قىرعىز-تاجىك شەكاراسىندا بۇگىن دە جانجال شىعىپ، جاعداي قايتا شيەلەنىستى. قىرعىزستانننىڭ باتكەن وبلىسىنىڭ شەكارا جاقىن كوك-تاش اۋىلى مەن تاجىكستاننىڭ چوركۋ اۋىلى ماڭىندا اتىس داۋسى ەستىلدى. تاجىكستاننىڭ يسفارا اۋدانى بيلىگىنىڭ مالىمدەۋىنشە، اتىستا ءتورت تاجىك ازاماتى جارالانعان. كەشە وسى اۋماقتا ەكى اۋىل تۇرعىندارى – ونداعان تاجىك پەن قىرعىز اراسىندا قاقتىعىس بولىپ، بىرنەشە ادام جارالانعان ەدى.

بۇگىن شەكارا ماڭىنا شامامەن 500-گە تارتا ادام جينالىپ، ءبىر-بىرىنە تاس اتا باستاعان. كەيبىر اقپاراتتارعا قاراعاندا، كوك-تاش اۋىلىندا ايەلدەر بالالارىن ەرتىپ كەتە باستاعان.

قاقتىعىس 3 تامىز كۇنى تاجىك ازاماتتارى زيراتقا بارا جاتقان كوك-تاش اۋىلى تۇرعىندارىنىڭ جولىن جاۋىپ، وتكىزبەي قويعاننان كەيىن باستالعان. وعان جاۋاپ رەتىندە قىرعىز ازاماتتارى تاجىك اۋىلىنا باراتىن كانال سۋىن جاپقان. سالدارىنان ەكى اۋىل تۇرعىندارى اراسىندا قاقتىعىسى تۋعان. شەكارالاس اۋىلداردىڭ 200-گە تارتا تۇرعىنى ءبىر-بىرىنە تاس لاقتىرىپ، سالدارىنان ءتورت قىرعىز ازاماتى جارالانىپ اۋرۋحاناعا تۇسكەن.

قىرعىز مەملەكەتتىك شەكارا قىزمەتىنىڭ ازاتتىقتىڭ قىرعىز قىزمەتىنە حابارلاۋىنشا، قىرعىز جاعىنان ء“بىر عانا وق اتىلعان”. قىرعىز شەكاراشىلارى شەكاراداعى جاعدايدى “شيەنەلىستى” دەپ باعالاپ وتىر.

شەكارالاس اۋىلداردىڭ بيلىگى مەن اقساقالدارى قازىر جاعدايدى تالقىلاپ، تۇرعىنداردى تىنىشتاندىرۋعا شاقىرىپ جاتىر.

قىرعىز جانە تاجىك شەكاراشىلارى قازىر شەكاراداعى جاعدايدى باقىلاۋدا ۇستاپ تۇرعانىن جانە شيەلەنىستىڭ كۇشەيىپ كەتپەۋىنە كۇش سالىپ جاتقانىن ايتادى.

سوڭعى ايلاردا قىرعىز-تاجىك، قىرعىز-وزبەك شەكارالارىنىڭ كەيبىر بولىكتەرىندە شەكارالاس اۋىلدار تۇرعىندارىنىڭ اراسىندا، تۇرعىندار مەن شەكاراشىلار اراسىندا جانجال تۋىنداپ، جاعداي شيەلەنىسە باستاعان.

ازاتتىق راديوسى