قازاقستان قورعانىس مينيسترلىگى 2 اقپاندا رەسەي جالعا العان سارىشاعان پوليگونىندا اۋە قورعانىس كۇشتەرىنىڭ زەنيت راكەتاسى بولىمشەلەرى ۇرىس اتىسى قيمىلدارىن وتكىزگەنىن حابارلادى.
جاتتىعۋدىڭ نەگىزگى ماقساتى “جەكە قۇرامنىڭ اسكەري جانە ازاماتتىق ينفراقۇرىلىم نىساندارىنا جاسالعان اۋە شابۋىلدارىنا تويتارىس بەرۋ دايىندىعىن تەكسەرۋ” دەپ ايتىلادى.
قورعانىس مينيسترلىگىنىڭ حابارلاۋىنشا، “قولدانىستاعى قازىرگى زامانعى زەنيت راكەتاسى كەشەندەرى تسيفرلىق راديولوكاتسيالىق ستانتسيالارمەن جابدىقتالعان”. مينيسترلىكتىڭ حابارلاماسىندا راكەتا كەشەنىنىڭ اتى اتالمايدى. الايدا حابارلامادان رەسەيلىك “بۋك” كەشەنى سىنالىپ جاتقانى بايقالادى.
اقپاراتقا قاراعاندا، راديولوكاتسيالىق بارلاۋ قىزمەتى “ۇشاق جانە راكەتاتەكتەس” درونداردى انىقتاعاننان كەيىن جاۋىنگەرلەر دايىن ەمەس پوزيتسيالارعا جىلجىعان. “كەشەندەر ورىستەتىلىپ، شارتتى قارسىلاستىڭ قۇرالدارى جويىلعان”.
“زاماناۋي زەنيت راكەتاسى كەشەندەرىنىڭ كومەگىمەن ءبىز ناقتى ۋاقىت رەجيمىندە ۇرىس احۋالىن مودەلگە تۇسىردىك. ال جەكە قۇرام ءبىر مەزگىلدە شاعىنولشەمدى، تومەن ۇشاتىن بىرنەشە اۋە نىسانىن تابۋ، ولارعا ىلەسىپ ۇشۋ جانە جويۋعا ارنالعان ءىس-قيمىلداردى پىسىقتادى” دەدى اۋە شابۋىلىنا قارسى قورعانىس قۇراماسىنىڭ كومانديرى، پولكوۆنيك بەرىك مولداقۇلوۆ.
2014 جىلى استانا ماسكەۋمەن اۋە شابۋىلىنان قورعايتىن بىرىڭعاي جۇيەنى قۇرۋ تۋرالى كەلىسىمدى راتيفيكاتسيالاعان.
رەسەي قاراعاندى وبلىسىنداعى سارىشاعان پوليگونىنىڭ ءبىر بولىگىن 1996 جىلى قازاقستانمەن جاسالعان كەلىسىم بويىنشا جالعا العان. پوليگوننىڭ قالعان بولىگىن قازاقستان پايدالانادى.
ازات ەۋروپا / ازاتتىق راديوسى
پىكىر قالدىرۋ