اقش مەملەكەتتىك دەپارتامەنتى رەسەيدى حالىقارالىق كەلىسىمدەردى بۇزىپ وتىر دەپ ايىپتادى. مەملەكەتتىك دەپارتامەنتىنىڭ ءباسپاسوز حاتشىسى حيزەر نويەرت ماسكەۋدىڭ “10 جىلدان استام ۋاقىتتان بەرى تۇراقتىلىقتى شايقالتاتىن قارۋ-جاراق جاساپ، حالىقارالىق مىندەتتەمەلەرىن بۇزىپ وتىرعانىن” مالىمدەدى. مۇنىڭ الدىندا رەسەي پرەزيدەنتى ۆلاديمير پۋتين فەدەرالدىق كەڭەستەگى جولداۋىندا “جاڭا يادرولىق قارۋ-جاراق” تۋرالى بەينە روليك كورسەتكەن.

بۇعان دەيىن اقش قورعانىس مينيسترلىگى ۆلاديمير ءپۋتيننىڭ مالىمدەمەسىنە تاڭعالماعانىن حابارلاعان. پەنتاگوننىڭ ءباسپاسوز حاتشىسى دانا ۋايت اقش ارمياسى امەريكالىقتاردى كەز-كەلگەن قاۋىپتەن قورعاي الاتىنىن ايتقان. ول اقش-تىڭ ەۋروپاداعى زىمىراننان قورعانىس جۇيەسى رەسەيگە قارسى ەمەس، كەرىسىنشە سولتۇستىك كورەيا مەن يراننان قورعانۋ ءۇشىن ورناتىلعانىن ايتادى.

امەريكالىق شەنەۋنىكتەر رەسەي اقش-قا شابۋىل جاساعان جاعدايدا “تەگەۋرىندى كۇشكە” تاپ بولاتىنىن ايتادى. ۆاشينگتون ءپۋتيننىڭ جاڭا زىمىراندار تۋرالى مالىمدەمەلەرى الدا وتەتىن رەسەي پرەزيدەنتى سايلاۋىمەن بايلانىستى دەپ دولبارلايدى.

پۋتين 1 ناۋرىزدا فەدەرالدىق كەڭەستە جولداۋ جاساپ، رەسەي قارۋلى كۇشتەرى تاياۋدا “امەريكالىق زىمىراننان قورعانىس جۇيەسىنەن اينالىپ وتەتىن” جاڭا يادرولىق زىمىراندارمەن جابدىقتالاتىنىن مالىمدەگەن. ءپۋتيننىڭ جولداۋىنىڭ جارتىسىنا جۋىعى زىمىران تاقىرىبىنا ارنالدى. ونىڭ ايتۋىنشا، اقش رەسەيمەن زىمىراننان قورعانىس جۇيەسى تۋرالى كەلىسسوزدەن ءوزى باس تارتقان.

بۇعان دەيىن ءپۋتيننىڭ جاڭا يادرولىق قارۋ-جاراق تۋرالى ايتقاندا 11 جىل بۇرىنعى كومپيۋتەرلىك روليك كورسەتىلگەنى بەلگىلى بولعان. “سارمات” بالليستيكالىق زىمىرانىنان وقتۇمسىعىنىڭ بولىنگەنى كورسەتىلگەن كادرلار 2007 جىلى «ءبىرىنشى ارنا» تەلەارناسىندا كورسەتىلگەن “ۋدارنايا سيلا” باعدارلاماسىندا قولدانىلعان.

ازات ەۋروپا / ازاتتىق راديوسى