كەزدەسۋگە قازاقستان رەسپۋبليكاسىنىڭ قورعانىس ءمينيسترى س.جاسۇزاقوۆ، قىتاي حالىق رەسپۋبليكاسىنىڭ قورعانىس ءمينيسترى چان ۆانتسيۋان، رەسەي فەدەراتسياسىنىڭ قورعانىس ءمينيسترى س.شويگۋ، تاجىكستان رەسپۋبليكاسىنىڭ قورعانىس ءمينيسترى م.شەرالي، وزبەكستان رەسپۋبليكاسىنىڭ قورعانىس ءمينيسترى ك.بەرديەۆ، قىرعىز رەسپۋبليكاسى باس شتابىنىڭ باستىعى ر.دۋيشەنبيەۆ، شانحاي ىنتىماقتاستىق ۇيىمىنىڭ باس حاتشىسى ر.اليموۆ قاتىستى.

مەملەكەت باسشىسى شانحاي ىنتىماقتاستىق ۇيىمىنا مۇشە مەملەكەتتەردىڭ قورعانىس مينيسترلەرى استانادا شىۇ-عا مۇشە-مەملەكەتتەر باسشىلارى كەڭەسىن جانە «ەكسپو-2017» حالىقارالىق كورمەسىن وتكىزۋ قارساڭىندا باسقوسىپ وتىرعانىنىڭ ماڭىزدىلىعىن اتاپ ءوتتى.

– مادەني، اۋماقتىق، تاريحي تۇرعىدان ءبىر-بىرىنە جاقىن مەملەكەتتەردىڭ ەكونوميكالىق ىنتىماقتاستىق ماسەلەلەرىن شەشۋ ءۇشىن قۇرىلعان شانحاي ىنتىماقتاستىق ۇيىمى ءوزىن ەلەۋلى وڭىرلىك بىرلەستىك رەتىندە كورسەتە ءبىلدى، – دەدى قازاقستان پرەزيدەنتى.

نۇرسۇلتان نازارباەۆ شانحاي حارتياسى قابىلدانعان ساتتەن بەرگى 15 جىل ىشىندە بىرلەسكەن اۋقىمدى جۇمىس اتقارىلعانىنا نازار اۋداردى.

– شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ  الداعى وتىرىسىندا ءىرى ەكى ەل – ءۇندىستان مەن پاكىستاندى ۇيىم مۇشەلىگىنە قابىلداۋ كوزدەلگەن. سول ارقىلى شىۇ جەر شارى تۇرعىندارىنىڭ 40% -عا جۋىعىن بىرىكتىرەدى. ەڭ باستىسى – بارلىق ماسەلەلەردى كونسەنسۋس ارقىلى شەشۋگە نەگىزدەلگەن «شانحاي رۋحىن» ساقتاۋ، – دەدى مەملەكەت باسشىسى.

قازاقستان پرەزيدەنتى ۇيىم قىزمەتىنىڭ ەكونوميكالىق مازمۇنىن نىعايتۋ قاجەتتىگىن اتاپ ءوتتى.

– قازىرگى ۋاقىتتا شانحاي ىنتىماقتاستىق ۇيىمى جۇمىسىنىڭ وڭ قارقىنى «جاڭا جىبەك جولى» باعدارلاماسىنىڭ دامۋىنا بايلانىستى بولىپ وتىر. بۇل باعدارلاماعا ۇيىم مۇشەلەرىنىڭ بارلىعى، ەڭ الدىمەن، قىتاي حالىق رەسپۋبليكاسىنىڭ جاقىن كورشىسى – قازاقستان قولداۋ كورسەتۋدە، – دەدى نۇرسۇلتان نازارباەۆ.

سوڭىندا مەملەكەت باسشىسى قورعانىس ۆەدومستۆولارىنىڭ قىزمەتى شانحاي ىنتىماقتاستىق ۇيىمىنىڭ ەكونوميكالىق ينتەگراتسياسىنىڭ باعىتىمەن قاتار جۇرۋگە ءتيىس ەكەندىگىن اتاپ ءوتتى.