ەلباسى: استانا حالقىنىڭ سانى 900 مىڭ ادامعا جەتتى
kerey.kz
ەلباسى «استانا باس جوسپارى» عزجي» جشس-دا بولدى
مۇندا مەملەكەت باسشىسىنا استانا قالاسىنىڭ 2030 جىلعا دەيىنگى باس جوسپارىنا ەنگىزىلگەن تۇزەتۋلەر مەن استانالىق اگلومەراتسيا قالىپتاستىرۋ جوباسى جونىندە، سونداي-اق ەلوردانىڭ جاڭا كولىك جۇيەسىن قۇرۋ بارىسى باياندالدى.
بۇدان بولەك، قازاقستان پرەزيدەنتىنە ورىنبور كوشەسىن، جاڭا تەمىرجول ۆوكزالى اۋدانىن سالۋ تۇجىرىمداماسى جانە نۇرلى جول بۋلۆارىنىڭ ەكىنشى كەزەگىنىڭ جوباسى تۋرالى ايتىلدى. سونداي-اق نۇرسۇلتان نازارباەۆقا ەلوردادا قۇرىلىسى جوسپارلانعان تاعى بىرقاتار جوبالار تانىستىرىلدى.
باق وكىلدەرىنە ارنالعان بريفينگتە مەملەكەت باسشىسى ەلوردانىڭ قۇرىلىسى ءىس جۇزىندە 10 جىل ىشىندە جۇزەگە اسقانىن اتاپ ءوتتى.
– قالاعا قاجەتتىنىڭ ءبارى 2008 جىلعا دەيىن سالىندى، ودان كەيىنگى كەزەڭدە استانانىڭ دامۋى جەكە ينۆەستورلاردىڭ قاتىسۋىمەن جالعاستى. قازىرگى كەزدە جان باسىنا شاققانداعى ەڭ كوپ ينۆەستيتسيا ەلورداعا تيەسىلى. استانانىڭ ەل ەكونوميكاسىن دامىتۋعا قوسقان ۇلەسى جىل سايىن ءوسىپ كەلەدى. بۇگىندە ەلوردا بارشا قازاقستاندىقتاردىڭ ماقتانىشى سانالادى، قوناقتارىن ءتانتى ەتەدى. حالقىنىڭ سانى 900 مىڭ ادامعا جەتتى، بۇرىن مۇنى بولجاۋدىڭ ءوزى قيىن بولاتىن. قالا ەلىمىزدىڭ شىن مانىندەگى اكىمشىلىك، مادەني، ىسكەرلىك، ءبىلىم جانە مەديتسينا ورتالىعىنا اينالدى، – دەدى قازاقستان پرەزيدەنتى.
نۇرسۇلتان نازارباەۆ استانانى سالۋ جانە اباتتاندىرۋ جۇمىستارى جالعاستىرىلاتىنىن ايتتى.
– قانداي كەمشىلىكتەر بار ەكەنىن، سونىڭ ىشىندە كولىكتەر تۇراعىنا قاتىستى ماسەلە تۋرالى دا بىلەمىز، ونىڭ ءبارى مىندەتتى تۇردە شەشىلەدى. تاياۋداعى مول جاۋىن سۋ سورعى كارىزدەرىنە قاتىستى تۇيتكىلدەردىڭ بار ەكەنىن كورسەتتى. ونىمەن دە جۇمىس جۇرگىزۋ قاجەت. سونىمەن قاتار، بالاباقشالار مەن مەكتەپتەر سالۋ ماسەلەسىنە دە نازار اۋدارۋ كەرەك. قالانىڭ ءارى قاراي دامۋ كەلەشەگى ەكسپو-2017 اۋماعى مەن ونىڭ اينالاسىنداعى كوشەلەر قۇرىلىسىن، سۋلى-جاسىل جەلەكتى بۋلۆاردى اباتتاندىرۋ، جاڭا ساياباقتار، سونىڭ ىشىندە 100 گەكتار اۋماقتا بوتانيكالىق باق سالۋ جوسپارىن قامتيدى. بۇل جۇمىستاردىڭ بارلىعى ەلىمىزدىڭ تۋرا ورتالىعىندا مۇلدە جاڭا مەگاپوليستىڭ قالىپتاسۋىنا نەگىز قالايدى، ول بارشا قازاقستاندىقتاردىڭ يگىلىگىنە قىزمەت ەتەتىن بولادى، – دەدى مەملەكەت باسشىسى.
پىكىر قالدىرۋ