استانانىڭ ىشكى ىستەر دەپارتامەنتى ەلوردادا مۇعالىم ايەلدى ورتەپ جىبەرگەن قانات ءسادۋوۆ تۋرالى اقپارات بەرگەن ادامعا سىياقى تابىس ەتەدى، – دەپ حابارلايدى Tengrinews.kz ءتىلشىسى ءىىد-ءنىڭ ءباسپاسوز قىزمەتىنە سىلتەمە جاساپ.

“استانا ءىىد اسا اۋىر قىلمىس جاساعان 30.10.1972, سولتۇستىك قازاقستان وبلىسىنىڭ جامبىل اۋدانىنىڭ تۋماسى سادۋوۆ قانات عايساۇلىنا ىزدەۋ جاريالايدى. قانداي دا ءبىر مالىمەت پايدا بولسا مىنا مەكەن-جايعا حابارلاسۋلارىڭىزدى وتىنەمىز: 8(7172) 71-63-29, 71-60-29, 71-60-22, 71-60-10, 8-747-227-79-40, 8-778-917-05-78. اتى-ءجوندى جاسىرۋعا بولادى جانە سىياقى كەپىلدەندىرىلگەن”، – دەلىنگەن دەپارتامەنتتىڭ حابارلاماسىندا.

ايتا كەتەيىك، ءسادۋوۆ ءبىر ايدان بەرى ىزدەستىرىلىپ جاتىر، الايدا ازىرشە ەش ناتيجە جوق. استانا ءىىد 1 ماۋسىمدا بۇرىنعى ايەلىن ورتەپ جىبەرگەن ەر ادامعا سيپاتتاما بەرىپ، تاراتتى.

ەسكە سالا كەتەيىك، 26 مامىردا استانادا №25 مەكتەپتىڭ ماڭىندا ەر ادام مۇعالىمدى ورتەپ جىبەرگەن بولاتىن. ەر ادامنىڭ اتى-ءجونى انىقتالدى – ول ايەلدىڭ كۇيەۋى بولىپ شىقتى. سوتتىڭ قاۋلىسى بويىنشا، ول مۇعالىمگە جاقىنداماۋى ءتيىس بولعان. ايەل ادامنىڭ دەنەسىنىڭ 70 پايىزىن كۇيىك شالدى. ال تاياۋدا زارداپ شەككەن ايەلدىڭقايتىس بولعانى انىقتالدى. ونىڭ ارتىندا ءتورت بالاسى قالدى. ولاردى قازا بولعان ايەلدىڭ اپكەسى ءوز قامقورلىعىنا الدى. بالالاردىڭ ەڭ ۇلكەنىنىڭ سىنىپتاستارى قازىرگى تاڭدا ولارعا كومەك كورسەتۋ ءۇشىن قارجى جيناپ جاتىر.

سونىمەن قاتار، ءىىد ماماندارى بۇرىنعى ايەلىن ءولتىردى دەگەن كۇدىكپەن ىزدەۋ جاريالانعان قانات ءسادۋوۆتىڭ ءبىراز ۋاقىت ىشكى ىستەر ورگاندارىندا كىشى لەيتەنانت بولىپ جۇمىس ىستەگەنىن حابارلادى. “قانات ءسادۋوۆ ىشكى ىستەر ورگاندارىنداعى قىزمەتىنەن 2003 جىلى بوساتىلدى، ول ءىىب قىزمەتكەرى جول پوليتسياسى ينسپەكتورى لاۋازىمىنىڭ بەدەلىن تۇسىرگەنى ءۇشىن جۇمىستان شىعارىلعان”، – دەدى دەپارتامەنتتەگىلەر.

tengrinews.kz