تايىنشا تارتقان بالۋان شولاق
kerey.kz
مۇنىڭ الدىندا كوكىرەك ءۇيسىننىڭ باستى باي ادامى جىلىسبايدىڭ سىي-قۇرمەتىن كورىپ، شوكەڭ سول ۇيدە، سول اۋىلدا ءبىراز كۇن اۋناپ-قۋناپ جاتتى. تەك ءبىر ءۇيدى ىعىر، ءبىر اۋىلدىڭ ءۇستىن كوبىرەك وپىر-توپىر قىلۋدى لايىق كورمەي، ارقا باتىرىنىڭ ىلگەرىرەك جىلجىعىسى كەلدى. كەل دەمەك بار، كەت دەمەك جوق. شوكەڭ ءوزى ولەڭمەن ءجون ءبىلدىردى.
باسى ەدى ولەڭىمنىڭ ماڭ-ماڭ قوڭىر،
تەڭ ەمەس ارعىماقپەن قارا شوبىر.
ارمانسىز قالىڭ دۋلات ارالايىن،
كوپ جاتىپ ءبىر اۋىلدى قىلماي ىعىر.
جىلىسباي قوناعىنىڭ سىڭايىن بايقادى. رەنجىمەي، قاباق شىتىپ وكپەلەمەي كەتسىن دەپ ءارى بالۋاننىڭ كۇش-ونەرىن سىناماق، كورمەك بولىپ، باي ۇلكەن توي جاسادى. ءۇيسىن-دۋلات جىگىتتەرىنە دوداعا ءۇش سەركە، ءبىر تايىنشا تاستادى. مىقتى جىگىتتەر دوداعا سەركەلەرىن تارتقاندارىمەن، تايىنشانى ات ۇستىنەن الىپ شابا المايدى. شوكەڭ قاسىنداعى اتقوسشىلارىنىڭ بىرىنە سوندا:
– سۇلتان، ءا، سۇلتان، ەردەنباي قارانى باۋىرلاشى! – دەپ داۋىستادى. جولشىباي ەردەنباي مىنگىزگەن مىقتى قارا اتتىڭ باۋىرىن مىقتاپ تارتىپ تاستا دەگەنى.
ەلۋدەگى كۇش سيقىرىنىڭ ءداۋ پەرىسى شولاق قارا اتقا ءمىندى. «ەنەلەرىڭ سەندەر ءۇشىن نەسىنە قالجا جەگەن؟» دەپ شوكەڭ ادەتىنشە مۇرنىنان سويلەپ، ەكى اياعىن ۇزەڭگىگە مىقتاپ قاداپ، ەكى جاققا ەرسىلى-قارسىلى شاڭداتا كەزەك-كەزەك شاپتى. تايىنشانى ءبىر قولىمەن قازديتىپ تىك كوتەرىپ الىپ، قاراقشىداي قالقيتا ۇستادى. تايىنشانى تىزەسىنە، جامباسىنا ماڭايلاتپادى. قولىن قاناتىنا سوزىپ، سابىن ورىمىمەن بۇكتەپ ۇستاعان قامشىداي، تانانى استىنداعى اتىنا قاتارلاستىرىپ، قالىقتاتا كوتەرىپ شاپقان…
…بويىنىڭ ءسال الاسىراعىن كورىپ، شولاقپەن كۇرەسكىسى، ۇستاسىپ كورگىسى كەلگەن دامەلى جىگىتتەر دە بار سىقىلدى. بىراق شوكەڭنىڭ تايىنشا كوتەرىپ شابۋ كەرەمەتىن كورىپ، دامەلىلەر جىم بولدى.
جايىق بەكتۇروۆ.
سۋرەتتىڭ اۆتورى جانۇزاق ءمۇساپىر
facebook پاراقشاسىنان الىندى
پىكىر قالدىرۋ