الماتىدا №58 بالاباقشانىڭ بالالار الاڭىنا سوعىلعان جول تالعامايتىن كولىكتىڭ سوعىلعانى بەينەلەنگەن ۆيدەو پايدا بولدى، – دەپ حابارلايدىTengrinews.TV.

Azta دەگەن نيگى بار قولدانۋشىنىڭ YouTube جەلىسىنە جۇكتەگەن ۆيدەوسىندا جول تالعامايتىن كولىكتىڭ بالالار وتىرعان الاڭدى سوققانى جانە ول جاقتان بالالاردىڭ قاشقانى كورىنەدى.

ايتا كەتەيىك، تىزگىندە وتىرعان جۇرگىزۋشى ايەلگە قاتىستى قاماۋعا الۋ تۇرىندەگى بۇلتارتپاۋ شاراسى تاعايىندالدى. “ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان جول-كولىك وقيعاسى دەرەگى بويىنشا جول قوزعالىسى ەرەجەسىن بۇزۋ” دەرەگى بويىنشا سوتقا دەيىنگى تەرگەۋ جۇرگىزىلىپ جاتىر.

ەسكە سالا كەتەيىك، الماتىدا قايعىلى وقيعا 20 مامىردا ساعات شامامەن 12.00-دە بولدى. جۇرگىزۋشى ايەل، كۋاگەرلەردىڭ ايتۋىنشا، ارتقا قاراي جوعارى جىلدامدىقپەن ءجۇرىپ كەلە جاتىپ، بالاباقشا قورشاۋىنا سوعىلعان. كولىك، تاربيەشىلەردىڭ ايتۋىنشا، 26 بالا ويناپ وتىرعان بالالار الاڭىنا بارىپ تۇسكەن. ءبىر ءبۇلدىرشىن قازا تاۋىپ، تاعى سەگىزى جاراقات الىپ، الماتى قالالىق №1 بالالار اۋرۋحاناسىنا جەتكىزىلدى. كەيىن تاعى ءبىر بالانىڭ اۋرۋحاناعا جەتكىزىلگەنى بەلگىلى بولدى.

بالالار الاڭىنا سوعىلعان جۇرگىزۋشىنىڭ كىم ەكەنى انىقتالدى. ول – 46 جاستاعى ايەل. تەرگەۋ ءجۇرىپ جاتىر، ايەل ۋاقىتشا ۇستاۋ يزولياتورىنا قامالدى. بۇگىن، 22 مامىردا ونى قاماۋعا الۋ تۋرالى سانكتسيا شىعارىلادى. ايتا كەتەيىك، تاراپتاردىڭ ىمىراعا كەلۋىنە 2014 جىلدىڭ مامىر ايىنان باستاپ تىيىم سالىنعان، سوندىقتان جۇرگىزۋشى ايەل 5 جىلعا دەيىن سوتتالۋى مۇمكىن. بالاباقشا قالىپتى رەجيمدە جۇمىس ىستەپ تۇر، الايدا قاۋىپسىزدىكتى ساقتاۋدىڭ قاتاڭ شارالارى قولعا الىنعان – بالاباقشاعا كىرەتىن ەسىك قۇلىپتاۋلى. بالالارىن اكەلگەن اتا-انالارعا ەسىك قاعىلعاننان كەيىن عانا اشىلادى.