كابۋلداعى Park Palace Hotel قوناق ۇيىنە بەيسەنبى كۇنى “تاليبان” مۇشەلەرى جاساعان شابۋىلدان قازا تاپقانداردىڭ ءبىرى – قازاقستاندىق ازاماتشا بولىپ شىقتى. بۇل تۋرالى قازاقستاننىڭ اۋعانستانداعى ەلشىلىگى ازاتتىققا حابارلادى.

“اۋعانستاننىڭ قارجى مينيسترلىگىندە كەڭەسشى بولىپ ىستەگەن يتاليا ازاماتىنا تۇرمىسقا شىققان 1987 جىلى تۋعان ايگەرىم ابدۋللاەۆا كۇيەۋىمەن بىرگە قازا تاپتى. تۋىستارىنا حابارلادىق. ەندى مۇردەسىن قالاي جەتكىزۋدى ويلاستىرىپ جاتىرمىز” دەپ حابارلادى اتى-ءجونىن اتاماۋدى وتىنگەن ەلشىلىك قىزمەتكەرى.

14 مامىر كۇنى شەتەلدىكتەر ءجيى تۇسەتىن كابۋلداعى Park Palace Hotel قوناق ۇيىنە “تاليبان” شابۋىل جاساپ، 14 ادام ولگەن ەدى. قوناق ۇيدە بولعان تاعى 54 ادام قاۋىپسىزدىك قىزمەتىنىڭ بىرنەشە ساعاتقا سوزىلعان وپەراتسياسىنان سوڭ قۇتقارىلعانى حابارلانعان. قۇتقارىلعاندار اراسىندا 45 شەتەلدىك بار.

azattyq.org