قىرعىزستاننان سول ەلگە 2014 جىلدىڭ 1 قاڭتارىنان كەيىن اكەلىنگەن اۆتوكولىكتەر قازاقستاننىڭ نارىعىنا ەركىن ەنە الادى. ءماجىلىستىڭ جالپى وتىرىسىندا ۇلتتىق ەكونوميكا ءمينيسترى ەربولات دوساەۆ وسىلاي ءمالىم ەتتى.

جالپى وتىرىستا ەۋرازيالىق ەكونوميكالىق وداق تۋرالى شارتقا قىرعىز رەسپۋبليكاسىنىڭ قوسىلۋى تۋرالى قۇجات ماقۇلدانعان بولاتىن.

«وتاندىق كولىك ونەركاسىبىن قىرعىزستاننىڭ ارزان اۆتوونەركاسىبىنىڭ يمپورتىنان قورعاۋ ماقساتىندا، قازاقستاننىڭ نارىعىنا ەركىن قولجەتىمدىلىكتى قىرعىزستان اۋماعىنا 2014 جىلدىڭ 1 قاڭتارىنان كەيىن كىرگىزىلگەن اۆتوكولىكتەرگە رۇقسات بەرىلەدى. بۇل رەتتە اۆتوكولىكتەر «دوڭعالاقتى كولىك قۇرالدارى تۋرالى» تەحرەگلامەنتكە ساي بولۋى كەرەك»، – دەدى ەربولات دوساەۆ.

سونىمەن قاتار ءمينيستردىڭ ايتۋىنشا، قىرعىزستاننىڭ ەاەو-قا قوسىلۋى ەۋرازيالىق ينتەگراتسيا جولىنداعى ماڭىزدى قادام بولىپ تابىلادى.

«بۇل ءوز كەزەگىندە كەدەندىك وداققا مۇشە مەملەكەتتەر ءۇشىن دە، بىرىڭعاي ەكونوميكالىق كەڭىستىك ءۇشىن دە ءتيىمدى بولماق. سونىمەن قاتار ەاەو-قا قىرعىزستاننىڭ قوسىلۋى ورتالىق ازيا وڭىرىندە ساۋدا-ەكونوميكالىق ىنتىماقتاستىق مۇمكىندىكتەرىن كەڭەيتە تۇسۋدەگى ماڭىزدى فاكتور بولىپ تابىلادى»، – دەدى دوساەۆ.

ەسكە سالايىق، قىرعىز رەسپۋبليكاسىنىڭ ەاەو-قا قوسىلۋ تۋرالى شارتقا قازاقستان، قىرعىز، بەلارۋس، رەسەي پرەزيدەنتتەرى 2014 جىلدىڭ 23 جەلتوقسانىندا قول قويىلعان.

ال ءماجىلىس ماقۇلداعان زاڭ جوباسى سەناتقا جولدانادى.

inform.kz