قازاقستان پرەزيدەنتى قاسىم-جومارت توقاەۆ 11 قاڭتاردا ماجىلىستە ەلدىڭ ەكس-پرەزيدەنتى نۇرسۇلتان نازارباەۆ جايلى ءبىر اۋىز ءسوز عانا ايتىپ، بۇل ءسوزىنىڭ وزىندە نازارباەۆتى سىنادى.
ء“بىرىنشى پرەزيدەنت – “ەلباسى” تۇسىندا وتە تابىستى كومپانيالار مەن حالىقارالىق دەڭگەيدەگى باي ادامداردىڭ توبى پايدا بولدى. حالىققا تيەسىنى حالىققا بەرەتىن، جۇيەلى تۇردە كومەكتەسەتىن ۋاقىت كەلدى. ۇكىمەت كومپانيالاردى انىقتاپ، ولارمەن “قازاقستان حالقىنا” قورىنا اۋداراتىن سالىمدارىن انىقتاۋى ءتيىس” دەدى ول.
قازاقستاننىڭ قازىرگى پرەزيدەنتى ەلدىڭ بۇرىنعى پرەزيدەنتىن العاش رەت سىنادى. نازارباەۆ ەل باسقارىپ تۇرعان تۇستا ونىڭ قىزدارى، ماڭىنداعى ادامدار ەلدەگى ەڭ باي ادامدارعا اينالدى. ولاردىڭ ەسىمدەرى وفشور قۇجاتتارىندا ءجيى ايتىلىپ ءجۇر.
ماسەلەن، قازاقستاننىڭ ەكس-پرەزيدەنتى نازارباەۆتىڭ ورتانشى قىزى دينارا قۇلىباەۆا مەن ونىڭ كۇيەۋى تيمۋر قۇلىباەۆ – ەلدەگى بايلاردىڭ قاتارىندا.
قازاقستاندىق بايلاردىڭ اقشاسى نارازىلىقتان سوڭ 3 ملرد دوللارعا ازايدى
ازاتتىق بىلتىر جۇرگىزگەن زەرتتەۋىندە نازارباەۆ اۋلەتى مۇشەلەرى مەن ونىڭ كۇيەۋ بالالارىنىڭ 20 جىل ىشىندە اقش جانە ەۋروپا ەلدەرىندە جىلجىمايتىن مۇلىك الۋعا 785 ميلليون دوللار اقشا جۇمساعانىن انىقتاعان.
نازارباەۆتىڭ ءوزى 28 جەلتوقساننان بەرى جۇرت الدىنا شىقپادى، ەلدە بولعان نارازىلىق پەن تارتىپسىزدىككە قاتىستى ەشقانداي پىكىر بىلدىرمەدى. قازاقستان بيلىگى جاعداي ۋشىققان تۇستا ينتەرنەتتى اجىراتىپ تاستادى. اقپاراتتىق ۆاكۋمدا قالعان تۇستا نازارباەۆ پەن ونىڭ وتباسى ەلدەن كەتىپ قالدى دەگەن سىبىستار تاراعان. 8 قاڭتاردا ەكس-پرەزيدەنتتىڭ ءباسپاسوز حاتشىسى ايدوس ۇكىباي تۆيتتەردە بىرنەشە سويلەممەن نازارباەۆتىڭ نۇر-سۇلتاندا ەكەنىن جازدى.
ازاتتىق راديولى
پىكىر قالدىرۋ