اقش ۇلتتىق قاۋىپسىزدىك اگەنتتىگى فرانتسيا پرەزيدەنتتەرى جاك شيراك، نيكوليا ساركوزي جانە فرانسۋا وللاندقا اڭدۋ جۇرگىزگەن دەپ حابارلادى WikiLeaks سايتى. العاش بۇل اقپارات فرانتسۋزدىڭ Liberation گازەتى مەن Mediapart اقپاراتتىق سايتىندا جاريالانعان. وندا اڭدۋ 2006-2012 جىلدار ارالىعىندا – فرانسۋا وللاند نيكوليا ساركوزيدى الماستىرعانعا دەيىن جۇرگىزىلگەنى ايتىلعان-دەپ حابارلايدى ازاتتىق راديوسى.

WikiLeaks-ءتىڭ مالىمەتىنشە، تىڭشىلىق فرانتسۋز باسشىلارىنىڭ بايلانىس ارنالارىنا، فرانتسيا مينيسترلەر كابينەتىنىڭ مۇشەلەرى مەن فرانتسيانىڭ اقش-تاعى ەلشىسىنە دە جاسالعان.

سايت ۇلتتىق قاۋىپسىزدىك اگەنتتىگىنەن الىنعان قۇجاتتاردا ەليسەي سارايى قىزمەتكەرلەرىنىڭ ءبىرازىنىڭ، ونىڭ ىشىندە پرەزيدەنتتىڭ ءوزىنىڭ ۇيالى تەلەفون نومىرلەرى بارىن ايتادى. قۇجاتتاردا فرانتسۋز ۇكىمەتى مۇشەلەرىنىڭ الەمدىك قارجى داعدارىسى، گرەكيانىڭ نەسيە ماسەلەسى، وللاند اكىمشىلىگى مەن گەرمانيا كانتسلەرى انگەلا مەركەل ۇكىمەتى اراسىنداعى قارىم-قاتىناس تاقىرىپتارىندا تەلەفوندا سويلەسكەن جازبالارى بار.

وللاندتىڭ كومەكشىسى فرانتسيا پرەزيدەنتى 24 ماۋسىمدا WikiLeaks-تە جاريالانعان اقپاراتتى تالقىلاۋ ءۇشىن قورعانىس كەڭەسىنىڭ جيىنىن وتكىزەتىنىن حابارلادى.