فيليپپين بوكسشىسى مەنني پاكياو امەريكالىق فلويد مەيۆەزەر كىشىمەن جەكپە-جەگىنىڭ الدىندا ءوزىنىڭ جاراقاتىن جاسىرعانى ءۇشىن ءتورت جىلعا باس بوستاندىعىنان ايىرىلۋى مۇمكىن، – دەپ حابارلايدى Vesti.kzءتىلشىسى Sportbox.ru باسىلىمىنا سىلتەمە جاساپ.

باسىلىمدا پاكياونىڭ رەسمي قۇجاتتى تولتىرۋ بارىسىندا ءوز جاراقاتىن قاساقانا جاسىرعانى جازىلعان. سەبەبى نەۆادا شتاتىنىڭ زاڭى بويىنشا، قاساقانا جالعان مالىمەت بەرۋگە بولمايدى، ال كەزدەسۋ لاس-ۆەگاستا بولدى، وسىنداي قىلمىس ءۇشىن ءتورت جىلعا دەيىن باس بوستاندىعىنان ايىرۋ نەمەسە 5 مىڭ دوللار كولەمىندە ايىپپۇل سالۋ جازالارى قاراستىرىلعان.

ايىپپۇل پاكياونىڭ قالتاسىن ايتارلىقتاي جۇقارتپايتىنى بەلگىلى، سەبەبى ول بۇل كەزدەسۋدەن كەيىن 120 ميلليون دوللار كولەمىندە تابىس الدى. ازىرشە سپورتشىنىڭ وكىلدەرى بۇل جايتقا قاتىستى رەسمي تۇسىنىك بەرمەدى. ايتا كەتەيىك، الداعى ۋاقىتتا پاكياو وتا جاساتىپ، ودان كەيىن بىرنەشە ايدان كەيىن عانا رينگكە ورالا الادى.

ەسكە سالا كەتەيىك، فيليپپين مەنني پاكياو مەن امەريكالىق فلويد مەيۆەزەر كىشىنىڭ اراسىنداعى “عاسىر جەكپە-جەگى” امەريكالىقتىڭ جەڭىسىمەن اياقتالدى. كەزدەسۋ لاس-ۆەگاستا MGM Grand ارەناسىندا 3 مامىر كۇنى ءوتتى. تورەشىلەر جەڭىستى ءبىراۋىزدان مەيۆەزەرگە بەردى. 12 راۋندقا سوزىلعان جەكپە-جەكتە امەريكالىقتىڭ ەنشىسىندەگى WBA, WBC جانە پاكياونىڭ قورجىنىنداعى WBO تيتۋلدارى تىگىلگەن ەدى. ايتا كەتەيىك، ەكى بوكسشى بۇل كەزدەسۋدە جالپى سوماسى 300 ميلليون دوللار قارجى تابىس تاپتى.

tengrinews.kz