پرەزيدەنت جانىنداعى ورتالىق كوممۋنيكاتسيالار قىزمەتىنىڭ ءباسپاسوز ءماسليحاتىندا پرەمەر-ءمينيستردىڭ ورىنباسارى بەردىبەك ساپارباەۆ تىلشىلەردىڭ بيزنەسمەن نۇرلان سماعۇلوۆ ەكەۋىنىڭ اراسىنداعى «ارازدىققا» قاتىستى ساۋالىنا جاۋاپ بەردى، دەپ حابارلايدى BNews.kz.

«نۇرلان سماعۇلوۆقا مەنىڭ ەشقانداي رەنىشىم جوق. ءبىزدىڭ ارامىزدان ەشقانداي الا مىسىق جۇگىرىپ وتكەن جوق. مۇنى وسكەمەنمەن بايلانىستىرۋدىڭ قاجەتى جوق. كەيبىرەۋلەر ەكسپو-2017 نىساندارىمەن بايلانىستىرا باستادى. الماتى اكىمىنىڭ ورىنباسارىنا جاي عانا سۇراق قويدىم. بۇگىندە قالادا بالاباقشالار، مەكتەپتەر جەتىسپەيدى. مەن الماتىدا كاسىپكەرلەر، بيزنەسمەندەر وتە كوپ ەكەنىن، ولارعا بالاباقشالار، مەكتەپتەر مەن سپورتتىق نىساندار سالۋ تۋرالى ۇسىنىس نەگە ايتپاسقا دەدىم. بۇل جۇمىسقا بارلىعىنىڭ اتسالىسقانى ءجون»، – دەدى ساپارباەۆ.

ۇكىمەت باسشىسىنىڭ ورىنباسارىنىڭ ايتۋىنشا، ءاربىر قازاقستاندىق ءوز تۋعان جەرىن ۇمىتپاي، شاما-شارقىنشا كومەك كورسەتۋى ءتيىس. بىراق ماجبۇرلەپ، كوندىرىپ جاتقان ەشكىم جوق.

«ەگەر مۇمكىندىك بولسا، ءبىز سۇرايمىز. سوندىقتان، دۇرىس تۇسىنۋلەرىڭىزدى وتىنەمىن، وسىمەن بۇل سوزگە نۇكتە قويعان ابزال. نۇرلان سماعۇلوۆپەن قارىم-قاتىناسىمىز جاقسى»، – دەدى پرەمەر.

bnews.kz