سوڭعى ءتورت جىلدا قازاقستاندا 16 ادام مەملەكەتتىك قۇپيانى جاريالاعانى ءۇشىن سوتتالعان، – دەپ حابارلايدى Tengrinews.kz تىلشىسى.

قر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى “مەملەكەتتىك قۇپيانى زاڭسىز جيناۋ، تاراتۋ، جاريا ەتۋ” بويىنشا (قر قك 185-بابى، 2014 جىلى تۇزەتۋلەر ەنگىزىلگەن) سوتتالعان تۇلعالار تۋرالى مالىمەت بەردى.

كوميتەت مالىمەتى بويىنشا، ەلىمىزدە 2013-16 جىلدار ارالىعى وسى باپ بويىنشا 16 قازاقستاندىق سوتتالدى، 2013 جىلى 3 ادام، 2014 جىلى 1 ادام، 2015 جىلى 5 ادام جانە 2016 جىلى 7 ادام. سوتالعاندار اراسىندا ءبىر ايەل ادام بار، ول 2014 جىلى شارتتى جازا الدى.

“جەكە مالىمەتتەر جانە ولاردى قورعاۋ” تۋرالى زاڭ بويىنشا تۇلعالار تۋرالى جانە ءىستىڭ ءمان-جايى جاريالانبايتىنىن اتاپ ءوتتى ۆەدومستۆو وكىلدەرى.

ەسكە سالايىق، بيىل قاڭتاردا قر ۇقك بۇرىنعى باسشىسى نارتاي دۇتباەۆ جانە قر پرەزيدەنت اكىمشىلىگى باسشىسىنىڭ بۇرىنعى ورىنباسارى باعلان مايلىباەۆتىڭ ۇستالعانى حابارلانعان. ولار مەملەكەتتىڭ قۇپيانى جاريا ەتتى دەگەن كۇدىككە ءىلىندى.

باعلان مايلىباەۆ 2017 جىلدىڭ 12 قاڭتارىندا قىزمەتىنەن بوساتىلعان بولاتىن. ول پرەزيدەنت اكىمشىلىگى باسشىسىنىڭ ورىنباسارى قىزمەتىندە 2011 جىلدىڭ قازانىنان بەرى ىستەپ كەلگەن.

نارتاي دۇتباەۆ 2001 جىلدىڭ جەلتوقسانىنان 2006 جىلدىڭ اقپانىنا دەيىن قر ۇلتتىق قاۋىپسىزدىك كوميتەتىنىڭ توراعاسى قىزمەتىن اتقارعان.

 Kaz.tengrinews.kz