تۇتاتىن جاستارىنىڭ ءبىرى عالىم بوقاش مەرەيلى 50 جاسقا تولىپ وتىر.
ءبىز ءۇشىن بۇل كۇن – جاي عانا عالىمنىڭ تۋعان كۇن ەمەس، بۇل – ونىڭ جارتى عاسىرلىق ونەگەلى ءومىر جولىنىڭ، ادال ەڭبەگىنىڭ، بيىك پاراسات پەن ادامگەرشىلىگىنىڭ مەرەكەسى.
ءبىز عالىمدى تەك تەرەڭ ءبىلىمى ءۇشىن ەمەس، ۇلكەن جۇرەگى ءۇشىن قادىرلەيمىز. عالىمنىڭ الەمنىڭ ەڭ بەدەلدى وقۋ ورىندارىنىڭ ءبىرى – وكسفورد ۋنيۆەرسيتەتىندە ءبىلىم الىپ، “ازاتتىق راديوسىندا جەمىستى ەڭبەك ەتىپ، بۇگىندە امەريكا قۇراما شتاتتارىنىڭ مەملەكەتتىك قىزمەتىندە ابىرويلى جۇمىس اتقارىپ جۇرگەنى ونىڭ تاباندىلىعىنىڭ، بىلىمگە قۇشتارلىعىنىڭ جانە ەڭبەكقورلىعىنىڭ ايقىن كورىنىسى.
الايدا ادامنىڭ شىنايى باعاسى ونىڭ قىزمەتىمەن نەمەسە جەتكەن جەتىستىكتەرىمەن عانا ولشەنبەسە كەرەك. ادامنىڭ قادىرى ونىڭ جۇرەگىندە، ادامگەرشىلىگىندە، قيىندىققا توتەپ بەرە بىلۋىندە.
ءومىر عالىم مەن جارى الياعا سىناقتىڭ سىناعىن بەرگەن ەكەن. الايدا ولاردىڭ قانداي جاعدايدا دا سابىر مەن پاراساتتان اينىماعاندارىنا كۋا بوپ كەلە جاتىرمىز. اسىرەسە بالالارىنا دەگەن شەكسىز ماحابباتى بەن قامقورلىقتارى – ناعىز ەرلىك پەن اتا-انالىق ادالدىقتىڭ ۇلگىسى. ولاردىڭ كۇندىز-ءتۇنى تالماي جاساپ كەلە جاتقان قامقورلىقتارى كوپشىلىككە كورىنبەۋى مۇمكىن، بىراق ونىڭ قادىرىن اللا دا، جاقىندارى دا بىلەدى.
عالىم – دوستىققا ادال، سوزىنە بەرىك، جۇرەگى جۇمساق، جانى تازا ازامات. ءبىز عالىمدى قيىن ساتتە جانىڭنان تابىلاتىن، قۋانىشتا شىن كوڭىلمەن قۋانا بىلەتىن، ەشكىمگە جاماندىق ويلامايتىن اسىل قاسيەتتەرى ءۇشىن ەرەكشە قۇرمەتتەيمىز.
وسى ايتۋلى مەرەيتويىندا عالىم باۋرىمىزعا زور دەنساۋلىق، ۇزاق عۇمىر، اماندىق پەن بەرەكە تىلەيمىز. اللا تاعالا ءاربىر جاساعان جاقسىلىعىڭنىڭ، ءاربىر توككەن ماڭداي تەرىڭنىڭ ساۋابىن ەسەلەپ قايتارسىن.
شاڭىراعىڭنان قۋانىش كەتپەسىن، جۇرەگىڭنەن ءۇمىت ۇزىلمەسىن.
الداعى جىلدارىڭ بۇگىنگىدەن دە جارقىن، بۇگىنگىدەن دە بەرەكەلى بولسىن. حالىققا قىزمەت ەتىپ جۇرگەن ەڭبەگىڭ ەلەنىپ، ابىرويىڭ ارتا بەرسىن.
ەلۋ جاسىڭ قۇتتى بولسىن، قادىرلى باۋىرىمىز!
اللا تاعالا ءوزىڭدى جانە وتباسىڭدى ءاردايىم قورعاپ، دەنىڭە ساۋلىق، جانىڭا تىنىشتىق، ومىرىڭە بەرەكە ءناسىپ ەتسىن.
اتا-بابالارىمىزدىڭ ارۋاعى قولداپ، جولىڭ ءاردايىم اشىق بولسىن!
پىكىر قالدىرۋ