جاھان جاڭالىقتارى قازاق حاندىعىنا 550 جىل
رەسەي قازاق حاندىعىنىڭ 550 جىلدىعىن نازاردان تىس قالدىرمايدى – ا.كليموۆ
kerey.kz
رەسەي فەدەراتسياسى قازاق حاندىعىنىڭ 550 جىلدىعى مەرەكەسىن نازاردان تىس قالدىرمايدى. بۇل تۋرالى رەسەي فەدەرالدىق كەڭەستىڭ حالىقارالىق ىستەر بويىنشا كوميتەتى باسشىسىنىڭ ورىنباسارى ا.كليموۆ «نۇر وتان» پارتياسى دەلەگاتسياسىمەن كەزدەسۋ بارىسىندا مالىمدەدى.
«قازاق حاندىعىنىڭ 550 جىلدىعى قازاقستان حالقىنىڭ تاريحىنداعى ماڭىزدى كەزەڭى بولىپ تابىلادى. وسىناۋ ماڭىزدى وقيعانى نازاردان تىس قالدىرماۋ ماسەلەسىن ءبىز سىزدەرمەن بىرلەسىپ ويلاستىرۋىمىز قاجەت»، – دەدى ول.
سونداي-اق، رەسەي پارلامەنتشىلەرى اتاۋلى كۇندەردى مەرەكەلەۋ بويىنشا بىرلەسىپ جۇمىس جاساۋدىڭ قاجەت ەكەنىن جەتكىزدى، ولاردىڭ قاتارىندا ۇلى وتان سوعىسى جەڭىسىنىڭ 70 جىلدىعى دا بار.
ەسكە سالا كەتەيىك، 23 ماۋسىمدا «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ باسشىلىعىمەن «نۇر وتان» پارتياسى دەلەگاتسياسىنىڭ رەسەي فەدەراتسياسىنا ساپارى باستالدى.
رەسمي ساپاردىڭ ءبىرىنشى كۇنىندە باۋىرجان بايبەك رەسەي فەدەراتسياسى فەدەرالدىق جينالىسى مەملەكەتتىك دۋماسىنىڭ توراعاسى سەرگەي نارىشكينمەن كەزدەستى.
ەكىجاقتى كەزدەسۋ بارىسىندا بۇگىنگى تاڭدا قر پارلامەنتى سەناتى مەن رف فەدەراتسيا كەڭەسىنىڭ، قر پارلامەنتى ءماجىلىسى مەن رف مەملەكەتتىك دۋماسىنىڭ اراسىندا تىكەلەي ءوزارا ءىس-قيمىلدىڭ ورناتىلعانى، ال، دەپۋتاتتاردىڭ تمد پارلامەنتارالىق اسسامبلەياسى، ۇقشۇ، ەقىۇ مەن ەقىۇ پارلامەنتتىك اسسامبلەياسى وتىرىستارى شەڭبەرىندە جەمىستى جۇمىس جاساپ جاتقانى اتالىپ ءوتتى. تاراپتار ەكى ەل پارلامەنتى اراسىنداعى بايلانىستاردى ءارى قاراي دا دامىتۋعا نيەتتى ەكەندەرىن جەتكىزدى.
سونىمەن قاتار، كەزدەسۋ بارىسىندا ماسكەۋدە «ەدينايا روسسيا» بۇكىلرەسەيلىك ساياسي پارتياسىنىڭ باسشىلىعىمەن ەكى بيلەۋشى پارتيانىڭ اراسىنداعى ءوزارا ءىس-قيمىل مەن ارىپتەستىك تۋرالى كەلىسىمگە قول قويىلدى.
kerey.kz
پىكىر قالدىرۋ