مەملەكەت باسشىسىنا قۇقىق قورعاۋ ورگاندارى مەن قارۋلى كۇشتەردىڭ ەلىمىزدەگى جاعدايدى تۇراقتاندىرۋ ءۇشىن قابىلداعان بەلسەندى شارالارى تۋرالى باياندالدى. ادامدار مەن كولىكتەردى تەكسەرۋ، سونداي-اق ستراتەگيالىق نىساندارعا باقىلاۋ ورناتۋدى جۇزەگە اسىرۋ ماقساتىمەن ەلدى مەكەندەردىڭ اۋماعىنا 93 بلوكبەكەت قويىلدى.

قاسىم-جومارت توقاەۆقا زاڭ تالاپتارىنا باعىنباۋ جانە اسا ماڭىزدى ءارى ستراتەگيالىق نىساندارعا شابۋىل جاساۋ فاكتىلەرىنىڭ قاتاڭ تۇردە جولى كەسىلگەنى جونىندە مالىمەت بەرىلدى. الماتىدا «بارلىق» جانە «التىن وردا» بازارلارىن تازارتۋ بارىسىندا 207 ادام ۇستالدى. ولاردان ۇرلانعان 5 اۆتوكولىك، قارۋ-جاراق، وق-دارىلەر، قالقاندار تاركىلەندى.

ەلوردادا الدىن الۋ شارالارى جۇرگىزىلۋدە. ونىڭ بارىسىندا اۋلالار مەن پاتەرلەردىڭ تىنىشتىعى قامتاماسىز ەتىلەدى، سونداي-اق تاۋلىك بويى اۆتوپاترۋل كۇزەتەدى. جالپى ەلىمىز بويىنشا توتەنشە جاعداي رەجيمىن بۇزعان 1,5 مىڭ ادام جاۋاپقا تارتىلدى.

مەملەكەت باسشىسىنا نەگىزگى كۇش-جىگەردىڭ قازىرگى ۋاقىتتا تەرروريستەردىڭ مەكەنجايىن انىقتاپ، ۇستاۋ جونىندەگى شۇعىل شارالارعا باعىتتالىپ وتىرعانى باياندالدى.

قاسىم-جومارت توقاەۆ ەلىمىزدەگى قوعامدىق ءتارتىپ پەن قاۋىپسىزدىكتى قالپىنا كەلتىرۋ ءىسىن جالعاستىرا بەرۋدى، سونداي-اق اتالعان جۇمىستار بويىنشا اقپاراتتىق قولداۋ كورسەتۋدى كۇشەيتۋگە تاپسىرما بەردى.