اباي اتىنداعى تەاترعا بارعان مەملەكەتتىك حاتشى «ادامزاتتىڭ ابايى» اتتى سالتاناتتى ءىس-شاراعا قاتىستى، ءىس-شارا سوڭىنان مەرەكەلىك كونتسەرت ۇيىمداستىرىلدى. ساياسي جانە قوعام قايراتكەرلەرى، بەلگىلى اقىن-جازۋشىلار، ابايتانۋشى عالىمدار، ۇلى ويشىل تۋىندىلارىنىڭ اۋدارماشىلارى مەرەكەنىڭ قۇرمەتتى قوناقتارى بولدى.

مەملەكەتتىك حاتشى «جۇلدىز-ارداق» جەكە مەنشىك بالاباقشاسىنىڭ جۇمىسىمەن تانىستى، وندا 350 بالا زاماناۋي يننوۆاتسيالىق ادىسپەن تاربيەلەنۋدە. گ.ابدىقالىقوۆا اباي شىعارمالارىنىڭ جەلىسى بويىنشا سالىنعان سۋرەتتەردى، سونداي-اق «قارا سوزدەردى» مانەرلەپ وقيتىن بالالاردىڭ كونتسەرتىن كوردى.

ەلدەگى ءىرى مەديتسينالىق راديولوگيالىق كلاستەر قۇرامىنا كىرگەن «وڭىرلىك ونكولوگيالىق ديسپانسەرى» يادرولىق مەديتسينا ورتالىعىندا بولعان كەزىندە گۇلشارا ابدىقالىقوۆاعا سۋ جاڭا مەديتسينالىق قۇرال-جابدىقتار كورسەتىلىپ، ءوڭىر حالقىنا ونكولوگيالىق كومەك كورسەتۋدى دامىتۋ كەلەشەگى تۋرالى ايتىلدى. يادرولىق مەديتسينا ورتالىعىنىڭ جۇمىسى يادرولىق تەحنولوگيانى بەيبىت ماقساتتا پايدالانۋدىڭ جارقىن مىسالى بولىپ تابىلادى.

ءدال وسى كۇنى مەملەكەتتىك حاتشى 1985 جىلى ىرگەسى قالانعان نەۆزوروۆتار اۋلەتى اتىنداعى سەمەي بەينەلەۋ ونەرى مۇراجايىندا بولدى. قازىرگى تاڭدا مەكەمە كوركەمسۋرەت قۇندىلىقتارى جيناقتالعان قازاقستانداعى ەڭ ءىرى مۇراجايلاردىڭ ءبىرى سانالادى. مۇندا 3600-دەن استام ونەر تۋىندىسى،  سونداي-اق ءتۇرلى داۋىرلەرگە جاتاتىن ورىس جانە شەتەل كوركەم تۋىندىلاردىڭ قازاقستانداعى ءىرى كوللەكتسيالارى جينالعان. سونىمەن قاتار، مۇراجايدا ورتالىق ازيا، رەسەي، گرۋزيا، بەلورۋسسيا ەلدەرىنىڭ ونەر تۋىندىلارى قويىلعان.

گ.ابدىقالىقوۆا سونداي-اق 1940 جىلى قۇرىلعان «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىعى – اباي مۇراجايىندا بولدى. مۇراجاي قورىندا اراب، پارسى جانە تۇركى تىلىندەگى 500-دەن استام كونە كىتاپ ساقتالعان. 2014 جىلى مۇراجاي حالىقارالىق ءىسوم مۇراجايلار قوعامداستىعىنا كىرگەن.

مەملەكەتتىك حاتشى ساپار قورىتىندىسى بويىنشا مەملەكەتتىك ورگاندارعا ناقتى تاپسىرمالار بەردى.