قازاقستان جانە اۋعانستان سىرتقى ىستەر مينيسترلىكتەرى ىنتىماقتاستىقتىڭ باسىمدى باعىتتارىن بەلگىلەدى
kerey.kz
2015 جىلى 9 مامىردا قابىل قالاسىندا قازاقستان رەسپۋبليكاسى مەن اۋعانستان يسلام رەسپۋبليكاسىنىڭ سىرتقى ىستەر مينيسترلىكتەرى اراسىندا ساياسي كونسۋلتاتسيالار ءوتتى. قر دەلەگاتسياسىن سىرتقى ىستەر ءمينيسترىنىڭ ورىنباسارى اسقار مۋسينوۆ، اۋعان دەلەگاتسياسىن اير سىرتقى ىستەر ءمينيسترىنىڭ ورىنباسارى حەكمات قارزاي باستادى.
كونسۋلتاتسيالار بارىسىندا ديپلوماتتار ساياسي، ساۋدا-ەكونوميكالىق جانە مادەني-گۋمانيتارلىق ىنتىماقتاستىق سالاسىنداعى ەكىجاقتى قاتىناستاردىڭ قازىرگى احۋالى مەن بولاشاق مۇمكىندىكتەرى تۋرالى كەڭ اۋقىمدى ماسەلەلەردى تالقىلادى. 2015 جىلى مامىردا استانادا وتەتىن ساۋدا-ەكونوميكالىق ىنتىماقتاستىق جونىندەگى قر-اير ۇكىمەتارالىق كوميسسياسىنىڭ 7-ءشى وتىرىسىنا دايىندىق بارىسى مەن اۋعان پرەزيدەنتى موحامماد اشراف عانيدىڭ قازاقستانعا ساپارىن ۇيىمداستىرۋ ماسەلەلەرىنە اسا نازار ءبولىندى.
تاراپتار ەكى ەلدىڭ حالىقارالىق ساحناداعى، ونىڭ ىشىندە بۇۇ، اوسشك، شىۇ، يىۇ جانە باسقا دا حالىقارالىق ۇيىمدار اياسىنداعى وڭ ىقپالداستىعىن اتاپ ءوتتى.
اۋعان ارىپتەستەرى قازاقستاندا اۋعان ستۋدەنتتەرىنىڭ وقىتۋ جونىندەگى قازاقستاندىق ءبىلىم بەرۋ باعدارلاماسىنىڭ جۇزەگە اسىرىلۋى اۋعانستان كادرلارىن دايارلاۋدا، ەلدىڭ الەۋمەتتىك-ەكونوميكالىق دامۋىنا، سونداي-اق وڭىردە لاڭكەستىك پەن ەكسترەميزمنىڭ تارالۋ قاۋىپتەرىن تومەندەتۋگە سەپتىگىن تيگىزەتىنىن اتاپ ءوتىپ، اۋعانستان ءۇشىن قوعامدىق-ساياسي ماڭىزىن جوعارى باعالادى.
اۋعان تاراپى ازىق-تۇلىك پەن اسا قاجەتتى زاتتار تۇرىندە كورسەتىلىپ وتىرعان تۇراقتى ىزگىلىك كومەك ءۇشىن جانە الەۋمەتتىك ماڭىزدىلىعى بار ينفراقۇرىلىمدى سالۋ مەن قايتا قالپىنا كەلتىرىلۋىنە (ورتا مەكتەپ، اۋرۋحانا، اۆتوجول، كوپىرلەر جانە ت.ب.) بولىنگەن قاراجاتقا العىسىن ءبىلدىردى.
كونسۋلتاتسيا قورىتىندىلارىنا سايكەس، قازاقستان جانە اۋعانستان سىرتقى ىستەر مينيسترلىكتەرى ەكى ەل اراسىنداعى ءتۇرلى سالالارداعى ىقپالداستىقتى ارتتىرۋ ماقساتىندا ورتا مەرزىمدى بولاشاقتا ىنتىماقتاستىقتىڭ باسىمدى باعىتتارىن بەلگىلەدى.
قر ءسىم باسپا ءسوز قىزمەتى
پىكىر قالدىرۋ