بىشكەكتە قۇلاعان ۇشاقتا اتامباەۆتىڭ «التىنى» بولعان
kerey.kz
قىرعىزستانداعى «اتامەكەن» پارلامەنتتىك فراكتسياسىنىڭ ليدەرى ومىربەك تەكەباەۆ «پرەزيدەنت المازبەك اتامباەۆتىڭ كيپر وفشورىنداعى مۇلكىن تاپقانى» ءۇشىن ۇستالدى. بىشكەكتە شۇعىل ءباسپاسوز ءماسليحاتىن وتكىزگەن «اتامەكەن» پارتياسىنىڭ زاڭگەرى تالايگۇل توقتاقۇنوۆا وسىلاي دەدى. زاڭگەردىڭ سوزىنشە، تەكەباەۆ كيپرگە بارعان ساپارىندا بىشكەكتە اپاتقا ۇشىراعان «بوينگ-747» جۇك ۇشاعىنا قاتىستى ماڭىزدى قۇجاتتار العان.
الايدا تەكەباەۆ ونى جاريالاپ ۇلگەرمەگەن. سەبەبى قۇقىق قورعاۋ ورگاندارى وسى قۇجات تارالىپ كەتپەس ءۇشىن وپپوزيتسياشىل ساياساتكەر تاكەباەۆتى اۋەجايدا ۇشاقتان تۇسكەن جەرىنەن ۇستاپ، وعان ءتىپتى ادۆوكاتىن دا جىبەرمەگەن. توقتاقۇنوۆانىڭ مالىمدەۋىنشە، تەكەباەۆ تاپقان قۇجاتتا 16 قاڭتار كۇنى «ماناس» اۋەجايى ماڭىندا اپاتقا ۇشىراعان ۇشاق المازبەك اتامباەۆ پەن ونىڭ ايەلىنە تيەسىلى بولعانى جانە وندا قىمبات بۇيىمدار مەن اسىل تاستار تيەلگەنى ايتىلعان.
زاڭگەر ايتقان دەرەكتى بۇعان دەيىن اقپاننىڭ 13-ءى كۇنى ومىربەك تەكەباەۆتىڭ ءوزى دە مالىمدەپ، «پرەزيدەنت المازبەك اتامباەۆتىڭ كيپر وفشورىندا مۇلكى بار» دەگەن بولاتىن.
ناۋرىزدىڭ ءبىرى كۇنى وتكەن پارلامەنت جيىنىندا دەپۋتاتتار ارىپتەستەرى – «اتا مەكەن» فراكتسياسىنىڭ جەتەكشىسى ومىربەك تەكەباەۆتىڭ ۇستالۋىنا كوز جۇمىپ قاراي المايتىندارىن، جالپى وتىرىستا وسى ماسەلەنى تالقىلاۋدى تالاپ ەتتى. كوپ كەشىكپەي مەملەكەتتىك ۇلتتىق قاۋىپسىزدىك كوميتەتىنىڭ توراعاسى مەن باس پروكۋرور دەپۋتاتتاردىڭ الدىندا تۇردى. مەملەكەتتىك ۇلتتىق قاۋىپسىزدىك كوميتەتى توراعاسىنىڭ ايتۋىنشا، تەكەباەۆ رەسەيلىك كومپانيا وكىلدەرىنىڭ «الفا تەلەكوم» اكتسيالارىن ساتىپ الۋ كەزىندە دەلدالدىق جاساعانى ءۇشىن ءبىر ميلليون دوللار پارا العان دەگەن كۇدىككە ىلىنگەن.
الايدا رەسمي ورىننىڭ بۇل سوزىنە تەكەباەۆتىڭ جاقتاستارى سەنبەي، ءىستى ساياسي تاپسىرىسقا ساناپ، ءتۇرلى شەرۋلەر وتكىزىپ جاتىر. ساراپشىلار قىرعىز كوكتەمى بيىل تاعى شەرۋمەن باستالعانىنا، سوڭى ۇلكەن ساياسي تارتىسقا ۇلاسارىنا الاڭداپ وتىر.
zhasalash.kz
پىكىر قالدىرۋ