8 قاڭتاردا اقش پرەزيدەنتى دونالد ترامپ اق ۇيدە مالىمدەمە جاساپ، يراننىڭ شابۋىلىنان “امەريكالىقتار مەن يراكتىقتار زارداپ شەكپەگەنىن”، اسكەري بازا ازداپ زاقىمدانعانىن ايتتى.

تەگەران 8 قاڭتاردا “گەنەرال سۇلەيمانيدىڭ ولىمىنە كەك الۋ ءۇشىن” اقش-تىڭ يراكتاعى اسكەري بازاسىن باليستيكالىق زىمىرانمەن اتقىلاعان. يراننىڭ مەملەكەتتىك ارنالارى “زىمىران دىتتەگەن جەرىنە جەتىپ، 80 ادامدى ولتىرگەنىن” حابارلاعان ەدى. يسلام رەۆوليۋتسياسى كورپۋسىنا قاراستى “قۇدس كۇشتەرىنىڭ” قولباسشىسى سۇلەيماني 3 قاڭتاردا باعداتتا اقش-تىڭ اۋە شابۋىلى كەزىندە قازا تاپقان. وسىدان كەيىن تەگەران مەن ۆاشينگتوننىڭ اراسى تىم ۋشىعىپ كەتكەن.

ترامپ 8 قاڭتارداعى مالىمدەمەسىندە تەگەراندى “حالىقارالىق تەرروريزمدى قولداپ وتىر” دەپ ايىپتاپ، “يرانعا سالىناتىن سانكتسيا كۇشەيەتىنىن” مالىمدەدى. ترامپ ءوز سوزىندە “قولى قانعا مالىنعان سۇلەيمانيدىڭ قازاسى – الەمدەگى باسقا دا تەرروريستەرگە ەسكەرتۋ” دەدى.

ترامپ “يران ەندى رايىنان قايتار” دەپ، ۆاشينگتوننىڭ تەگەراننىڭ شابۋىلىنا قارىمتا قايتارمايتىنىن مەڭزەدى. بىراق ناتو مۇشەلەرىن تاياۋ شىعىستاعى جاعدايعا بەلسەندى تۇردە ارالاسۋعا شاقىردى.

بۇعان قوسا، ول “مەن ليدەر بولىپ تۇرعاندا يران ەشقاشان يادرولىق قارۋىن قولدانبايدى” دەدى. ترامپ “ۇلىبريتانيا، قىتاي، گەرمانيا جانە رەسەيدى يران يادرولىق كەلىسىمىنەن باس تارتىپ، بارلىق تاراپ قايتا جاڭا كەلىسسوز باستاۋ كەرەگىن” ايتتى.

تەگەراننىڭ يراكتاعى اقش بازاسىنا شابۋىلىنان كەيىن قازاقستاندىق Air Astana, فرانتسيالىق Air France, گەرمانيالىق Lufthansa جانە امەريكالىق ۇشاقتار يران مەن يراك توبەسىنەن ۇشپايتىنىن مالىمدەدى. Air Astana الماتى مەن نۇر-سۇلتاننان دۋبايعا جانە ابۋ-دابيگە ۇشاتىن ۇشاقتارىنىڭ يران مەن يراكتى اينالىپ وتەتىنىن، سوعان بايلانىستى ۇشۋ ۋاقىتى ۇزاراتىنىن حابارلادى.

ازات ەۋروپا / ازاتتىق راديوسى