الدىن الا مالىمەتتەر بويىنشا، تۇركياداعى پارلامەنت سايلاۋىندا پرەزيدەنت رەجەپ تايىپ ەردوعاننىڭ بيلىكتەگى پارتياسى پارلامەنتتەگى كوپشىلىك ورىنعا يە بولا الماي قالۋى مۇمكىن. قازىرگە دەيىن سايلاۋدا بەرىلگەن داۋىستىڭ 97 پايىزعا جۋىعى سانالىپ بىتكەن. الدىن الا مالىمەتتەر تۇركياداعى پارلامەنت سايلاۋىندا “ادىلەت جانە دامۋ” پارتياسى ء(ادپ) 41 پايىزعا جۋىق داۋىسپەن قارسىلاستارىنان الدا تۇرعانىن كورسەتەدى. بولجام بويىنشا، پارتيا پارلامەنتتەگى 258 دەپۋتاتتىق ورىنعا يە بولۋى ىقتيمال. پارتيا پارلامەنتتە كوپشىلىك ورىنعا يە بولۋ ءۇشىن كەمىندە 270 ماندات الۋى ءتيىس.

ءادپ ەل كونستيتۋتسياسىنا پرەزيدەنت وكىلەتىن كۇشەيتەتىن وزگەرىستەر ەنگىزۋگە مۇمكىندىك الۋ ءۇشىن پارلامەنتتە كوپشىلىك ورىندى يەلەنۋى قاجەت بولاتىن.

سايلاۋدا كۇردتەردى قولدايتىن حالىقتىق دەموكراتيالىق پارتيا (حدپ) 13 پايىز داۋىس جيناۋى مۇمكىن. حدپ پارلامەنت قۇرامىنا كىرۋ ءۇشىن كەمىندە 10 پايىز داۋىس جيناۋى قاجەت بولاتىن.

ماۋسىمنىڭ 5-ءى كۇنى حدپ سايلاۋالدى شەرۋ وتكىزىپ جاتقان ديارباكىر قالاسىندا بولعان جارىلىستار سالدارىنان ەكى ادام قازا تاۋىپ، 200-گە جۋىق ادام جارالانعان. پرەزيدەنت ەردوعان بۇل شابۋىلداردى «ارانداتۋ» دەپ اتاپ، «سايلاۋعا كولەڭكە تۇسىرەتىنىن» ايتقان.

تۇركيا پارلامەنتىندەگى 550 ورىن ءۇشىن بيىلعى سايلاۋ باسەكەسىنە 20 ساياسي پارتيا ءتۇسىپ جاتىر. ەلدە داۋىس بەرۋ قۇقىعىنا يە ازاماتتار سانى 53 ميلليوننان اسادى.

تۇركيا پرەمەر-ءمينيسترى احمەت داۆۋتوگلۋ 7 ماۋسىمدا جارىلىسقا قاتىسى بار دەگەن كۇدىكتىنىڭ ۇستالعانىن حابارلاعانىمەن، وزگە جەتكىلىكتى اقپارات بەرمەدى.

azattyq.org