“Astana Arlans” كلۋبى WSB چەمپيونى اتاندى
kerey.kz
“Astana Arlans” WSB فينالىنىڭ ەكىنشى كۇنىندە دە “كۋبا دومادورەس” كلۋبىن 3-2 ەسەبىمەن جەڭىپ، الەمدىك بوكس سەرياسىنىڭ (WSB) چەمپيونى اتاعىنا يە بولدى-دەپ vesti.kz كە سىلتەمە جاساپ tengrinews.kz حابارلايدى.
الەمدىك بوكس سەرياسىنىڭ (WSB) فينالىنداعى ءبىرىنشى كەزدەسۋدە 52 كەلىگە دەيىنگى سالماق دارەجەسىندە قازاقستاندىق بوكسشى ولجاس ساتتىباەۆ “كۋبا دومادورەس” كلۋبىنىڭ بوكسشىسى يوسۆاني ۆەيتيانى 3:0 (49:46, 49:46, 49:46) ەسەبىمەن جەڭدى.
ەكىنشى بولىپ قازاقستاندىق زاكير سافيۋللين مەن الەمنىڭ ەكى دۇركىن چەمپيونى لازارو الۆارەس شىقتى. كەزدەسۋ 60 كەلىگە دەيىنگى سالماق دارەجەسىندە ءوتتى. جەكپە-جەك 2:1 (49:46, 49:46, 47:48) ەسەبىمەن كۋبالىق بوكسشىنىڭ پايداسىنا شەشىلدى. وسىلايشا، “استانا ارلانس” پەن “كۋبا دومادورەس” كلۋبتارى اراسىنداعى ەسەپ ايىرماسى 4:3 بولدى.
ءۇشىنشى جەكپە-جەكتە قازاقستاندىق اسىلانبەك شىمبەرگەنوۆ “استانا ارلانس” كومانداسىنا بەسىنشى جەڭىستى سىيلادى. 69 كەلىگە دەيىنگى سالماق دارەجەسىندە جەرلەسىمىز لوندون-2012 وليمپياداسىنىڭ جەڭىمپازى رونەل يگلەسياس سوتولونگوعا قارسى شىقتى. العاشقى راۋندتا جەڭىلىپ قالعان اسىلان قالعان ەكەۋىندە جەڭىسكە جەتتى. كەزدەسۋ 2:1 ەسەبىمەن اياقتالدى.
WSB فينالىنىڭ ەكىنشى كۇنىندە 81 كەلىگە دەيىنگى سالماق دارەجەسىندە كۋبالىق حۋليو لا كرۋز قازاقستاندىق نۇرداۋلەت جارمانوۆتى جەڭدى. كەزدەسۋ 3:0 (50:45, 50:45, 49:46) ەسەبىمەن اياقتالدى.
فينالدىق كەزدەسۋدە سوڭعى بولىپ رينگكە قازاقستاندىق يۆان دىچكو شىقتى. 91 كەلىدەن جوعارى سالماق دارەجەسىندە سىنعا تۇسكەن ول “كۋبا دومادورەس” كلۋبىنىڭ يواندي ورتەگا تويراكا اتتى سپورتشىسىنا قارسى ونەر كورسەتتى. ول ءۇش راۋند بويى دا باسىم بولىپ، جالپى ەسەپتە قازاقستاندىق كلۋبقا تاعى ءبىر جەڭىس سىيلادى.
وسىلايشا، “استانا ارلانس” كلۋبى الەمدىك بوكس سەرياسىنىڭ (WSB) چەمپيونى اتاندى. “استانا ارلانس” – “كۋبا دومادورەس” اراسىنداعى فينالدىق كەزدەسۋ 6:4 ەسەبىمەن قازاقستاندىق كلۋبتىڭ پايداسىنا شەشىلدى.
ايتا كەتەيىك، ەكى كلۋب اراسىنداعى WSB فينالى 20 جانە 21 ماۋسىم كۇندەرى استاناداعى “داۋلەت” سپورتكومبيناتىندا ءوتتى. شارانىڭ العاشقى كۇنىندە دە قازاقستاندىق كلۋب جەڭىسكە جەتكەن بولاتىن.
پىكىر قالدىرۋ