قازاقستان ۇلتتىق قاۋىپسىزدىك كوميتەتىنىڭ سايتى مەكەمەنىڭ ەكس-توراعاسى كارىم ءماسىموۆتىڭ ۇستالعانىن حابارلادى.
“6 قاڭتاردا ۇلتتىق قاۋىپسىزدىك كوميتەتى قىلمىستىق كودەكسىنىڭ 175-بابىنىڭ 1-تارماعى، مەملەكەتكە وپاسىزدىق جاساۋ ءىسى بويىنشا سوتقا دەيىنگى تەرگەۋدى باستادى. سول كۇنى وسىنداي قىلمىستى جاسادى دەگەن كۇدىكپەن ۇقك-ءنىڭ بۇرىنعى توراعاسى ءماسىموۆ جانە باسقا ادامدار ۇستالىپ، ۋاقىتشا قاماۋ يزولياتورىنا قامالدى. تەرگەۋ مۇددەسى ءۇشىن باسقا اقپارات جاريالاۋعا جاتپايدى” دەلىنگەن كوميتەت سايتىندا.
56 جاستاعى كارىم ءماسىموۆ – قازاقستاندى وتىز جىلعا جۋىق ۋاقىت باسقارعان ەكس-پرەزيدەنت نۇرسۇلتان نازارباەۆتىڭ كوپتەن بەرگى ۇزەڭگىلەسى. نازارباەۆ ونى 2016 جىلى ۇلتتىق قاۋىپسىزدىك كوميتەتىنىڭ توراعاسى ەتىپ تاعايىنداعان. مۇنىڭ الدىندا ول 2007-2012 جانە 2014-2016 جىلدارى ەكى رەت پرەمەر-مينيستر قىزمەتىن اتقارعان.
ۇقك-ءنىڭ “باسقا ادامدار دەپ وتىرعانى كىمدەر ەكەنى بەلگىسىز.
6 قاڭتاردا كەي تەلەگرام-ارنالار ۇقك توراعاسىنىڭ ءبىرىنشى ورىنباسارى سامات ءابىشتىڭ ۇستالعانىن حابارلاپ، ارتىنشا اقپاراتتى جوققا شىعارعان. سامات ءابىش – نۇرسۇلتان نازارباەۆتىڭ نەمەرە ءىنىسى. ەلدەگى قايعىلى وقيعالاردان كەيىن ۇقك باسشىلىعى وزگەرگەندە سامات ءابىش تۋرالى ەشتەڭە ايتىلماعان، تەك كوميتەت توراعاسىنىڭ ورىنباسارى قىزمەتىنە جاڭا ورىنباساردىڭ تاعايىندالعانى ايتىلعان.
جۋرناليست اركادي دۋبنوۆ Facebook-تەگى پاراقشاسىندا نازارباەۆتىڭ تاعى ءبىر نەمەرە ءىنىسى قايرات ساتىبالدىنىڭ دۋبايدا ۇستالعانىن، ال ەكس-پرەزيدەنتتىڭ ءوزى قىتايدا ەكەنىن جازعان. بىراق بۇل اقپارات رەسمي تۇردە راستالعان جوق.
پىكىر قالدىرۋ