ۋكراينا ۇكىمەتى ەل پرەزيدەنتى پەتر پوروشەنكوعا گرۋزيانىڭ ەكس-پرەزيدەنتى ميحايل سااكاشۆيليدى ودەسسا وبلىسىنىڭ گۋبەرناتورى قىزمەتىنە تاعايىنداۋدى ۇسىنعان. بۇل تۋرالى جۇما كۇنى «ينتەر» تەلەارناسىنا ۋكراينا پرەزيدەنتى اكىمشىلىگى باسشىسىنىڭ ورىنباسارى ۆالەري چالىي مالىمدەگەن. ول پرەزيدەنت ۇكىمەت ۇسىنىسىن قاراعان سوڭ شەشىم قابىلدايتىنىن ايتقان-دەپ حابارلايدى ازاتتىق راديوسى.

بۇعان دەيىن ۋكراينانىڭ ەكولوگيا جانە تابيعي رەسۋرستار ءمينيسترى يگور شەۆچەنكو Facebook-تەگى پاراقشاسىندا سااكاشۆيليدىڭ ودەسسا وبلىسىنىڭ گۋبەرناتورى بولىپ تاعايىندالعانى تۋرالى جازعان ەدى.

بىراق، ۋكراينا پرەزيدەنتىنىڭ سايتىندا سااكاشۆيليدىڭ ودەسسا گۋبەرناتورى بولىپ تاعايىندالعانى جونىندە رەسمي اقپارات جوق. بىلتىر مامىردىڭ 6-سى كۇنى ودەسسا وبلىستىق اكىمدىگى باسشىسى بولىپ يگور پاليتسا تاعايىندالعان.

جۇما كۇنى گرۋزيادا تبيليسي قالالىق سوتى ەلدىڭ ەكس-پرەزيدەنتى ميحايل سااكاشۆيلي، ەكس-پرەمەرى ۆانو مەرابيشۆيلي، ءتبيليسيدىڭ بۇرىنعى مەرى گيگي ۋگۋلاۆا، بۇرىنعى قورعانىس ءمينيسترى داۆيد كازەراشۆيلي جانە بۇرىنعى ادىلەت ءمينيسترى زۋراب ادەيشۆيليگە قاتىستى قوزعالعان قىلمىستىق ىستەردى قىسقارتۋ تۋرالى ولاردىڭ قورعاۋشىلارى بەرگەن وتىنىشتەردى قاناعاتتاندىرماي تاستادى دەپ حابارلادى «ينتەرفاكس». گرۋزيانىڭ بۇرىنعى باسشىلىعىنا قارسى 2007 جىلى قاراشادا تبيليسيدە وتكەن بەيبىت شەرۋدى كۇشپەن باسۋ، «يمەدي» تەلەكومپانياسىن تالقانداۋ جانە مارقۇم، ميللياردەر بادري پاتاركاتسيشۆيليدىڭ دۇنيە-مۇلكىن يەلەنىپ العان دەگەن ايىپتاۋلار بويىنشا قىلمىستىق ىستەر قوزعالعان.

ميحايل سااكاشۆيلي وزىنە تاعىلعان ايىپتاردىڭ بارلىعىن «ساياسي قۋدالاۋ» دەپ سانايدى. ول قازىر ۋكراينا پرەزيدەنتى جانىنداعى رەفورمالار كەڭەسىنە جەتەكشىلىك ەتەدى. بۇعان دەيىن كيەۆ سااكاشۆيليدى وتانىنا ماجبۇرلەپ قايتارۋدى سۇراعان ءتبيليسيدىڭ رەسمي ءوتىنىشىن ورىنداۋدان باس تارتقان.