اقش-كورەيا بىرلەسكەن ارمياسىنىڭ اسكەري وقۋ-جاتتىعۋلار سەرياسى تاريحتاعى ەڭ جوعارى دەڭگەيگە جەتتى. بۇل رەتكى بىرلەسكەن وقۋ-جاتتىعۋعا اقش ارمياسىنىڭ «كارل.ۆينسون» اۆياماتكاسىن، B-52 ستراتەگيالىق بومبىلاۋشى ۇشاعىن، يادرولىق سۋاستى كەمەلەرىن جانە باسقا دا وزىق سوعىس قارۋلارىن  ىسكە قوسۋى، وقۋ-جاتتىعۋ سيپاتىن اسا قاتەرلى كۇيگە وزگەرتتى. ونسىزدا بۇلىنگەلى تۇرعان شىعىس-ازيا جاعدايىن «ساد» زىمىرانعا قارسى جۇيەسى دە ايرانداي ىرىتۋدە. بۇگىنگى الەم اقپارات قۇرالدارىنىڭ حابارىنا سولتۇستىك كورەيا دا قاراپ جاتپاي، بالليستيكالىق زىمىراندارىن اتقان.

شىعىس-ازيا قايشىلىعى ەجەلدەن كۇردەلى، سەزىمتال كۇيدە كەلە جاتقان ەدى. اقش-كورەيا بىرلەسكەن وقۋ-جاتتىعۋى باستالعان العاشقى كۇندە-اق تۇبەكتىڭ اتموسفەراسى كۇرەڭىتىپ سالا بەردى. 1 ناۋرىز – 30 ءساۋىر ارالىعىندا وتەتىن اسكەري-وقۋ جاتتىعۋ، ماسشتابى جاعىنان بيىلعى جىلدىڭ رەكوردىن كورسەتىپ تۇر. جاپونيا «كيوتو»  اقپاراتتىق ورتالىعىنىڭ حابارلاۋىنشا وتكەن جىلى اسكەري جاتتىعۋعا قاتىسۋشىلار شامامەن 317 مىڭ ادام بولعان. الايدا، بيىلعى كورسەتكىش ودان ەسەلەپ اسىپ كەتۋى مۇمكىن دەپ وتىر.

شەتەل باق-ىندا اقش ارمياسىنىڭ «كارل.ۆينسون» اۆياماتكاسىمەن بىرگە، اقش اسكەري بازاسىنداعى «رونالد رەيگان» اۆيانوسەتسى دە جەتكىزىلۋى مۇمكىن دەگەن بولجام بار. قۇراما شتاتتىڭ ەكى بىردەي اۋىر اسكەري تەحنيكاسى شىعىس-ازياعا كەلۋى، اقش ارمياسىنىڭ اسا ۇلكەن ەكى اسكەري بازاسىنىڭ كوشىپ كەلۋىمەن بىردەي. سەبەبى، بۇل اۆياماتكالاردىڭ بىرەۋىندە،  سۋ ءۇستى سوعىس تەحنيكاسىن قوسپاعان كۇننىڭ ءوزى دە، 50 سوعىس ۇشاعى، 3000-نان اسا اسكەري قىزمەتكەر بولادى. شىعىس ازيادان اقش-تىڭ ەكى بىردەي الىپ اۆياماتكاسىنىڭ پايدا بولۋى، تاريحتا دا وتە سيرەك بولعان. ال بۇلارعا B-1B بومبىلاۋشى ۇشاعى مەن B-52 الىس ارالىقتى ستراتەگيالىق بومبىلاۋشى ۇشاقتارىنىڭ دا بار ەكەنىن قوسار بولساڭىز، بۇل رەتكى بىرلەسكەن اسكەري وقۋ-جاتتىعۋدىڭ سالماعىن تولىق تۇسىندىرە الادى. مۇنداي اسكەري اۋىر تەحنيكالارىنىڭ تارتىلۋى، اقش ارمياسىنىڭ نەگىزى سانالاتىن F-22, F-35B شابۋىلشىلارىنىڭ تابيعي تۇردە بولاتىنىن كورسەتەدى.

وسىنشالىق اسكەري تەحنيكا مەن قارۋلى قوسىن ىرگەسىنە كەلىپ جاتقان دا سولتۇستىك كورەيا، قىتاي، رەسەي قورعانىس كۇشتەردى شۇعىل كۇيدە دايىنداپ وتىرعانى انىق. قىتايدىڭ بەرگەن جاۋابى اسكەري قۋاتتى 7 ەسەگە ارتتىرۋ بولسا، رەسەي جاپوننىڭ سولتۇستىگىندەگى ارالدارعا اپارعان اسكەري قوسىندارىمەن جاۋاپ بەردى. ەڭ باتىل جاۋاپ قايىرعان سولتۇستىك كورەيا بولدى. بۇگىن تاڭەرتەڭ بالليستيكالىق زىمىرانىمەن بىرگە ءتورت بىردەي زىمىران اتىپ سەس كورسەتتى.  سونىمەن، ارىسى تۇتاس شىعىس-تەرىستىك ازيا، قالا بەردى كورەي تۇبەگى ءبىر ساتتە-اق سوعىس بۇرق ەتۋ الدىندا تۇر.

“The Qazaq Times”