قۇرمانعازى اتىنداعى قازاق ۇلتتىق كونسەرۆاتورياسىندا ءبىلىم العان ءداستۇرلى ءان ورىنداۋدىڭ شەبەرى اراي اسقاپ الماتىدان استاناعا قونىس اۋدارۋىنا بايلانىستى سارىارقا توسىندە وتەتىن ونەر كەشتەرىنە دايىندىق كورۋدە. ەڭ الدىمەن استانا ماڭىنداعى اۋىل حالقىنا كەش ۇيىمداستىرۋدى جوسپارلاعان ءانشى 16 مامىردا قوياندى اۋىلىندا «سارىارقا سامالى» دەگەن اتپەن كولەمدى كونتسەرت وتكىزبەك. قازاق حندىعىنىڭ 550 جىلدىعىنا ارنالاتىن بۇل كەشتە اراي اسقاپقىزىنان بولەك بەلگىلى ءداستۇرلى انشىلەر ەرلان رىسقالي، پەريزات تۇراروۆا، ايگەرىم نارتۋەۆا، نۇربولات ءابىلحان جانە كومپوزيتور حالىق ريزابەك، كۇيشى مەرەي ءماجىت قاتارلى ونەرپازدار ونەر كورسەتەدى. سونداي-اق، قىتايدان كەلگەن ايتىسكەر اقىن جاقسىلىق ورىنباسار مەن ايساۋلە بەيسەنحان ايتىسادى دەپ كۇتىلۋدە.
ءانشىنىڭ ايتۋىنشا، «سارىارقا سامالى» دەگەن اتپەن الداعى ۋاقىتتا اتالعان ونەرپازدار استانا ماڭىنداعى بارلىق اۋىلداردا ونەر كورسەتەدى ەكەن.
«بۇل كونتسەرتتى اۋىلدى جەرلەردەن باستاۋىمىزداعى ماقسات، قالا شەتىندە ورنالاسقان حالىقتى ءداستۇرلى اننەن سۋسىنداتۋ بولسا، ەكىنشىدەن، وسى ارقىلى قازاق حاندىعىنىڭ 550 جىلدىق مەرەيتويى رۋحىن ولارعا جەتكىزۋ بولماق»،-دەيدى ا.اسقاپ.
وسىلايشا ءداستۇرلى ءانشى اراي استانا اۋىلدارىن تۇگەلدەي قامتۋمەن قاتار 30-31 مامىر كۇندەرى تۇركياداعى قازاقتار قونىستانعان التاي اۋىلىندا وتەتىن «التاي كوي» فەستيۆالى اياسىندا جەكە ونەر كەشىن وتكىزبەك ەكەن.