سارسەنبىدە تەگەراندا يران پارلامەنتى مەن قالا شەتىندەگى اياتوللا حومەيني كەسەنەسىنە شابۋىل جاسالدى. سالدارىنان ۇشتەن جەتى ادامعا دەيىن قازا تاپقانى تۋرالى ءارتۇرلى مالىمەت ايتىلادى. “يسلام مەملەكەتى” (يم) ەكسترەميستىك ۇيىمىنىڭ اقپاراتتىق رەسۋرسى سانالاتىن AMAQ سايتىندا ۇيىم تەگەرانداعى شابۋىلدار جاۋاپكەرشىلىگىن موينىنا الاتىنى جانە پارلامەنتتەگى شابۋىل جالعاسىپ جاتقانى حابارلاندى.

تاعى ءبىر مالىمدەمەدە حومەينيدىڭ ماۆزولەيىنە شابۋىلدى ەكى جانكەشتى جاساعانى ايتىلادى.

IRNA اگەنتتىگىنىڭ حابارلاۋىنشا، شابۋىلداردان قاۋىپسىزدىك كۇشتەرىنىڭ ەكى ساربازى وققا ۇشىپ، 30-دەن استام ادام جارالانعان. باسقا اقپاراتتار بويىنشا، شابۋىلداردان جەتى ادام قازا تاپقان. يران باق-تارى تەگەراننىڭ وڭتۇستىك شەتىندەگى اياتوللا حومەينيدىڭ ماۆزولەيىنە كەم دەگەندە ءۇش ادام شابۋىلداپ، سول جەردەگى ادامدارعا وق اتقانى تۋرالى حابارلاعان.

تەگەران گۋبەرناتورى حوسسەين حاشەميدىڭ مەملەكەتتىك باق-قا ايتۋىنشا، قاۋىپسىزدىك كۇشتەرى شابۋىلداعانداردىڭ ءبىرىنىڭ كوزىن جويعان، قالعانى ۇستالعان. گۋبەرناتوردىڭ سوزىنشە، شابۋىلدان جۇمىسشى وققا ۇشىپ، بىرنەشە ادام جارالانعان. جارتىلاي رەسمي ILNA اگەنتتىگى شابۋىلداعان ەكى ادامنىڭ ۇستالعانىن ايتادى.

دەپۋتات يلياس حازراتي مەملەكەتتىك تەلەارناعا سۇحباتىندا تاپانشالى ءبىر ادام جانە كالاشنيكوۆ اۆتوماتىمەن قارۋلانعان ەكى ادامنىڭ پارلامەنت عيماراتىنا باسا-كوكتەپ كىرگەنىن ايتقان. مۇندا سەگىز ادام جارالانىپ، قاۋىپسىزدىك كۇشتەرىنىڭ ساربازى وققا ۇشقانى حابارلاندى.

كەيىن پارلامەنتكە باسىپ كىرگەندەردىڭ ءبىرى عيماراتتىڭ ءتورتىنشى قاباتىندا ءوزىن جارىپ جىبەرگەنى تۋرالى اقپارات تارادى.

Tasmin اگەنتتىگى عيماراتتا ءتورت ادامنىڭ كەپىلگە الىنعانىن حابارلادى

قارۋلى شابۋىل جاسالعان يران پارلامەنتى جانىنداعى جەدەل جاردەم كولىگى مەن ادامدار. تەگەران، 7 ماۋسىم 2017 جىل.

ەكى شابۋىل سارسەنبى كۇنى تاڭەرتەڭ جاسالدى. يراننىڭ بارلاۋ مينيسترلىگى شابۋىلداردى “تەرروريستىك توپتار” جاساعانىن مالىمدەدى.

ء“ۇشىنشى توپتىڭ مۇشەلەرى شابۋىل جاساماس بۇرىن ۇستالدى” دەپ حابارلادى مينيسترلىككە سىلتەمە جاساعان مەملەكەتتىك تەلەارنا.

جوعارعى بيلىك ەلدىڭ رۋحاني كوسەمى سانالاتىن اياتوللا ءالي حامەنەيدىڭ قولىنا شوعىرلاندىرىلعان يراندا بۇل شابۋىلدار رەفورماشىل ساياساتكەر سانالاتىن حاسسان روۋحاني ەل پرەزيدەنتى قىزمەتىنە ەكىنشى مەرزىمگە سايلانعاننان كەيىن ءبىر اي وتپەي جاسالىپ وتىر.

ازاتتىق بۇعان دەيىن يم-ءنىڭ ءوز قاتارىنا يراندىقتاردى كوبىرەك تارتۋعا تىرىسىپ، يرانعا، اسىرەسە ەلدەگى ازشىلىقتى قۇرايتىن سۋننيتتەرگە باعىتتالعان پارسى تىلىندەگى پروپاگاندانى كوبەيتكەنى تۋرالى جازعان.

1979 جىلى يراندا يسلام رەۆوليۋتسياسىن جاساپ، تەوكراتيالىق رەجيم ورناتقان اياتوللا رۋحوللا حومەيني 1989 جىلى دۇنيە سالعان.    ازاتتىق راديوسى